Нинидин хъвер

  (Гьикая)
  ( Аялар патал)

Футболдин ц1ийи тупни къачуна,Самед хуьруьн кьилихъ галай ч1урал физвай.Гьеле тарсара амаз меслят хьайивал, къе кьве ирид лагьай классрин гадаяр чеб чпихъ галаз
футбол къугъвадайвал тир.Самеда фидай рекьени 7-б классдин варариз туп гьик1 ядат1а, лугьуз фикирзавай.Ингье, ам къубудал алай гъвеч1и муькъвелайни эляч1на, амма исятда жедай акъажунрин гьевесди лувар кутунвай ада муькъвел нини къужахда кьуна акъвазнавай гъвеч1и рушни кьат1уннач.
    Самед,туп чилел вегьена, ам к1вачи ягъиз гьазур хьанвайла, адаз к1евиз шехьзавай рушан ван атана. Элкъвена килигайла,адаз вич атай к1арасдин муькъвел гъилери чахчахар кьуна алай чкадал хкадариз шехьзавай руш акуна.Ада  са низ ят1ани эверзавай ва къубудин рагъул циз килигзавай.

   Самедкьве рик1ин яз акъваз хьана.Са патахъай адази руш вучиз шехьзават1а чириз ва адаз куьмек гуз к1анзавай, муькуь патахъай ада вичин юлдашрин патав физ тади ийизвай. И арада муькъвел алай руш мадни к1евиз шехьна. Гила адан гафарин ванни къвезвай: "Чан зи Света, вун гьиниз я, зи Света?"
 
    -Яраб им вуж ят1а къубудиз аватайди,-фикирна Самеда ва анихъ чукурна фена.Адаз къубудай агъуз алчуд жез, гагь кьил,гагьни гъил хкатиз ци тухузвай аял акуна.Ада гьасятда къубудиз хкадарна, ци тухузвай аялдихъагакьарна ва ам гъил кьуна ялна.Вичин къужадиз нини атайла, гада аламат хьана амукьна.

   Рагъул цяй къерехдиз экъеч1ай ам вичин "кьегьалвилел" хъуьрена: -Батмиш жезвайди къутармишна, идай ваз медални гана к1анда!
   Сивиз яд фена пис хьанвайда хьиз, ниниди вилер акьалнавай.Самеда нини инихъ
анихъ юзурна яд ич1ирна,амма лил квай яд галукьнавай нинидин вилер ахъа жезвачир.

   -Вун ни гатана? Заз къалур кван ам!-бирдан ажугълу ва векъи ван акъатна.Гададин рушан патав дишегьли атайди акуна.Самед нини гваз муькъвел фена.
Руш шехьзамачир.
  -Вун вучиз шехьзава? - силис тухузвай дидеди.-Тахьайт1а вун и гадади янани?
  -Ваъ,- рик1 хъуткъуниз, жаваб гана руша.Зи Света къубудиз аватна, Ам ци тухвана...
   
   -Ингье ви Света,- лагьана Самеда.- За ам цивай вахчуна. Анжах мад муькъвел къугъвамир.
   -Лиля,нини вахчуна, к1вализ хъша,-буйругъна дидеди, амма Лилядиз хъфиз к1анзавачир, ам вичин нини къутармишай гададиз килигзавай.Белки адаз и легьзеда Самед бадедин махарик квай гьамиша гьахъ гвай,к1еве гьатайбурузкуьмек гудай пагьливан хьиз авай жеди.
   "Амма дидеди адаз чухсагъул вучиз лагьанач?"  Руш дидедин вилериз килигна.Амма адаз разивилин са лишанни акунач.
    -Мад вуч хьана?Хъша кван к1вализ! -хъел кваз лагьана дидеди.
    - И гадади зи нини къутармишна,- лагьана Лиляди.
     -"Нини къутармишна"... ч1алар ахъайна аялдин дидеди. Гьуьле батмиш жезвай инсан къутармишнани, вуч авуни? Хуьлез аватай нини вахчуна. Хьурай ман.Чна а гададиз вичи авур хъсанвиляй са къимет гуда.
     -Гьихьтин къимет?- жузуна Лиляди.
     -Ваз къенфетар к1андани ,гада?
     -Ваъ,- куьрелди лагьана гадади.
     - Бес ваз вуч к1анзава?
      -Заз квевай са зат1ни.За хъсанвилер маса гузвайди туш.
Самед рушаз ва адан къужахда авай нинидиз килигна Гила нинидин вилерин кьекьебар аста-аста хкаж жезвай. на лугьуда адал гила чан хквезвай. Лиляни нинидиз килигна.Ниниди вилер ахъайна. Ак1 хьана хьи, на лугьуди нинидин чиниз экв аватна ва хъвер ийизва.Лиляни Самед чеб чпиз килигна ва абурун чинрални мили хъвер акьалтна.
   -Вуна лагь, регъуь жемир, за ви къимет агакьарда, алатзавачир дишегьли.
   -Зи хъсанвилин къимет захъ агакьна, -лагьана, Самед Лилядиз гъил юзуриз, ч1урахъди фена.