***

Хьулани секьяйда детурхули
Арбякьунси жумягIлизиб Роcсиялизиб СМИ-бас ва илкьяйдали лебилра халкьлис дебали тамашабизеси анцIбукь кабикиб, улкала Президент В.В.Путинни Дербентлизирадси риштIаси рурси сунела кабинетлизир кьабулрариб.


Иш гьакIлизив Президент В.В.Путин улкала халкьлис ва лебилра дунъялис, дурхIнала уркIи иргъуси хала дудеш сайливан гьалаизур.


Июньна 28-личив, Дербентлизи гIяхIладли вакIибхIели, В.В.Путин урхьула дублабси парклизив, сунела уркIила жиличил, хабарагарли шагьарла халкьличил гьуниваибсири. Улкала Президентличи, Дагъистанна хьунул адамтала дигила ва хIурматла хIялани, чилилра диргIядиргес хIедирути видеокамерабани, лебилра дунъялизи чедаахъибтири. Гьайгьайрагу нушала Президентра дунъяла адам сай, илис гIяхIбизур, сегъуналра сай лявкьниличи хIядурдеш агаркъира, Дербентла халкьли сунела хIурматбарни.


Президентличил гьунираэс бетхIеурли рисуси рурси чераахъибхIели, В.В.Путинни иличил гьуниваэс замана баргиб, ва Дербентлизирадси Раисат сунечи гIяхIладли жирариб.


Улкала тах шагьарлизир, Москвала Кремльлизир тамашала анцIбукьуни кадикиб. РиштIаси рурси Президент кайруси уталичи карииб, ва Россияла Правительствола Председательличил, Финансунала Министрличил гъайкарухъун.
Улкала Президентли Дербент шагьар гьатIира жагабиахъес багьандан 5 миллигIярд къуруш арцла декIардариб, ва Раисат Акиповала уличирли, рурси акIубси ва хIеррируси шагьарлис савгъатдариб.


Раисатлис ва илала бегIтас улкала Президент В.В.Путинни гIяхIти гIяхIялдеш дариб. Лебил дунъяла улкнас бекIдеш дирути адамти кьабулбируси стол-алав кабатурли илдачил ихтилатбариб, чяйла бержиб.


Президентличил гьунираибхIели Раисат, тяп илкьяйда биэс гIягIнисиван вяшрикIулри, рухIнарухъунхIели рурси дуцIрухъун, сунела хала дудешличиван Президентличи хъябруцрикиб, ил викIуси бирули уталичи карииб, сунечил гъайбикIутас, чилилра гIебхIебурили биалра, баркалла багьахъур. Буралли, бегIти паргъатагарлири, биалра илданира В.В.Путинна гIяхIялдеш хIурматличил кьабулдариб.


Рурсила дудеш ГIяхIмад Акиповли гьарилра шайчивад сунени улкала Президент гIеввурцули виъниличила буриб ва сунела рурсила хьул бетерхахънилис баркалла багьахъур.


ГIяхIмад Акиповли гIяхIладли аркьухIели, гIярбукIла някьишли белкIунси, цIуба арцлизибад барибси урчила лутIи, Президентла КIялгIялизиб баракат калахъес багьандан, савгъатбариб.


Президентлира Раисат Акиповас, 5 миллигIярд къуруш арцла дурабад, жагаси чяйла сервиз савгъатбариб. Рурси шери редлугухIели илис бедес, бегIла дурхъаси савгъатван сервиз ахIерабарес бегIтани чесиб.
Раисат Акиповала бегIти Кубачила шилизибадти дарганти биъниличила чинабалра гьанбушибси ахIенри.


Москвализирад, бегIтачил Раисат хъули чаррулхъухIели, бахъал СМИ-бала журналистуначил рарх, нура гьунираира.


Илала бегIти дарганти, кубачиланти, биъни нуни гIячихъли балули ахIенри. Раисатла неш Култум Акиповачил ихтилатбарибхIели багьурра, ил Кубачир акIубси ва халараибси риъни. Илини Кубачила шилизибси урга даражала школа таманбарибси саби.


Култумла неш ГIяйша Кьасумова нуни ардякьунти даршдусла 70-ибти дусмазир, школализир ручIухIейчирад ралуси сари. Раисат Акиповала дудешла хала неш, ГIяйша Айдиева дахъал дусмазир Кубачила школала библиотекала заведующаяли рузусири. Илини гIердурули, набзи чумилра гIяхIти жуз делчIахъун. Илкьяйдали дунъяличир лерил секIал дархдаси сари. Раисатла нешлизи нуни кIел суалцун хьардаира, гьунчирси хьунул адам дахъал суалтачил инжитрарес лайикьли ахIенри.


- Гьамадсирив улкала Президентла хIянчи?


- Дила пикрили хIянчи гьамадси ахIенри, илис гьарил минутлизив, сунечила пикрихIейкIули улкаличила пикриикIес гIягIнилири.


- Детурхутирив хIушала рурсила лерилра пикруми-кьасани?


- Дила пикрили, гьаннала гIергъи лерилра хьулани детурхар. Нушанира, диубси тяхIярли, илала хьулани, кьасани детерхахъес къайгъибирусири.
Иш гьакIлисра, генетикара, рурсила хала бегIтира гьанбушасли бархьсили бетарар. Нуни балути, Раисатла кIелра хала неш, даргантани бучIуси далайла дугьбачил сипатбарес вирар.


«Ахъ хIурхъазир цIа лерли,
ЦIа агарли хIевъанти,
ХьанцI урхьназир шин лерли,
Шин агарли хIевъанти».

Илдачи мешуси ретаурли рургар риштIаси Раисатра. Президентличил гьунихIераили паргъатриэс илис дигули ахIенри.


Кубачила шира, кубачилантала устадешра лебилра дунъяличир итира машгьурти сари. Россияла телевидениела цаибил каналла алхIят бархIила сагати хабуртазиб, Кубачила буркьхIебируси гIядатла, цIуба кIазани бекIличи чедяхъибти Раисат Акиповала кIелра хала неш лебилра дунъяли чебаиб ва хIясиббариб.


Мурхьси тарих, халаси культура, ахъти устадеш, гIямруличи бирхауди лебти хъалибаргуназиб халабиули бирар Раисатгъунти хьулани лерти, ва илди детурхахъути дурхIни. Дунъяличиб селра ца ити бетаруси ахIен, гьарил анцIбукьла сунела мягIна лебси саби.


Раисат Акиповалаван гьардилзаб лебилра улкала дурхIнала хьулани ва пикруми. Ил сабигу, дунъяла адамтасра гIягIниси. Бетаурси гьунибаънили гIяхIти сагадешуни алкIахъниличи рирхулра. РиштIаси Раисатлис гIуррара сунела шагьарлис, республикалис, улкалис багаласили ретаэс дигули сари. Илкьяйдали, сунела хала нешанала минала, Кубачила шилисра. Бахъал халкьла ургар машгьурриубси рурси, илала бегIти, тухумти Аллагьли ахIерабараб.