Песнь 18

Сла'ву Бо'жию пове'дают небеса',
творе'ние же Его' руку' возвеща'ет твердь.
День дни глаго'л отрыга'ет, гла'си их ниже' словеса',
и нощь но'щи ра'зум возвеща'ет, и'хже не слы'шатся, не ре'чи суть.
Изы'де глаго'лы их во всю зе'млю и веща'ние их в концы' вселе'нныя.
 
В со'лнце положи' Свое' селе'ние,
и я'ко жени'х той исходя'й от своего' черто'га,
от кра'я небесе' его' сре'тение,
и до кра'я небесе' его' исхо'д,
возра'дуется, я'ко исполи'н тещи' путь,
и и'же укры'ется теплоты' его' несть.

Зако'н Госпо'день непоро'чен,
обраща'яй ду'шы,
свиде'тельство Госпо'дне ве'рно,
умудря'ющее младе'нцы,
оправда'ния Госпо'дня пра'ва,
веселя'щая се'рдце,
за'поведь Госпо'дня светла',
просвеща'ющая о'чи,
страх Госпо'день чист,
пребыва'яй в век ве'ка,
судьбы' Госпо'дни и'стинны,
оправда'ны вку'пе,
вожделе'нны па'че зла'та
и ка'мене че'стна мно'га,
и сла'ждша па'че ме'да и со'та.

И'бо раб Твой храни'т я',
внегда' сохрани'ти я', воздая'ние мно'го.
Кто разуме'ет грехопаде'ния?
От та'йных мои'х очи'сти мя,
и от чужди'х пощади' Твоего' раба',
а'ще непоро'чен бу'ду, тогда' не облада'ют мно'ю
и очи'щуся от вели'ка греха'.

Го'споди, мой Помо'щниче и мой Изба'вителю,
и словеса' мои'х уст бу'дут во благоволе'ние,
и вы'ну пред Тобо'ю се'рдца моего' поуче'ние.