Лебталалра г1ях1деш - гьарилла г1ях1деш

Савли хIянчиличи рукьес хъулирад дурарулхъулри, лифт бузули ахIенри, уряхIихъути ганзухъуни хIеруди агарли няслири. Гьаланачи пикри бакIиб, бицили иш квартира, декIарли биштIаси биалра юрт белшес гIяхIсири кьалли. ГIур цархIил пикри уркIиличи бакIиб: «Иш юртлизиб хIербирути адамти лебилра давлачеббиахъа, илдала лебталалра квартираби чус дигуливан сагадарахъес имканти акIахъа, илаб хIербирути хъалибаргуни талихIчеббара, гIур лебталалра цахIнарти ганзухъуначира ярга баахъа, илдира сагадарахъа, лифт мяхIкамбарахъес халаталара биштIаталара гIякьлура биахъа, ЧевяхIси Аллагь», - рикIулри набзи ну. Илди пикрумани уркIи шалабариб, гIяхIси хIяйчир маршруткаличи кариира.


Шагьарлантани балуливан, савли адамти хIянчиличи аркьуси замана, тIашкайзесалра мер агарли, маршруткаби халкьли дицIили дирар. Ну шагьарла жагьилтала чеблалиурра, гьачамалра тIашли хIянчиличи раахъес илдани хIературра, харчбизурли кариахъес мер бирули бирар, дунъяла лерилра гIяхIдешунази Аллагьли кабатаб саби. Адамтас диргалахIерулхъули, ну-регIси машиналичир рашес гIяхIсири, пикрирухъунра гьаланачи, гIур уркIила бакIиб, лебилра маршруткабачиб башути адамти чула машинабачиб башалли, илди шагьарла духIна кахIедурцар, лебталалра машинабас дирути харжани имцIадирар, паргъатли хIянчила мерличи баэсила мерличиб, гьунчила пикрибикIули бумсар. Гьарли-марли гIяхIли бири, маршруткабала бегIти чус лябкьуси хайриличила пикрихIебикIули, адамтас гIяхIти шуртIри акIахъниличила пикрибикIути биалри, илхIели чула маршруткабира жявли дуркьхIедири, машинабала шофёртира бижгурли, бамсурли ахIи, ряхIятли бири, халкьра кьанхIебиубли, гIяхIси хIяйчиб чус хIяжатси мерличи бии. Илди пикруманира уркIи разибирахъули саби.


Дурхъати машинабачи кабиили, вегIагартиван урцIадиубти шагьарла гьундурачибад бетсадбулхъули, ахъти хIярибала гIела дигIяндарибти, жагати юртанази, чула хъалибаргуначи чарбирули саби, бахълис гIяхIдешуни дарес имканти лерти баркьудила адамти, хIукуматла хIякимти. БусягIятла замана, нуша хIердируси хIякьикьатлизир, илдала баркьуди марбарести далилти даргес вирар, сенахIенну чус гIяхIдеш агарси мерличибра, цархIиллис вай барес дигути адамти лебни, гIямрула хIекьдеш саби. Илдигъунтазибад сахъдеш бирули делшунти сари, юртани алавти ахъти хIяриби, амма дигахъира, гъамсигъуна челябкьлализиб, яшавла даража хIясибли цабехIлизибад итдилти адамти декIарбирути «къалурби» тIашхIедалтули, лебтасалра багаладирути гьундури сагадируси, къулайдируси замана бакIили.


Гьари лебтанилра пикрибарая, ургъули, дирглуми дирули, чис-биалра вайдеш биахъес пикриикIухIели ункъли бирару адамлис? ГIяхIти пикрумачил, гIяхIдеш булгули, цархIиллис биубси гIяхIличи разиирули виалли ункъли ахIену?
Ну Совет хIукуматла замана халараибсира. Ит замана халкьлис гIяхIдеш биахъес дакIударибти дахъал секIал лертири: лайикьти шуртIри акIахъубли, матъал лугуси школала, санигIятла, чебяхIси даражала багьуди, белчIуди хъараахъурсилис хIянчила мер гIеббурцни, узуси адамлис матъал лугуси квартира, цIакьси улка ва  гIуррара дахъал цархIилтира гIяхIдешуни.
Совет хIукуматлизиб бузахъули лебсири социалист абзра, (соревнование), цаличирад итилли дахъал ниъ дирзес дояркаби, мукьри имцIали сархес букIуни, се- биалра дуракайути заводуни, фабрикаби цаличир итил гьаладикес абздикIутири.


Цаличивад итил чедиикес адам абзлизи калзути пикруми, итхIейчирад дуркьхIедиубли, жамигIятла гIямрулизир гьаннара лерал или гьанбиркули саби. Итичивра ну чевяхIсира бикIути адамтала, пикрумани сари жамигIятла ургар разиагардешуни алкIахъути.


Бусурман диннизиб бурили саби, Адам Идбагличибра ну гIяхIсира, чебяхIсира бикIуси шайтIайчи Аллагьли нягIнабушибси биъниличила. Иличибли багьесли саби, итичивра ну гIяхIсира, ну хъярхъсира, ну пагьмучевсира викIуси адамла селра гьалабяхI башуси хIебиъни. Адамтас, гьариллис Аллагьли сунела кьисмат белкIи саби, иличибра имцIякьси, чилилра селра сархес хIейруси виъни хIекьдеш саби.
Камси манзиллис гIяхIливан дакIибтира нуша, иш тамашала, караматла, жагаси дунъяличи, ил гIелаб батурли лерилра аркьутира. Иш дунъяличиб гьарилли барибси гIяхIдеш, гIяхIси гъай, гIяхIси пикри Аллагьли чебиули саби.


Ну риштIахIели, нешла хала нешли бурусири: «Гьарил акIубси адамлис Аллагьли кIел малаик бурхьути саби, барибси гIяхIсира вайсира, малаикуни лукIуси саби». «Лебилра адамтала дирути ва дурути делкIес малаикуналара имкан хIебикIур», - пикририкIусири ну, школализир ручIуси замана. Гьанна биалли, дунъяла адамтани компьютертира, телефонтира дакIударибхIели, Дурхъаси Аллагьла малаикунани адамтала гъайра, баркьудира ахIенну, уркIиличирти пикрумира далули ва лукIули биъниличи рирхулра. Ил багьандан саби, - «Кири гьарил гIяхIси пикрилис лукIуси саби» (воздаётся за намерение) бикIути.
Нура декIар илцадра гIяхIси сарра или, илкьяйда рикIуси ахIенра, дунъяла адамти чеббулкIахъуси шайтIай набчира гьамадли гьуни бургули бирар. Амма нуни бараслира, цархIилли баралра, гьарил гIяхIдешра, бурибси девра, пикрира Аллагьли чебиуси саби ва гьарилла кьисматла жузлизи лукIуси саби. Барибси вайдешра, кьисматла табтарлизи белкIи кавлуси саби.


Гьачам–кIина, Аллагь багьандан бирулра рикIули, ну хIеррируси юртла подъезд бушкили, бирцили умубарибсири. Гьанна гIяхIцад замана ил наб умубарес бикили ахIен, цархIилтанира умубирули биэс гIягIнили саби. ХIебиалли адамтани гIяхIси секIал гIебисули саби. Аллагь багьандан се баралра, илкIун чус саби барибси. 


Гьаннала замана, бахъал адамти давлачеббиэс хьулбикIули саби. Нуни гIямрулизиб пикрибарни хIясибли, нясси шагьарлизи, юртлизи, подъездлизи, квартирализи арцра давлара хьурахIедирар. Дахъал арц дикахъес гьариллис имканхIебикIуси биалра, вегI хIерируси мерличиб умудеш биахъес гьарилличи чебси ва  имкан бикIуси саби. «Умудеш – Аллагьличи вирхнила байхъала саби», - бурули саби бусурман диннизибра. Умудешличил, хIялалдешличил дарх, гьарил мерличи давлара баракатра хьурадирути сари или пикририкIулра.


Гьарил бархIи гIяхIти пикруми уркIиличирли хIердиабая, лерилра Аллагьли мяхIкамдарабая.