Гъабзадеш арцлис асес х1ейрар

Рабазан Шамильевич Мусаев 1996 ибил дуслизив акIубси сай. 90 ибти дусми халкьли балагь-кьадарла дусмиван гьандиркахъули сари. Итди дусмазиб, гIядатла хъалибаргуназиб, акIубти дурхIнала гIямрура гьамадти ахIенри, илдас челябкьлализи бархьси гьуни чеббикIесра къиянбулхъусири.


Дудеш жявли итил дунъяличи арякьунси ва цIуръавиубси Рабазанна дурхIядешра гьамадти ахIенри. Хъалибарглизив ил виштIалгъуна сайри. Нешли хIябалра рурсира кIелра уршира асилдешличил халабиахъулри. Биалра Рабазаннис нешличи, халаси узичи, рузбачи хъарли виэс дигули ахIенри. Илини ургъанна санигIят школализив учIули левалли чеббикIиб.


Мусаевхъала хъалибарг гьаланачи Тарумовкала районна Ново-Георгиевск шилизиб хIербирулри. Илав Рабазан цаибил класслизи учIес вехIихьиб. ГIур хъалибаргличил варх гечиубли, Тарумовкала районна Калиновка бикIуси шилизиб белчIуди даимбариб.


2013 ибил дуслизиб Ахъушала районна, сунела хала бегIтала шилизиб, Цугнила урга даражала школализиб белчIуди хъараахъур ва аттестат касиб. Ил дуслизивал Омсклизибси автобронетанковый инженерный институтлизи учIес керхур.
Илар сержант Рабазан Мусаевли гьаланачи взводла, гIур отделениела командирла къуллукъуни дузахъулри.


2018 ибил дуслизиб институтлизиб белчIуди хъараахъур ва лейтенантла звание касиб. Сунела тилади хIясибли, Рабазан Мусаев Северла флотлизи вархьиб. Иличи ротала командирла къуллукъуни хъардариб.
2019 ибил дуслизиб Р.Мусаевли радио-техникала разведкала взводла командирла къуллукъуни дузахъулри, ДекIарси урхьула дубличибси ракетабала бригадализиб къуллукъбирулри.


2022 ибил дусла июньничиб дявила хасси балбуцлизиб саби гIяхIъулали бургъес аркьутала кьукья сунени цалабяхъиб ва урхьула пехотала Бригадализив Украинализи дявила хасси балбуц бетурхуси мерличи къуллукъбарес арякьун.
Дявила хасси балбуцлизир бутIакьяндеш дирухIели старший лейтенантла звание касиб. Рабазан Мусаевли дявила кьукьяла (штурмовая группа) командирла къуллукъуни дузахъулри.


Илини бекIдеш дируси кьукьялис, лебси мерличибад къаршикарти гьабяхъес ва ил мер чула някъбазиб калахъес, командиртани дявила хъарбаркь бедиб.
Хъарбаркь таманбарес дурабухъунти Р.Мусаевла кьукьяла бургъантала ва илдала къаршикартала ургаб цIала-хIярхIубала дергъ кабикиб. Рабазан Мусаевла дархьти, урехиагарти буйрухъуначибли, илини бекIдеш дируси кьукьяли, сунела бургъантала ургар детахълуми хIедиахъубли, къаршикарти кабушиб, гьабяхъиб, илдала шел ургъан ясирбуциб. ГIур, буцибси мер чузиб калахъес се барес хIяжатлил бургъантази аргъахъиб.


Чули хIеруди бузахъуси ца мерличиб, саби алавбуцес аркьути ВСУ-ла бургъанти хIясиббиуб. Илдала пикрумачи шакикили, бургъантази къаршикарти гъамбиайчи лехIкахъахъес хъарбариб, гIур илдачи хIярхIубала цIа чекьур. Иличибли къаршикарти гIела ласбиуб. Буцибси мер чула арилиуб калахъун.
ИлхIели ВСУ-ли илдачи гIярадабала хIярхIуби чекьур. Кьукьяла ца ургъан минала бургIяла чегили вяхъиб. Даргудути минабала ва хIярхIубала забличи хIерхIеили Р.Мусаев сунела ургъанничи дуцIухъун. Дяхъилизирад дашути хIи тIашаиб, тухтурла цаибси кумек гIеббаахъиб, иличибли ургъанна гIямру дерцахъес имканбакIиб.


Илар дакIударибти гъабзадеш багьандан старший лейтенант Рабазан Мусаевлис Гъабзадешла орден бедиб.


Илкьяйдали Рабазан Мусаевли Сириялизиб бетерхурси дявила балбуцлизирра бутIакьяндеш дарибтири.


Илини Суворовла уличилси медальра касили сай. Асилси ургъанничил бархбас кабизахъес ва сунела гьунартачила бурахъес гьанналис бетхIеур. Ил шабагъатлавирухIели хIукмулизир гьандушибти баянти бучIантас гьаладирхьулра.
Илдигъунти гъабзадеш арцлис асес, чинар-биалра даргес вируси ахIен. ИмцIаливан, гIяхIгъубзначибад гIяхIгъубзни алкIули, гъабзадеш, адамдеш, асилдеш хала бегIтачирад букьурли диути сари. СирхIянтала гъабзадешла пай Рабазан Мусаевлисра сахаватли баили биъниличи пахрубирулра. Сархибти гьунартачил ва шабагъатуначил Рабазан мубаракирулра, гIямрулизир гIурра дахъал гьарбизуни, сархибдешуни диубли дигулра. Итил дунъялизи жявли аррякьунси илала нешла мерличир ва илала рузбачил рарх дявила майдайчив Рабазан ва илабти лебилра бургъанти ахIерабарахъес Аллагьлизи рулгулра. Дявила хасси балбуц таманбиахъес ва даршути гIямруличи лебилра бургъанти чарбухъахъес дигулра.