Берхъаб поэзияла анкъи

CихIрула байрам
Берхъаб поэзияла анкъи
Муъминат Хаттаева
Марлира лебли буили саби, поэзияла ва жагали каргьурти дугьбала ясирти. Вирхаэсра къиянни саби, иш бахъ балкIли башуси дунъяличиб, чебхI****кIи башути, гьар-чинабалра жагадеш чебиути, бургути, пергер пикрумани чулара алавталара дунъя жагабирути адамти лебниличи.
Валлагь пахрубирулра нуни хIушачи. ГIяхIцад гIямру деркIибти, бузерилизир, хъалибаргуназир челукьути камхIедирути мурул ва хьунул адамти, лебил дунъяла поэзияла БархIи багьанабарили, илгъуна жагаси къушумлизи кабиили биъни, хIеблизиб вавалибяхъибси галгалагъуна жагадеш саби. Бизити, мурити, умути, цIедеш дакIаб хIушала къушумла вавалибяхъибси галгаличирад.
ХIуша далутази, духънадаибхIели дурхIнала дурхIнази, лебилра дунъялизи гапличил гьанбушеси баркьуди сабри, ахIерти поэзия ва далай дигахъути, Избербаш шагьарлизиб хIушани дураберкIибси гьунибаъни. Чилалра сипта агарли, цалисалра илизибад лябкьуси гIяхIдеш агарли, цаличил ца къаршидикес, ванали хIердизес, яхши-хуш дарес, цали ца чедаэс хIуша хьулдиублири. Поэзияличи дигили хIуша цаладяхъилри. Бирару илгъуна секIал биэс 21 ибил даршдуслизиб, дугIла ва дяхIягарси капитализмализиб. Валлагь, дунъяла давлуми дучили кабиибти ахIен талихIчебти, илкьяйда кадиэс дирути хIуша сарра талихIчерти ва хIурмат-кьиматличи лайикьти. ХIушаб лебтасалра Ма ша Аллагь.
Илдигъунти, сагаси секIал бурес ва барес хьулбикIути, балути адамти лебти хIебиалри, дунъяла адамти чегьес палтар агарли, мурчIличил цIаличиб диъ буцIарбирули, гIинкъурбазиб хIербирули кавлутири.
Дунъя, гIяхIдешла шайчи булкIахъули, хIушани саби гьалабяхI арбикуси, ахIерти поэзияла ясирти.
Къушумлизи лебталалра пикруми кадурцулри, гьариллис чула назмурти делчIес имканти лерри, илав ит-иш барая викIуси аги, уркIила шалати пикрумачил гьарилли шадлихъ гIеббурцулри.
Поэзияла байрамличи дигесли хIядурриублири Хайдакьла районнизирадси буреба-тIузла някьишла уста, «Кайтаги» бикIуси миллатла центрлис гьуни чебиахъуси Зубайдат ХIясанова. Ил дебали кьакьаракIилри хьайдакьла мез детахъес дирниличи. Пагьмуртани алавчарси дунъя гьарза-бягIубирули биъни илабра чебаэслири. Зубайдатли делкIунти назмуртачил зайдикIути далуйтани къушум гьатIира уржахъулри ва разибирулри.
Вихърила шилизивадси урибси тарихла мугIяллим Рустам МуртузагIялиев, сунечиб гIямрула халати гъайбикIахъули, сай лехIкахъилри. Иличил ва бахъал цалабикибтачилра ну, бегI гьалар тянишриубра. Илдигъунти адамти нушала ургаб лебни даргантала халаси талихIра давлара саби или пикрирухъунра.
ХIясайни ГIяппаевра Вихърила шилизив учительли узули сай. Гьунибаъниличив ил даргала литературала мез умули калахъес чараагарси биъниличила гъайикIулри.
Хадижат ГIямаровани, сунела назмуртала диштIати жузи лебтасалра савгъатдариб.
 2012 ибил дусличирад Россияла писательтала Союзлизирси, дурадухъунти ва халкьли ахъли кьиматладарибти назмуртала кIел жузла автор Байгинат Кьурбановала, жагати хатIличил делкIунти сагати назмуртала бабза тетрадь лебри. Ил тетрадьлизибадра сагаси жуз бетаэс асубирар.
ДейбукIла шилизивадси РабаданхIяжи Юсупов дебали къушумлизив валиркуси, ил жагабируси адам сайри. Цалабикибтас багъишладарибти кIел тахта назмула делчIи къантIкайуб, лехIирхъути инжитхIебариб.
Усишавадси БяхIмуд Булатов дахъал гъай агарси, дебали адабчевси сайливан пикриварира.
ХIуллила шилизивадси Кьурбан Ибациевра поэт ва  гьарли-марси поэзияла юлдаш сай.
Дибгашила шилизирадси рахъхIила францияла мезла учительница, гьанна пенсияличирси Халум БяхIмудовна байрамличи кьанниван ракIиб. Илинира гьунибаъни гьатIира мягIничебси бетаахъур.
Марлира, шайчи лайдакIили дунъяла шишимтира къайгънира поэзияличила, жагати хIяланачила гъайикIули кайэс дигеслири.
Дикторлагъуна кагибси тIамаличил, умути литературала мезли гъайрикIули гьунибаъни бузахъулри Къистаман Кьурбановани. Поэзия диганти уржахъес имцIасигъуна къайгъи дакIубарибсира Къистаман сарри.  Цалабикибтала ургаб дебали балбикилри Умусалимат Билалова ва Зубалжат ГIямарова. Илдира поэзияличи дигили гьунибаъниличи килри, илданира цалабикибтас чула назмурти делчIун.
Къушум гьарзабариб, бегIлара чеббикIибси къушумлизирра черрикIибси, акIубхIейчирад жузала юлдаш, рахъхIила библиотекала заведующая, республикала культурала гIямрулизир мурталра бутIакьяндеш дируси Шагьанназ ГIямаровани.
Дибгашарадси ПатIимат Даудовара поэзия дигантала ургар бегI гьалар къарширикилри, дила пикрили ракIниличи пашманриубли ахIенри.
Даргала театрла гIяртист ХIясанкьади Рабадановлира нушала гьунибаъни шадбариб ва шалабариб.
ДекIарси баркалла гьунибаъни тарихлизиб калахъес суратуни касибси МяхIяммад ГIямаровлис.
ГIямру жагадирути, дурхъадирути, гьаладяхI ардикути халкьла пагьмуртани ва культурали сари. Или хIебиалри, лебилра дунъяличибти халкьли далив А.Пушкинна, М.Лермонтовла, В.Шекспирла, В.Гётела, О.Хайямла, даргала халкьла поэт ГI.Батирайла, композиторти В.А.Моцартла, П.Чайковскийла, Мазагиб Шариповла, МяхIяммад Кьасумовла, нушала далайчиби Марьям Дамдамаевала, Муи ХIясановала, Алжанбек ГIялисултIановла уми. Чула пагьмуртачил дунъя жагабарибти, нуни гьанбушибти, илдачи мешути, дунъяла халкьла культура гьанна лебсигъуна бетаахъурти, бахъал цархIилтира пагьмучебти адамтачил, хIушала пикрумира  кьасанира далдикибти, уржибти сари. Гьарил балбуцлизив хIушаб Аллагь кумекли виаб.   
 ГIярасайла халаси хIяким левсири, Виктор Черномырдин бикIуси, илини гьачам бурибсири, - «ункъли барес дигусири, мурталраван ахIи бетарули ахIен». Набра илгъуна бетаур биэс асубирар. БегI гьалар хIушала ургар къарширикили, набчи имцIали пикри битIакIира риасли, чердерхирая. Хъули чарриубли гIергъи аргъира, хIуша лерилра гIядатла адамти хIедиъни. Гьарилла пагьмуртачил гъамливан тянишриэс ва дила уркIилизи дуцес къайгъибирис, рахли риасли.
Илкьяйда цаладиркули, разили кадирес хIушаб Аллагьли арадешра имкантира габ. Дунъяличир бегIлара черяхIти, поэзиялис ясирдеш сари хIушала уркIбазирти. ГIуррара дерхъаб пагьмурти, берхъаб хIушала поэзияла анхъ. ЦIуба умуси кьясдешличил хIербикIаб хIушачи адамти. Арцла ахIи, поэзияла ясирти бетаурли дигахъира лебилра гIяхIти адамти.