Ца1 дика дич Итт юхадоаг1а

               
                Ца1 дика дич Итт юхадоаг1а


   «Соахк санна ланаш дохкий вай, хьано йовлакхаш дукхаг1а гулдо марх къобалдеш?- оал ишколе ц1доаг1аш Даудо. «Дохк…»- сиха йист хул улув воаг1а Рамзан. Мурад йист халац. «Хьо раьза веций – аьлле хоат вела а велий Даудо Мурадага.
      «А… са безам баг1ац - оал корт чу бела воаг1ача Мурадо. «Соахк санна эша безам боаг1а хуббац хьа» - аьле велало Рамзан. «Со соахка а иййша вацар цу Лейлас согар йовлакхаш дийхадецаре.»- корт хьал ца айбеш юха йист хул Мурад.
      «Ай т1адоаг1ача шера итт юха лудда ма аьннадий цо хьога - яхаш вел Дауд,- хьожадда вай цо уж лой».
     «Иза-м маьре яха йий хац - вел Рамзан - цунна соахка а бар йоавлакхаш ца тоаш кагий нах».
      Соахка марх къоабал деш, юрта йисте даг1ача ц1аг1а кхьаьчача, -«Аз т1адоаг1ача шера итт юха лудда шоана цхьа йовлакх да сона»- аьнна дийхадар царгара Лейлас. Дауд  е Рамзан е коара арабейдар. Мурадас ший т1ормечура кхо йовлакх д1акховдадир Лейлайна - «А..а цхьаъ мара дезац, сахахалда хьа»- аьнна б1араше е конфеташ е чу яхкар Лейлас Мурада т1ормечу.
       Сайранна доттаг1ий йовлакхаш ларха хайча Мурада цхьа  йовлакх къезигаг1а дар. Из дар хьанз доттаг1аш Мурада т1ехьа деттар.
      «Мегаьд …вай цхьа ч1оаг1о е еза. Вайгара йовлакхаш дехе  уж  лорхад да вай долаш санна, из оаш т1аэце со раьза ва ланаш дахка»- хоат Мурада. Доттаг1и раьза хул. Шоайла кулгаш ло из тоадеш.
        «Ук шера вайна дукхаг1а лудда йовлакхаш - оал Даудо - хьан аьлча вай цхьа шу доккхаг1а да, пхелаг1ча классе а даг1а.Вайна дезац т1ормигаш. Б1араш… конфеташ вай гулъегяц. Йовлакхаш киса дохкадда вай.»
        «Аза –м киса т1орме а болаб ба - велалу Рамзан, - сонам дез б1араш… конфеташ а ез… лой саьг1азаш а».
        Марх доастача дийнахьа хоза кийч а бенна ара бовл доттаг1ий марх къоабал дувца а, йовлакхаш гул де а.
        Хьалхаг1а гаргара нахаца а дийце юрта г1ола марх къобал дувца болало дотаг1ий. Юрт йисте кхоч уж.               
        Лейла яха ц1ен юхе кхаьчача - «Со ваг1ац… шоаш д1ачуг1о» - оал Мурада.
       «Хьайгар цхьакха йовлакх даккхара кхер хьо» - яхаш вел Дауд.
       Йийла латта коана1ара ара бог1аш бар хьаший, уж накъа баха арабаьннабар Лейла е цун нана е.
       «Хьадале… хьадале… хьа дувца марх къоабал - аьллар царга Лейлай нанас, б1араш чу дада кад бе а бела.
        «А б1араш гул дац оах, йоавлакхаш мара- оал Даудо.
        «Сабар делаш… сабар… - аьнна Мурада къиръенна б1арахьож Лейла. Мурад  йист ца хулаш лаьтта хьежаш латтар. «Ай мама ер ва хьона аз соахка дош денна къаьнк, хьажал мишта воаккха ханнав. 1а хьайгара б1араш ле, аз сай дош кхоачаш дедда» – аьлле лаг1ашта г1олла хьалт1а а яле, д1акхайде итт йовлакх хьа эц Лейлас. «Ишта дика, камаьрша волаш д1ахо низ лолба хьона ваха» – аьле Мурада киса йовлакхаш дохк Лейлас. «А дезац .. хьайна дезадда хьона – йоах Мурадо. «Дош аьннача халдез – елаш къанк марх вол Лейлас – къезига воаккхаг1а валар хьо, д1амвохийтарг вацар».
         «Бита хьай бегаш – йох нанас Рамзана т1ормеча б1араш чу доахкаш.  «Саххалд»- йоах Рамзана. Дауд юстара ваьнна латт.
        Сайранна доттаг1ий йовлакхаш лаьрхача Мурада итт дукхаг1а дар.
       «Ер да хьона из «Ца1  дика дич Итт юхадоаг1а» яхар» - велало Рамзан.
       Ч1ога раьза бар доттаг1ий Рамзана т1орме шийца хьаийца: б1араш, конфеташ, бетта увза саьг1азаш дар чу ча.
       Марх Къобал халда массане а аьле б1араш дохаде ховш доттаг1ий.