Къел х1едатурли детх1ейхъур

Къел хIедатурли бетхIейхъур


«Ахъ хIурхъла урунжуни», бикIуси ГIяйша Кьурбановала жуз буч1ули


   Даргала поэзия балуси саби или, ну гаприкIес хIерирус, гIяхIцад лукIантала пагьмуртачил тянишсира, амма Батирайлагъуна ахъдешличи цалра катурси ахIен. Проза бучIухIели, наб гьамадли бирар, назмурти хIебарес чараагарси къиянси хIянчиван кьабулдирули рирус.


ГIяйша Ханаевна Кьурбанова дила шан, зилан, юлдаш сархIели, илини се лукIулил багьес хьулриубра. Наб савгъатбарибси «Ахъ хIурхъла урунжуни» бикIуси жуз белчIес, замана баргира.


Имиалаван, мирхъиван рузуси, цархIилтала сархибдешуначи кьясхIерируси, бархьсицун, уркIила бухIнаб акIубси пикрицун назмула тахтализи бурцуси поэтван чераира илар нуни ГIяйша Кьурбанова.


ГIяхIцад назмуртазир пагьмуличил дарх, хIерамсурли бируси бузерила сархибдешунира даргира жузлизир. Дебали дигестири, нешличила, дудешличила, сунела гъамтачила, нешла мезличила, дурхIядешличила делкIунти, сунес гIяхIбизурти поэтунас ва адамтас багъишладарибти назмурти.
Амма ил жузлизибси «ХIу багьандан» бикIуси поэмализиб, гьанналауб чинабалра нуни хIебаргибси, кьяли-кьяйчил гьаргбарибси, дигайла ахъти хIяланани бицIибси уркIи чебиули саби.


Цалра дубурлан рурсили, ГIяйшаван халахIерурхуси, уктемдеш агарси, духусини хаслира халкьла гьалаб илкьяйда гьаргли уркIи абхьес хIерирар. ГIяйшанира, илизирти пикруми сунела ахIи, баргибси тетрадьлизирадти сарливан гьаладихьили сари. Илди пикруми, назмурти биалли, гьарли-марси, чебяхIси поэзия саби. Илдигъунти назмурти вегIлис дигухIели пикридарили делкIес вирути ахIен. Илкьяйда лукIес багьандан, илаб сипатбирусигъуна, дигайли алкунси уркIи биэс гIягIниси саби.


«ХIед аргъес дигукъи дурхIедурибти,
Наб дурес дигукъи, риъхIериубти,
Тяп урунжла шинван дагьардиубти,
КIапIрази лукIулра дила пикруми».


Секьяйда акIублил назмурти, ГIяйшачибра жагали нуни бурес хIерирни якьинни саби.


«Нурли аръа кIантIван руржескаили,
Дигайли чум адам белхIехъунара?
ЛамбикIул берхIили жанай вавниван,
Игъбарагар уркIи, чум дигубара?»


Илдигъунти дигайличила лукIули сари ГIяйша сунела поэмализир. «Х1у багьандан» бикIуси поэма нуни Фазу ГIялиевала назмуртачил мешубуцира. Фазулаван сари регIти хIялани сари, ГIяйшанира поэмализир сипатдарибти.
Нуни гIяхIли хIурматбируси мурул адамлира ил поэма белчIи гIур хъумхIертурлири, илини гьанбушили гIергъи, нунира иличи имцIали пикри бяхIчиаира.


«УрхIла назмуртани хIяйранрарилра.
УрхIла тетрадьли ну урузрарилра».
Тяп илкьяйда саби, поэма белчIунхIели хIяйранра вирули сай, урузра вирули сай. Ил поэмализир, уркIи бахъ гьаргсили хIебиахъес багьандан, дарх кадерхахъурли, уркIиличир цархIилти пикруми лерхIели делкIунти назмуртира даргира нуни. Илданира поэмаличи вайси асар бирули ахIен. Илдира гьаргси, абхьибси уркIила умути пикруми сари.


«ХIу багьандан» бикIуси поэмали учIусила уркIиличир сагати къел хIедатурли бетхIейхъур. Ил сеналра даргала чеббикIибси поэзияла хазнализи кабурхар ва даимлис илаб кавлан.


ЖагьхIелила хIялалти хIялани аргъахъес, ахIерадарахъес, кьиматладарахъес бучIантас кумеклали бетарар. 


Илкьяйдали наб дебали гIяхIбизур жузла ахирлизибси, бехIемцIлизив урши алхунси нешличила белкIунси поэмара. Илизир сипатдарибти, дардлис цIумрикIуси нешла хIяланира пикрихIедарибти, гIямрулизир лерти ва марти сари.
ХIед, гьарил бирусилизив, Аллагь кумекли виаб ахIерси ГIяйша.