Кубачибад Кьара-кьурайшлизи арх1я

1977 ибил дусла сентябрьла ахирличир Кубачирад Кьара-кьурешлизи, школала верхIъибил класслизиб бучIути пионертира нура, шадир дякьунтири. Ну вецIъибил класслизир ручIулри, илдала вожатая сарри.   


ГIур нушачил варх чилра халаси агарли, 25 цад дурхIяра нура, ила хьурали дякьунтири. ИтхIели заманара паргъатсири, пионертачирра кIел дусцун халаси набчил, школала дурхIни гьарахъси архIяличи букниличи чилилра гIяйиббарибси ахIенри. ДурхIнира, шадибгьуни гIяхIбизурли, разили чарбухъунтири.
Кубачибад Кьара-кьурешлизи шел километрла гьуни леб. Кьара-кьурешлис гIярбукIанти, сирхIянти, алав шимала халкь АрцIмацци бикIар.
ИтхIели, вацIала ургабад, Кьара-кьурешлизи аркьуси, жявхIелила, уркурти дашуси гьуни лебалри. Илаб гьуни лебси биъниличила халкьли хI****ули биэсра асубирар. 


Гьуни Шарала-хъябличибад бехIбихьили,(гIярбукIанти ил мерлис Шягьи или бикIар) аркьусири. Лебилра гьуни халати къаркъала гIенбани буцилри, дурхIнас башес урехиласи ахIенри. ЦацадехIти мераначир галгубала хIячмани гIенби ахъ-гIяшдарили, гьуни букьбуири. Амма халаси къиян агарли илди далдарес вири.


Агь, итхIели нуша аркьуси гьуни-алавси вацIала жагадеш. Галгуби дугIла гIинцбани ва хъярбани вахдаршили дерхъилри. Дикьурли кадикибти дугIла цIедешли, галгубала удибси ванза чебиахъули ахIенри, дахъ чула дахъдешли. Илди дугIла цурмала, синкбала, гIуррара цархIилти вацIала мицIирагла хурегуни сарри. Ишаб бурес чебиркур, гIярбукIантани вацIализибси дугIла цIедешла галга урцуйс сеналра кабирхъуси ахIенри. Ил багьандан сарри илди вацIализир дахъал лертира. Ахъти галгубала удир дерхъили дакIибти, дикьурти мижигъарла кьадубани вацIа мургьи-бухъутIа рангла бетаахъурлири. МяхIяулла галгуби дахъ дерхъили, чумал кьяли кадердалри, вавналагъуна мяхIяулла хала бетарулри. Гьанналис хIедикьурти дургбала кьадуби, халахIедаибти дургбани дицIилри. Ил сурат гьаннара хIулбала гьалаб, гIяхIцад дусми дикили диалра хъумхIертурли лебал.


Дебали секIал балути адамтани барибсири, вацIала ургабад аркьуси, илабси гьуни. Сунечирад унци, урчи дабгибти уркурти, гьамадли дашесли балкьаурсири. ВацIала ургабадли, кIелра дубурла шяхIрумала ургабад кабухъунси, биштIаси хIеркIличи убяхIихъулри. ХIеркIличибси гуми итхIели аги, мурт арбухибал, халати чяхI-забхIели арбухили бурги, гIур балхIебарили лебалри. ГIебшни шин камдиубли хIеркI халаси аги. Дабрилра шинкIахIедиубли, къаркъубачи кьяшми кайцIули, нуша итил шайчи детаира. Баягъи уркурла гьуни, илабра даимбиублири, илабра халати гIенбани буцилри.