Маца хул зунгатаг1 аькха

                Маца хул зунгатаг1 аькха

    «Воле хи т1а долха вай» - оал карта т1ехьа а тоссавенна Зурабас, ц1ен пена букъ теха латтача Адамаг. «Дахар вай» - аьлле Адам коарара ара экъ. Зураб цул хьалха вала г1ерташ т1ехьа вод.
    Зураб е Адам е ши лоалахо ханна а ца1еш, ши доттаг1а вар. Цхьан классе деша а баг1ар уж.
Бакъхуддац царна юкъе  латар-тохар халац аьлча. Дукх гаьна далацар цатовра. Адам мел ше бакъвале а хьалха кулг лора Зурабага: «Д1адаьларе из»- аьлле. Цу г1улакха Зураб ч1оаг1а раьза хулар.
    Удаш болха доттаг1ий хийна дукх гаьна бацар, цхьа дехар деш оаз царна хазача хана. Зураб юха хьож: «О…вордингаш къамаьл дувца йолаенний вайна»– аьле велало из. Адам юхавийрзача цунна а го гаьна йоцаш латта за1апхой вордингаш. Вордингаш цхьакха а йист хул. Т1аккха го Адама цу т1а ваг1ача к1аьнка бе йола телефон. Ч1оаг1а езар цунна из мо кердаянна телефон. Нанас т1адоаг1ача шера эцаг я аьннадар цунга. Ч1оаг1а д1аьхденнадар Адама ер шу.
    «Фу йоах цо? – аьнна хоат Адамас Зурабаг,- фуд цунна вайгара дезар?».
    «Вайга вордингашта дала хьама дац»- аьлле д1аэкх Зураб хий долчахьа. Адам цкъа вордингашка а хьажа т1акха Зураба т1ехьа хьож. Из шийла хьалха хи чу валара кхераш цунна т1ехьа вод.
     Шоашта къордадалалца хи чу лийча а лийча ц1енгахьа лост доттаг1ий. «Аз дикаг1а некдо…со гаьнаг1а вода некдеш…» -яхаш къовса болало уж наькъа боаг1аш.
    «Мича яхар уж вордингаш?-аьлле хоат Адамас къоавсам гаьна балара кхераш.
    «Хьалахалахь хьайна уж ч1оаг1а езий»- аьлле шунна кулгаца д1атот Зурабас Адам. Ц1аьхха дага а доацаш меттахьара ваькха Адам оагалу. Кулг д1адохийт цо Зураб хьалаца дагахьа. Зураб цунна юхера вод.  Адам лаьттаг1а вож, цхьа унзара ц1ог1а а даьле. Адамагара даьнна ц1ог1о юха водийта Зураб. Цхьа ха йокх цо Адама б1арахьежаш, когат1ара б1арг д1ацабоакхаш. Тамашийна оаг1ара баьна улар Адама ког. «Хьаг1атта новкъостал де сона»- оал Адамас из шийна сел ч1оаг1а унзара вьанна б1ара сен хьеж кхета а ца деш. «А..а…а… меттахьа ма валалахь - аьле вод Зураб.
Зураб къайла воал. Ше г1атта г1ерт Адам, бакъда ког м ладувг1аш бацар. Зураб а вацар юха воаг1аш. Б1аргаш д1акъавлалуш хет Адама к1аьнка бе яла телефонас шийга: «О… лорий новкъостал эш хьон»- яхаш санна.
     Больнице хьакхет Адам. Кегбаьбар цо ког. Къоагач оаг1ора иккха ханнабар из. Лораш гон юххе кхачалца гипс а ела д1абийхкар. Бетта ишта лела вез хьо, аьнна ц1авахийтар из кхоллаг1ча дийнахьа.
    Адам ц1авеналга хайча Зураб вера из волча. Ч1оаг1а бехказа вувлаш къамаьла дувца волавелар: «Со ведда хьа да нана долча вера, ц1аг1а саг вацар, т1аккха хьо волча юха ведар… наькъа «Скорый помощь» яйра, из сацанзар… цунна т1ехьа ведар со… из хьо уллача д1ат1а йодаш яйра сона…хьо цара машенат1а вилар…со юха ведар…хьа нана б1аргаяйра…цунга д1ааьлар хьо лораш машенат1а вила д1авигар… Деррига уж вордингаш бахьан халар из…».
    «Сабар…сабар - соца вир Адамо Зураб - вордингашт1а юха даьхкар вай»- аьлар цо вела а венна. Ше в1аг1ачара кулг лоста дир цо. «Хьаейтал 1а 1о латтараш со волча»- аьлле. Т1аккха мара зувц Зурабас менгена гаьна йоцаш латта за1апхой вордингаш. Шорта ший бихка ког менгера т1ера 1о боакх Адамас: «Къамаьлаш де йола яла еза укхана а… – аьлле вордингашта хов Адам - сона хов хьона вай мичахьа даха деза, цкъа ара якха 1а ер». Ц1агара а т1аккха коара а ара бовла новкъостий.
     «Каси-нани яха ц1а мичахьа даг1а ма хой хьона? - хоат Адамас. «Ай из-м соахка д1а ма янний - цец воал Зураб - из йоалча долха м яхац 1а?». «Из йолч яхац, из яьха ц1а долча ях» - яхаш вел Адам. Ший наьнага тахкадар Адамо из вордингашца лела к1анк малав аьнна. Каси ви1и во1 ва, вей мехка ц1абоаг1аш машенаш в1ашаг1 а кхийта лозаваь висав из ишта, хьанза Каси яхача ц1аг1а 1еш ба уж, аьннадар нанас. Каси коана1арта латтар вордингаш. Боаг1аш латта доттаг1ий шийна байча чехка кулгашца чархаш кхестаеш коа ваьлар к1анк. Бакъда ни1 д1акъовла кхувц  цунна. Вордингашт1а ваг1ача Адамас чехка хьа лоц ни1.
   «Сабар… сабар… вада ма г1ерта» - оал цо к1аьнкага.
    «Ч1оаг1 гаьна а ваг ва хьона со хьанз веддача» - юха йист хул к1аьнк. «Вордингашца а гаьна вала йиш я – вела а велий оал Адамас.- тхо хьона баркал ала даьхкад , 1а из «Скорый» хьакхайкарах со чехкаг1а больнице кхаьчар, ишта м Зурабас се вутаргвоацалга ховра сона». К1аьнк йист хиланзар. Т1аккха хоат Адамас: «Сих дар тхо цу дийнахьа. Фу эшаш кхайкар хьо тхога?»
     К1аьнко шиннена б1ара а хьажа хоат: «Зунгатаг1 аькха маца хул хой шоана?»
     Адам е Зураб е «керта дик вий хьог1 ер» яхаш шойла б1арахьож.. Т1аккха к1аьнко вела а венна, бийхка Адама кога б1ара а хьажа аьлар: «Д1ара хьанз хьона м ховд да хьона из».
 Ший когат1а хьож Адам. Мичахьара даьхкад ца ховш зунгате лелар бихкача к1айча когат1а г1олла. «Ай Зураб… Зураб… сихаг1а д1адаха»- ц1ог1 техар Адамас.
     «Хьанз со ше долча кхийттар хьона - оал Адамас, к1аьнк ваг1ача оаг1ора кулг а дахийте – со Адам ва, а ер вайз ма вайзаре хьона?»
     «Мурад – аьлле кулг ло к1анко Адамаг е Зурабаг е.
     «Мишта хетт шоана доаттаг1ий вай  хьанз хи йисте байт1а дахача? - ийст хул Зураб – шун шинне вордингаш хоахкаг я вай, хьалхаг1а малаг1а воал а хьожад  да. А со кхелахо хуг ва.
     «Со раьза ва – велало Адам.
     «Со а ва оаш яхачоа т1ехьа»- вел Мурад а.
     Хи долчахьа болало доттаг1ий. Ши вордингаш е, юкъе Зураб е.
     Цар дувца къамаьл хозаш хинна Мурада нана, г1аддаха б1аргашкара уха хий теркал ца деш, цхьа ха йокх т1ехьа хьежаш латташ.