Автордикай

Нажмудин Кадиевич Шихнабиев 1947-йисан 5-июндиз Кьасумхуьруьн (гила Ст1ал Сулейманан)райондин Асалдхуьре дидедиз хьана.Шихид хуьруьн юкьван школа акьалт1арна,ам ДГУ-дин филфакдик экеч1на.Армияда къуллугъна.Ахпа Испикрин ва Шихид хуьруьн юкьван школайра муаллим яз, директордин заместитель яз к1валахна.Гьа са вахтунда ам писатель ва шаир язни машгьур хьана.И йисара ада 9 ктаб чапна: "Куьредин билбил","Мехъер", "Уьмуьрдин декьикьаяр", "Куьреда аламатар","Хкягъай эсерар", "Большевик" ва шииррин к1ват1алар "Зун рик1 я","Шаирдин рик1", урусдалди "Зов души".
  Идалай гъейри республикадин газетра ва журналра адан гьикаяяр мукьвал-мукьвал акъатиз хьана.Районда сифте яз культурадин центр "Куьредин ярар" ва и т1вар алай газет акъудун патал кьил кутурдини гьам я.
   1976-йисалай 1998-йисалди ада школадин аялрин куьмекни галаз 1000 -далай гзаф халкьдин манияр к1ват1на. Амма абур чап авун ва халкьдихъ агакьарун лап  четин  хьанва. Ктабар акъуддай идараяр агал хьана, кьилдин ксарин чапханайра гзаф багьа тирвиляй гьазурнавай ктаб акъудиз хьанач. Спонсорар авач. И ктаб хсуси автордин ктаб туш, халкьдихъ агакьарун патал гьар са лезги райондиз100 ктаб кьванни агакьарун чарасуз я.Иниз килигна, ктаб т1имил тираж аваз чапнава, эгер халкьдин эсеррин къадир авай спонсор хьайит1а, тираж артухариз жеда. Ктаб  "Халкьдин руьгьдин гевгьерар" т1вар алаз "Дагъустан " издательствода !00 экземпдяр чапна.