Стихи Расула Гамзатова в моёми переводе на даргинс

 Расул ХIямзатовлис - 100 дус.
 Хабарла Хунзахла мякьлав ЦIадала шилизив, кIарахъанти бегIтачивад акIубси Расул ХIямзатов лебилра Дагъистанна, Кавказла, Россияла, лебилра дунъяла халкьла поэт ветаурли сай.
КIарахъала мезли делкIунти илала назмурти дахъал дунъяла мезаначи шурдатурли, адамтазир адамдешра, ватIайчи дигира, марти дигайра черяхIдирули зайдикIули сари.
Ишдус, Расул ХIямзатовла дус сабливан багьахъурхIели, илала хIурматбирули, чумал назму дарган мезличи шурдатурра. Марлира дарган мезличилра илди жагати назмурти детаурли сари.


    Къургъи
Гьанарули бирар наб багьадурти,
Дергъла майдайчибад чархIебухъунти,
КахIелунну илди цIяб гIянжилизиб,
Лебилра шурбухъун цIуба къургъачи.

Гьарахъ дусмазирван къургъи гьаннара,
Арцурли заклизир, ахъли жидикIар,
Илбагьандан бургар нуша пашманни,
Заки хIердикIулра гъайхIедикIули.

Урцар заклизиб къяй даим бамсурси,
Ихъуси бархIила хьанцI дирихьлизиб,
Ил къяйлизиб мер леб халал ахIенси,
Марли ил наб бургар, хIядурбарибси.

Лябкьян бархIи къургъала къяйлизив,
Урцус нура хьанцIли-цIябси заклизив,
Арцанван закивад ахъли жиикIус,
Дунъяличир нуни дархьдатуртази.

   
   АхIерабарая юлдашуни
Юлдаш-душмандешла багьа багьурли,
ГIяйибта виркьули бунагь чемайсид,
Юлдашличи гьими зимла-манзилла,
Чебахъес хьулмалхъад гьалакиубли.

Ургар хIела юлдаш пикрихIейкIули,
ХIу гьимукIахъили сай шакхIейкили,
ГIяйиб черихъули, чевверхи алли,
ГIур гьанра мабуршид гIяйибличила.

Духънара эскира дирулра нуша,
Аркьути дусмани, лерил бурхIнани,
Юлдашуни жявли бетихъахъулра,
Баргес юлдашуни камли дирулра.

Марси урчи хапли, кьяш бяхъяхъили,
Къардбухъалли рахли, гьачам ва гIурра,
Гьунчи бара гIяйиб, урчис мабирид,
Барсмабирид урчи гьалакиубли.

Тиладибирулра, Аллагь багьандан,
УрузмакIудая гIяхIтили диэс,
Юлдашуни бахъал биэс хIебирар,
МяхIкамдеш барая илди калахъес.

Ну цархIил тяхIярли хIерирусири,
Вайдешцун бургули малхIямдешлизиб.
Сецад юлдашуна ну вархьватурра?
Нуни сецад илди беткахъахъира?

Се-дигара биуб гIур гIямрулизиб,
Къияндешунира ахъира гьунчир,
Пашманнира гьанна биъхIебиули,
Юлдашуни нуни бетахъахъибти.

Милиглира гьанна хIуша чедаэс,
Юлдашуни муртрил ну дигахъути,
Гьачам хIушачивад ну чевхIерхурти,
Сен-саррил набчирад черхIедерхурти.


  Вавналара хIулби лер
Лерилра вавнала хIулби лер или,
Лебил дунъяличил жалухъес вирус,
ХIечира набчира хIердикIар или,
Дила бекIличибад хъя барес вирус.

Гьанбиркур сен сайрил, урла бурхIназив,
Риганайлис вавни дулцулри нуни,
Набчи хIердикIули илди дикIулри,
«Ил марли кахIелан»,- ил хIуни багьи.

НахIакь жиикIира, хIерли кайира,
ЛайдакIира вавни, илди кадикиб.
Гьарахъ хIердикIули илди дикIулри,
«ГIяйиб нушачибу хIела анцIкьила»?
   
Балагь шишимтазир нуша сархIели,
ГьархIебизни къиян дяхIдизурхIели,
Нуни чадаира вавни дисули,
Аръа маркаличил хIулби урзули.

Нуша аркьухIели декIардикили,
БегIтала ванзали гьунирдалтули,
Гьар журала вавни, багьи хIердикIар,
Бурги гьакIдирули нушаб гIеларад.

ГIебшнилизир унхъри хумарлихIели,
Кьялубачир кIари духъутIдиалли,
Вавни, хIебла бурхIни гьандиркахъули,
Гьарахъли хIердикIар пашман-шавлали.

Ахълизи дакIая дирххIерадалли,
Чедиулрав хIушаб линкIра дикIули,
Дирхули хIушачи лерилра вавни,
Сирилаб дурхIниван хIерсадикIули.

Нушачи хIердикIар ванзала вавни,
Ванаси хIерличил нушаб гъамтала,
Гьарахъси хIерличил итил дунъяла,
Даимлис ишабад арбякьунтала.


    ХIела хIулби
Чедаира хIулби гьарил тяхIярли,
Паргъатли яра, къукъу-лямцIхIели,
ДуцIрумла берхIиван шалалихIели,
ЦIяб-цIудар дугила дяхIцIи аурли.

Дубурла шараван умуси хIерли,
Нудбала удирад хIердикIухIели,
Духъян кьяпIикIуна дигIяндарили,
Муэрли ва гьанкIли кIапIдуцибхIели.

Чедаира илди дукаркIухIели,
Дамсурли пашманни хIердикIухIели,
Дила белкIла тугъи чедаибхIели.
Илдани арбухиб бези-багьладеш,
Шишимти агарти дила гIямрула,
Ахмах, илдас даршна далайикIулра.


   ХIябал сонета
- 1 -
Назмурти делчIунра Япониялизир,
Халаси заллизир, нешла мезличил,
- Селичила сарив? - Дигайличила.
- Сагали делчIен иб, - илдани набзи.

ДелчIунра назмурти кIарахъан мезли,
 - Селичилав? - Хьарбаиб Америкализиб.
 - Дигайличила сари, -  бедира жаваб.
Сагали делчIахъес тиладибариб.

Балулрив иргъулри, гьарил мезличир,
Назмурти нушала дигай-анцIкьила,
Савли чераргъили, хIу пишряхънила.

Наб гьаргбиуб бархьдеш, гьалаб хIергъуси,
Дигай дихьибтани дунъя бицIнила,
Нушаб гьанбиркулри, цархIил агара.
 
- 2 –
ХIела халкьла мезли буруси кьяйда,
Дигулра а, – Римлизиб тиладибариб.
ХIела у бурира бахъ гIядатласи,
Лебтанилра хIела, у, тикрарбариб.

Биэсра хIебирар – бикIулри набзи,
Лерилра мезлизиб ца уцун лебли,
УрхIмешуахIентив марли хIела мез?

Илдачил жаликIес вамсурли нуни,
Жаваб чарбарира, - хIела ца ули,
Лерил дугьбала мер, наб бурцу или.

- 3 –
Муэр ахIен ил, я къагъдеш ахIен,
Хабарла гIяламат, я дирихь ахIен.
ГIямрулис даимси дила децI саби,
АрахIебируси, ил дяхъи саби.

Сукъурли ва гIянцIли уус къянбачи,
ХIела дяхIцун диаб даим шалали,
Гьунира, бурхIнира, дила яшавра,
Калаб наб, гьардаим шаладирули.

ХIела мякьлав даим виэс багьандан,
Хъумартес далуйти ну хIядурлира,
Чардарес вирулра дунъяла хIуркIби.

Шишимтазив нуни ункъли балулра,
Дунъяличир нуни, хIу раргибсири,
Даимлис ишар хIу, реткахъахъири.


       Нешлис
Ну виштIал дубурланри, шантас хIейгивиубси,
Хъулибти бикIутири, ахIен иш лехIирхъуси,
Халалван варсирхъули, бекIлил чехIейсутири,
Наб дурути лерилра, хIела насихIятуни.

Дусми ардашулири, ну илдачил варх сайри,
Кьисматлизивадлира урухкIули ахIенри.
Селис сайрал хI****ас, гьанна ну урухкIулра,
Марлира хIела гьалав, виштIаси дурхIяванра.

ИшбархIи хIера нуша, цунни сарра юртлизир,
Уббирхьули ахIенра, уркIи дила изуси,
ХIела някъбачи нуни, кабирхьулра малхIямли,
ХIянбиубси дила бекI, дурхIяливан виштIаси.

ШишимикIулра ну неш, наб кьутIкьули саби неш,
Абдалси бархибдешла, ясир ветаурлира,
Камтири гIямрулизир, нуни дакIударибти,
ХIечила къайгъни, диги, хIеруди ва пикруми.

Ахъти тIама-гьамала, ласлира гьаршдукIличив,
Чина-сайрал дуцIлира, хапли хабарагарли,
УркIи дила гъяжбирар, хIекьдешличи ташмишли,
Марлира, вехIихьилрав, нуни аба хъумуртес.


ХIу сарри дигиличил, гIяйибта хIериркьули,
Паргъатагарси хIерли, набчиряхI хIеррикIули,
Кьасагарси сабливан, гьигьбалтули багьлали,
Кадиркути нургъбала кIантI дигIянабирули.

Ахъ зубразиб зубари лямцIбухъун гIур кабикиб,
БегI гIергъиси сунела, гьуни шалабирули,
Кабирхьулра ишдуги, хIела някъбачи нуни,
БекI дила хIянбиубси, уршиливан виштIаси.
   

        Ахвах
УркIила тимхъ хъярхъбарес, аркьехIе Ахвахлизи.
БалехIе саррал жагьли, яра дакIилрал кьанни.

ХIял балехIе жагьдешла, Ахвахлизиб нушани,
ДаимбирехIе гIядат, жявхIейчибад бузуси,
ИргьехIе бекIла кьапIни, рурсила улкьайлизи.

Илаб якьинни бирар, чи дигулил рурсилис,
КьапIа дура игьалли, ахIен ил дигахъули.

Дигайла айтубира, илар даглацун ахIен.

Муртрил ит ца дуслизив, бара жагькайзурхIели,
Набчиб гIяхIли халати, дигахъулри бархкьяби,
Ил багьандан сайри ну, вагьариубси сенрил,
Жагьилтачил азбарлав, нуни балхI****уси.

Заманаличив гьалав, илав декIарухъунра,
Иличила сеналра, ну пашманра хIейубра.

ВяшардикIулри кIари, хьамхьаван лехIдешлизир,
ГъярцIа бацла мирш сабри, дуги шалабирули,
Севан далайрикIулил, лехIдизурлири нуша
Кариили дубурлан, рурси улкьайла гьала.

   
БерхIиличила сарри, ва зубартачила гъай,
Иганайлис бучIулри, марси уркIила далай,
ВакIили дигахъулри, кьанхIейубли иганай,
ЦархIилли аррукахъес хIейгулри, дуэс дигай.

Ну сабурагарлири, уркIи чякаван сабри,
Ил тамаша ахIенри, дила хIял бахъ ибкьлири.
ДурхIнани черасили бекIличирадли кьапIни,
Лишанайсес бехIбихьиб рурсила улкьайлизи.

Бурсивиэс хIяжатдеш, илаб лебси ахIенри,
ЧIала буршухIеливан, саби-ахIен викIули,
ЦархIилтачил цугсиван, кепка игьубра кункли,
Илдани лайдакIибти кьапIнала гIелабадли.

Дярхъла унзализирад, гьар-гIергъили мазаван,
Цалис гIеларадли ца, бацла шалала удир,
Улкьайларад игьубли, кьапIни кадиркухIели
Гьигь тIашбизурсиванри, ну мицIирдеш агарли.

Бячун дукалаличи, мешуси дубхъиличил,
КабикибхIели кепка, дилара ванзаличи,
Аргъира гьархIебизур, илгъунари хIякьикьат,
Илди кьапIналагъуна, сабри кепкала кьисмат.

Набчи уркIецIидухъи, иб рурсили илхIели,
Жявли вакIилри урши, хIу гьунибаъниличи,
ВакIи гIурра ахIерси, камси халаваили,
ЧеррикIес хIед риганай, вируд гIур вакIибхIели.

УрухвиубхIеливан, децIлизив ну руржулри,
ДяхъурбазивхIеливан илавад ну аркьулри,
Кьяли-кьяйчил абхьибси, рурсила улкьайлизи,
Сунела кьапIа баргес, чи сайрил айцIулири.

ХIеркIла шинван гьалакли, ардякьун гIяхIцад дусми,
Гьачам ахIенри дягIли, пяхIярдарибти кIари,
Дубурла чедивадван, дусмала чедивадли,
Ахвахлизи вакIира, гIуррара ну сагали.

Дубурлан чехьерибас, ну алхунсиван сайри,
Авлахъличив манзилла, илдас ну ветахъилри,
ЦархIилти сабри чучил, ну вакIибти жагьтира,
Лебилра уршбачивра, гьанна ну халал сайри.

Гьаларванри лерилра, бучIуси далай булан,
КIари вяшардикIулри, лехIдешлизир хьамхьаван,
Рурсира урла сари, гьанбикиб, хIеръибхIели,
Гьаргти улкьайла гьалаб, далайла бакьибхIели.

Урцескаили кьапIни, хIянчи бехIбихьибхIели,
Набра талихI биахъес улгули рурсилизи,
Гьаргти улкьайла бухIна, арцахъурра дилара,
Шляпа дубхъи гьарзаси, модали чеббикIибси.

Пашманбиубти уршби, децIла гьигьаназибри,
ХIякьикьатли илдала, кепдеш черардикулри,
Улкьайлизирад кьапIни, ванзаличи каркулри,
Ца камливан хяса-пухI, чули ахъвандурцулри.

Къапула гьалабяхIли, арцурли бетаили,
Кабикиб дила шляпа, хIярхIя чегиб къянаван,
Набчи уркIецIидухъи, илхIели иб рурсили,
Гьуниваэс вакIес хIу, гIяхIцад кьаниублири,
Наб хIейгибизахъесван, гIурра чеимцIабариб,
Гьанна бикайчи чинав, калунсири ахIерси.

Дебали мешулири, лерилра гьаларванри,
Чедирад хIердикIути зубарти бикьрумири,
ГIяхIцад набчив виштIаси, гьанна цархIил гIулухъа,
Абхьибси улкьайлизи, кьапIа баргес айцIулри.

Бахъ тамашабирулра, лерилра гIямрулизиб,
Илкьяйда бетарулри. Вирхулра гьалаклира,
Дила гIямрула гьунчи, я жявли вяхIигулра,
ЦацахIели дякьличи, кьаниубли кавлулра.