Нешлис Расул Х ямзатов

Ну виштIал дубурланри, шантас хIейгивиубси,
Хъулибти бикIутири, ахIен иш лехIирхъуси,
Халалван варсирхъули, бекIлил чехIейсутири,
Наб дурути лерилра, хIела насихIятуни.


Дусми ардашулири, ну илдачил варх сайри,
Кьисматлизивадлира урухкIули ахIенри.
Селис сайрал хI****ас, гьанна ну урухкIулра,
Марлира хIела гьалав, виштIаси дурхIяванра.


ИшбархIи хIера нуша цунни сарра юртлизир,
Уббирхьули ахIенра, уркIи дила изуси,
ХIела някъбачи нуни, кабирхьулра малхIямли,
ХIянбиубси дила бекI, дурхIяливан виштIаси.


ШишимикIулра ну неш, наб кьутIкьули саби неш,
Абдалси бархибдешла, ясир ветаурлира,
Камтири гIямрулизир, нуни дакIударибти,
ХIечила къайгъни, диги, хIеруди ва пикруми.


Ахъти тIама-гьамала, ласлира гьаршдукIличив,
Чина-сайрал дуцIлира, хапли хабарагарли,
УркIи дила гъяжбирар, хIекьдешличи ташмишли,
Мар сабив, вехIихьилрав, нуни аба хъумуртес.



ХIу сарри дигиличил, гIяйибта хIериркьули,
Паргъатагарси хIерли, набчиряхI хIеррикIули,
Кьасагарси сабливан, гьигьбалтули багьлали,
Кадиркути нургъбала кIантI дигIянабирули.


Ахъ зубразиб зубари лямцIбухъун гIур хIусбухъун,
БегI гIергъиси сунела, гьуни шалабирули,
Кабирхьулра ишдуги, хIела някъбачи нуни,
БекI дила хIянбиубси, уршиливан виштIаси.