Къудей-КъуэщIысокъуэ Фаридэ и творческэ гъуэгуанэр

Къудей (КъуэщIысокъуэ) Фаридэ тхакIуэщ, публицистщ, жылагъуэ лэжьакIуэщ. Урысей Федерацэм и тхакIуэхэм я Союзым хэтщ, апхуэдэуи, Кавказым ис тхакIуэхэм я Клубми хэтщ.
Курыт еджапIэр ехъулIэныгъэкIэ къиуха нэужь Фаридэ щеджащ КъБКъУ-м - адыгэбзэмрэ литературэмрэ, урысыбзэмрэ литературэмкIэ и унэтIыныгъэм. Фаридэ илъэс тIощIрэ бгъукIэ урысыбзэмрэ урыс литературэмрэ сабийхэр дригъэхьэхыу, и щэхухэм щыгъуазэ ищIу еджапIэ зыбжанэм щылэжьащ. Абы щыщу илъэс пщыкIубгъур Аруан куейм хухихащ.
Зи щIэныгъэм сытым дежи хэзыгъахъуэ Фаридэ Волгоград къалэм дэт Академиер 20I9 гъэм къиухащ, еджапIэ нэхъыщхьэхэм щригъэджэну ***тыныгъэ иIэу. Къудейр ирагъэблагъэурэ лекцэ къыщоджэ Краснодар щIыналъэм, Къэрэшей-Шэрджэс, Адыгей, Ингуш республикэхэм. А республикэхэм я щIэныгъэ департаментхэм, методическэ центрхэм ядолажьэ. Апхуэдэуи, Фаридэ мызэ-мытIэу хэтащ бзэм теухуа международнэ конференцэхэу Иорданием, Тыркум, Мейкъуапэ, Черкесск, Налшык щекIуэкIахэм.
Зи гугъу тщIа псоми къадэкIуэу Фаридэ тхылъ тхыным, зэхэгъэувэным, къыдэгъэкIыжыным дехьэх, и къаруи зэман куэди абы ирет.
20I3 гъэм Налшык къалэ дунейм къыщытехьащ «Черим: дарю добро» тхылъыр. И фIэщыгъэми къызэрыджиIэщи, ар теухуащ адыгэ лъэпкъым и щэнхабзэм, гъуазджэм хэлъхьэныгъэшхуэ хуэзыщIа, псоми фIыуэ яцIыху артист Нэхущ Черим.
20I4 гъэм сабий журнал «Ронде» жыхуиIэм къытехуащ Фаридэ и IэдакъэщIэкI «Все смешалось в доме Эмилии» зыфIища повестыр.
20I5 гъэм «Черим: дарю добро» тхылъыр къыщыдэкIыжащ Тыркум тыркубзэкIэ зэдзэкIауэ.20I7 гъэм къыдэкIащ «Один день из жизни Аслана Тхакушинова. Стоик». тхылъыр. Ар теухуащ Адыгей республикэм и президенту 2007 гъэм къыщыщIэдзауэ 20I7 гъэ пщIондэ лэжьа ТхьэкIущынэ Аслъэн.
20I7 гъэм къыдэкIащ «Антология женской поэзии» тхылъ дахэ цIыкIур.20I9 гъэм Къудей Фаридэ, Бэджокъуэ Белэ, Маржэхъу Фатимэ, ХьэщIэлI Заирэ сымэ я IэдакъэщIэкIхэр зэрыхуа «Точка кипения» зыфIаща тхылъыр къыдэкIащ.
20I9 гъэм а тхылъыр ди универститетым къыдигъэкIыжри Урысейм и библиотекэ пщыкIущым яIэригъэхьащ.
20I9 гъэм «Си псэм и хэщIапIэ» («Обитель моей души») романыр тхылъ щхьэхуэу къыдэкIащ. ЩIэупщIэшхуэ зэриIэм къыхэкIкIэ романыр а гъэ дыдэм къыдагъэкIыжащ. 2022 гъэм "Iуащхьэмахуэ" журналым и ещанэ номерым къытрадзащ романыр.
2022 гъэм дунейм къытехьащ "Позитивный Нальчик" с Зубером Ципиновым" тхылъ гъэщIэгъуэныр.
Тхыгъэ тхыным, зэхэгъэувэным къыдэкIуэу Къудей Фаридэ и къару ирехьэлIэ ди адыгэ тхакIуэ щэджащэхэм я тхыгъэхэр къыдэгъэкIыжыным, утыку къихьэжыным. Апхуэдэу, Фаридэ и фIыгъэкIэ 20I6 гъэм къыдэкIыжащ МафIэдз Сэрэбий и «Адыгэ хабзэ» тхылъ гъуэзэджэр адыгэбзэкIи урысыбзэкIи - «Адыгэ хабзэ как мировоззрение» жиIэу.
20I6 гъэм адыгэбзэкIэ къыдэкIыжащ «Нарт эпосыр», 20I9 - 2020 гъэхэм Мэлбахъуэ Эльберд и «Страшен путь на Ошхамахо» романыр урысыбзэкIи адыгэбзэкIи.
КъытщIэхъуэ щIэблэм гъэсэныгъэ дахэ яхэлъу, адыгэбзэр яIурылъу къэгъэтэджыным и гуащIэ ирехьэлIэ Фаридэ. Фаридэ фIыуэ къыгуроIуэ анэдэлъхубзэм и къежьапIэр анэм, унагъуэм деж къызэрыщыщIидзэр, унагъуэм адыгэбзэр щыземыкIуэмэ, сабийм ар къызэрыхуэмыщтэнур. Сабий гъэсапIэхэмрэ школхэмрэ а къалэным я закъуэу пэлъэщыфынукъым, атIэ унагъуэм и дэIэпыкъуэгъуу, чэнджэщэгъуу къэувыфыну аркъудейщ. Апхуэдэ Iуэхугъуэхэм зэригъэпIейтейр арауэ къыщIэкIынущ Фаридэ «АдыгэбзэкIэ допсалъэ» («Говорим на кабардинском языке») учебно-методическэ комплект 9 классхэм хуэгъэзауэ щIигъэхьэзырар, апхуэдэуи сабийхэм яхуэгъэза журналхэр къыдигъэкIыным иужь щIихьари.
Фаридэ и фIыгъэщ япэ сабий журнал «Сабий» и фIэщыгъэцIэу 20I3 гъэм дунейм къызэрытехьар(номеритху къыдэкIащ), абы къыпищащ «Ronde» («Вместе») сабий журналымкIэ (номериплI къыдэкIащ 20I4-20I5 гъэхэм).
«Адыгэбзэмрэ адыгэ литературэмрэ курыт еджапIэм» газет 20I8-20I9 гъэхэм номерий къыдэкIащ, художественно-методическэ журнал «Тхьэгъуш» адыгэбзэр езыгъэдж егъэджакIуэхэм хуэгъэзауэ номериплI игъэхьэзыращ.
 «Рекламный калейдоскоп» журналыр, «Рекламный калейдоскоп» газетыр, «Звезды Северного Кавказа» жыхуиIэр 20I3-20I4 гъэхэм дунейм къытехьащ.
«ЛИФФТ Адыгея", «Литературная студия Фариды Кудаевой" журналхэр мы илъэсым тхылъеджэхэм я пащхьэм ирилъхьащ.
«Литературная студия Фариды Кудаевой" журналыр "Мы горской песни два крыла" зыфIища проектщ, мы дызэрыт илъэсым Фаридэ ирихьэжьауэ.
Зи гугъу сщIа тхыгъэхэм нэмыщI, Фаридэ и статьяхэр, тхыгъэхэр Налшыки Мэзкууи къыщыдэкI журнал зэхуэмыдэхэм къытрадзащ.
Мы зы гъуэгукIэ Фаридэ йолэжь дуней псор зыгъэгузавэу екIуэкI СВО-м хэтхэм, абы лIыгъэ къыщызыгъэлъагъуэхэм ятеухуа тхылъ зэхэгъэувэным.
                Къэмбэчокъуэ Альбинэ, КъБКъУ и библиотекэм
                краеведениемкIэ иIэ къудамэм и унэфэщI
                (Къудей Ф.М. и "Си псэм и хэщIапIэ"
                романымкIэ екIуэкIа тхылъеджэ конференцэм
                ирихьэлIэу игъэхьэзыра лэжьыгъэщ)