Карим

                Вигьаала

Ей хабар, юлдаще, дудиль либиль гьантабаччибзибсаб. ДибалачIу налла гьантабаччи ливалда. Яхле сизибкIа бухая щилля дибала мишибакьиттая, яра инсанна, яра кьамла, яра тухумла, бульхIина ищи, ильттажикаттала гьаибзиб асабла. Сал дуналциб, салте улциль агузиб хабар саб ей.

КIена пизикIалла астранумиялла гIильму бахужуб уй букIай, ниссиля духужуд салте дуная лиджудсад букIай ххяль. Квашуд лидиль Аллагьли бакIу, амма литтухи биккулсаб. Налли нате сал дуналциб агуузиб дикьле диля бикIицце гьаччиб, дудиль катижибжуд сад.
  Сили катигулдин дукIаххаттале, силикIунулла ниссиля гIугъбуглая литиратура липпухахъи. Дамми салтажжи гIях кабижи бакIудихьле ада. Салтаддиль кададигудихьле да, гьаре йитта ажеллясаб, ухубдикьле каттижиля гьаре укIул, ниссиля гъайя каттильгахъи, нахттазиб бухая литературая гьаттакIвахъи, нисиля кубла. Яхле дурусаквал каттижибжуд гъай тадахъяле, гьакал гIяиб бикьмекьитта, каминтариялцце кабга, кIихьтте кIихьтте дурусле асаб, кIикIиттабихва гьаиб.
  Хабар хвалазибсаб, налла нахе бутIа акважиля кабжибзиб асаб Хина вевидихьулда. ХIядурдихь хIясибле бутIне каттищиля яне каналлиже. Гьиба либиль ттабидагъилле китабъя ттаагъи пикре либ, Аллагь гьикалаухале.

                Карим

  Гьанище шагьарриб ужи гъамаква буцIедищадиль, яниб щильцциб паксиб гьавалтаб, бегвала чибинччулигьали, иттуб дикьле асаб. Нисабал тIулутIъя, са шинна шушая кьуцIуриль бинкабищиб, ттавичибзив, кук кканцле видагулсав Карим, таме гьантасабчибзиб нахъ бахкви укIул.
  Хьуне хваллелихьали, дгIарххе бигъналли висагъилля ибле. Щилля биттахъсиб мудалщу видагъибжиля, хьайщильже кьякьчикитун, аттахъалла хъулбе дихккул никIалла ташвиццул киццул: “Ихттея далчидакьиля укIул гьардус пикре бикьид, синнагьия тидалкьатте” ибле пикре укIильже сабеххул савъя, тIашвиццулсав никIалла.
  “Аллагьикьала ухале, гьибадускьеле, хъалтала илляй циль чикабтIи биккулсаб, шин диндагьул вибкабеттильтаб” укIул, хьунебяйле ччурвижиб кканц гьалакдакьиб лаквищибсав. Чикабинччузиб бегвалалдиль бара муржухуб, шушанал квише шинъя деччиб савъя видаагулсав: “Бухъин кьуллалщу чикагъадаже шин чаатакьилялсад, ихттуб гьиба шинне бицIиля” - ибле.
  Гьирбидичиб щея тесабадильган бухуб, катссиб бяйя акьибсавъя, чум сяхIятI духубва укIул тилипун бихккузив, либаквал баччибсав. Кисана иттуяне хаххамукIул бахккубсав, либаква.
 “Агь, синна ахирзябакь, те чаханте чаахи милькьа гьабалчи, такваннабзиб гуталже кабищибзив, хьуметул катильгунсаб”. “Гьуква, кашке, селля бухая тилипукн аквалдикIель агагузиби” укIул, гьакIвидичибсав. “Бухъин кьулла, дахъе чачIулдиль няхъ чикаттаккакквал, абдубинибакьаквал, батилляй хибалва шинне бицIиб” -ибле пикре укIул ужибсав, вахьугьия. “ Их балчибакьизив гьаттахъилял авхи” ибле укIильже сабехулсаб.

“ЦIацциб дуна асаби” -пикре укIибсав, видугугьия - “ЧакIа бахквиттея, щильцциб паклесаб, валлагь янив хIирвихви бужялялде, букIулбихва. Динисакьиня гье гьаале, яниб се бикьул кигузивну букIул бебидихьу”. ХIясиб бакьале ихталлая дуруссибсаб. Саматли янив хIирвихви, щильццив гьаттакIузивличIу, шагьарриццив гьаттакIузив Каримли аквану. АбдикIнелля пакдихь, щатлуме, сухIбате, дахъе дугага, ибхьнилля ццабла шинбал, дихьвля вгIяз, ганилля духIе.
  Газ илляй чисачиб гIяхле саб, аквал ганили усул дикьи бала бихве. Илъя гьеч, гIяче либаквал аваралццибсаб уй. Тиджублия дакьиб хвалле пейда дикьель кабахьули. Диси дикъасатикъантаддисаб гьиссилли ас калугун, викьузивли асабну. “Викьул инсан авдан вихехва” букIул хIязли гьаибзиби. Налли нгIяхъля гIяче бакьи биккужубъя камлесаб, дисасаттикъи, ариш-баришицце винкахъия гьариль вихуласав. Къахъбинигьабеххвадаже викьул кигуи инсан гIяхле ас чисабадахьаххан.
  Вякьун шагьаррицив таксили викьул квегьатте хвалле бикаххан. Яра нагъле ас гьалуккунзиб гIянчча-къакъалла гIяче бакьи агумутиль. Налтта пикре укIул видаагулсав Карим. “Са сахIатилля гьасиб хьуне тибал, дурусле гIукьун ухулле”. Дурусле гьаиб щильцциб гьабхубжублидикьле хьунбея дакIуладе Каримли,
  Те бара гьантибалде викIамутиль аттациля бякьун, акIвла къаттабзиб нахъ бахви букIул. Налли сагъуннекIа бухая баччиля ибле ттавичибзивде иль.

  Хьурбишле гIяхлелихьали, гьанищилля буцIезиб бегвалая биихул, дикьажиб дикьле, лакицце вашия саматле абихул, мгIигялагьабяхъе Каримля къахъ. Абала юцце гьантайдиче или: “Къахъ мигяля гьабахъибну, видахену кказат ваабигьа, ицан вихвану” - юкIул алав ччурегъе сайигузий.
  Айчийиццул, юцциля гал вехеххахъи. “ГIяпябикьаб, гIяхчибюкьяб” -укIулъя гьаиб савъя, бара кканц багьла дакьибсав: “Йитта вахьаххад, ахъре багъвилялда” - ибле. СагъуннекIа бухая ахъиб лакъя, кат букьунзиб хьуниже кагъибсав.
  Хьуне гьаия гъамакве или - тамаллазиб тIаже, на либиль кьайлебал, ттутмад бачIиб, гужле тиксабикулде кканц кабицци мусса, чачIу уй бахьахьалалдиль.Талал уусул дакьи бухая бахьул тIаже калугунде, на сикIалли газтея чисачибдиихул, уусул дажижубли машинтациля усулъя саттикул, тIаже кьайле бачIибде.

  Алава чивгьулсав Карим сечIузиб муссаилляй гьантасабикуиль укIул, сечIу гьантибалаква, ей хьунедиль, адиль. “Сал хьунея либабхибда яниб”- ибле, бахьлал каттвищибсав.

  НикIалла духубжиля акIвла тIама сабикьан бухуб “На абхале, дурусле гIукьун ужибда” ибле, цихъчавхубсав иль.

“КIена кьуллакад баччи бухадиль” - ибле алава чивгьибсав. Чинаб букIузибну, гIябцIал-агъвцIалдустал сухъ бахккубзиб кьулла.
  Чинабиль ахху акIвищу чикигънаб бихвилля гьантибал йили, амма якьинне чинабиль, Аллагьли бакIу. “Арин баччидакьа” ибле, синна синдиль укIея бакьиб, итту-яне чивгьул умцIивсав. Битъя ваше, сатъя ваше, са вахтла тедидижин или тутталла гъулбажжид каттимхъул декьибжуд чахъвналла бутIне.

  Каримля бикIицциб суратдикьле даквебачIиб табажи, сав аттациля видаагул, аттадиль тасабикIул масла бутIнад чибиццибзиб ттутта: “Нахтта масла бутIне читтильхун бихве эбзиб муссалжиб бикIузиб ттутталже” -укIул - “Бара тиниб кьуллая тибзибсаб”.

  “Бара тиниб кьуллая тибзибсаб, бара тиниб кьуллая тибзибсаб” - бикIицциб аттала тIама бучIунсаб. Иялдикьле, саб кьулла гьанлибал Каримли, амма кучиннабдиль гьантибилаква. КIве гIяб кканцла тинвидухуб чивгьулсав: ттутме дачIиб, гъулбаддиль сечIу тесабильгуннасаб.
 “Гьаре теттуб гъулбалла уччиб бара бинигьабикIул кьулалла чибкаттагала асаби” - укIул, тавякьюнсав. Саб, кьулласабI Алавжуд кьайлебал гъулбаддиль виибищиб.

 “Гьу, гьара, нахе кьуллая. ХIялляляй, дачIибжуд кьай дахкваква” -укIул синна синце, бара агуудикьле кьуллалщу чивдухъи мусса бикьи чикеххулсав Карим. Чиидахъуб ухубжуд ттутналла кьяльмея, вигьаттеттиб кьайя, таукьи мусса агахъулсав.

  Талал гIяхле шинне бицIибзиб кьулла, на шинъя камле дужибсад. Камлелихьали, битунне диниддегъваквал дужибилляй щукур Аллагьицце укIул, гьаттицIизиб бихккул, алава кьякьвильтун, сечIу баккаквал, квашлицциля гьаттиицIул, пакле муржакьибсав. Щулиб бикIузиб тутталла пяххута кижиб бикIал ниссабал ттулутициляя укун, никIалла ваццалаахъадаже ужибсав.
 “Кена баракад акIвищу чикавхъанне, нахъя хибзибсаб. Бахккуб ихъя, никIалла ужиб, акIвла шинницид тгIюмея чиидисиб пакле рахIатдухахъи, дуя гьиба чарвидухилля” - укIул пикре укIибсав.

  Их нахъ дикIель сили бажильдин ихи дукIаххаттале уща, ихттуд ласижид тамалла дуъла улдиль каттижибжуд суурате хидле дужибсад. ДикIе дикIежуд жанаварте, уй, накьище. Няхъицце хустея квилле, гIяяр букьюнжуб уй, угдекка ихьужуб уй. Ид аттациля сакьюнмутиль суратчикаттюхъюзиб либакве ильттацциб.
  Ильтте чинаддин идмутиль. Иял пакле тилипунницциля сурате чиикаттахъиля ибле сакьюнзив инсанде ей. На тилипунъя кьилиб кьуметужиля гьибая чиикаттахъи ажажи ибле укIе згIябихехваи. ГIяхле липпихва гьабкIул, ттавиикузив инсаннице “чина гIукьундин” гьабадукIа букIул - “куда ты собрался” - юкIул гьабицахъай хьунуллидиль, ттавикул тевидигун адаме.

 –Ягъариб, ицце чумжина гьаадну, чина гIукьундин гьабадукIа, ттавикузив инсанницце. ГIяххе агага.–Это бабушкины сказки я в них не верю!” - хIяхIя юкIул кейци хьунулъя. “Нахе итти “не верю” ажи кIена” - ибле хьунуллия хIясиухе кIена Каримъя.

  Пикре пикре бакьале синжибъя гIяяб чиблибле аагулсаб, ттавичи гьалакле, гIяхле хIясиб бакьаквал тилипун бишабалчундаиль. Синжибзиб гIяяб, хьунуллиже чибдихьул ильдилья.

  Тамашаллажуб уйсаб уцце хьуннея. Масала бацтал агва сикабха ассиля гьаибзиб, кьуметиллясаб, дустал хIясиухубмутиль гьаибзиб гъай хъуметакквал гьантасахьвилялсаб, гье дгIарххе “Ччавал ттавикулда” гьаибзиб, чаваллали хъуметул “Куда собрался” юкIай. СечIу авкIуд валлагь.

  На агуузиб агулсаб, сакьюнжиля нахъя бааччи биккулсаб укIул, баракад акIвищу чиикавхъунсав иль. Их нахъ хIясибле бара лакле винигьавхъанне тамаллажуд мящилля каттичибжуд хъулбалла каттильгунжуд гъягъяйя тиджудилля гьанлибалде Каримли.
  Ихту мящнащу чавхъи пикре либакве йилля, идмутиль аттациляя чаабхъунжуб адену. Ихталла дибалачIу гьантибалакве аттай, ча уй хIирбихул каттильгунжубиль аквану. Ильттажуд мусне камли щилля алавъя, алавжуд шумаццидъя. Вахтъя бидажи, уйя бидажи, чадиль, седиль, чийбакIуну на.

  КIвишекад шинъя деччиб, кьулалла шинне шушая бициб савъя, тесабильгунзиб тIажея бусиб, гьакIвидиче на Карим. Хвалле аквит хьуне ахъибжиля, хъаива кьякьвидитIунзив - тесабильгун нахъ. Аъбахъунзиб инсанна муледикьле мудалла бгIяйижиб.

  ПгIяхъярбукIул битул укIея савъя, нахъ баччиб цихъчавхуб дихьледиль, яра ваццудихьледиль, кицци Карим нахълиже чивгьул. “Баккад гье”I Ваццудихья битузиб укIея хъуметул Карим, видахгIиб чгIаххюл нахъищу гьагъе. НаахеI Нахижимат ттавичивзивдеI “Уф, цIатIле битулаквай укIе.
  Сигь чаттихъуласаб кьанну”.+ Иялдикьле гьантавдиче Каримли атта: “Бахьлал, бахьлал, диля гал, гьалак вихмехут, хухкижиб акIвла къатта вашилялдену, бахьлал. Сухъ диля сихьтегьабатаже тIашкицци” - укIул ливвихве.

  –“Ду кьеле аццечIу ваццадид, атта”.

  – “Иля вахтла дуя уццул авихвад уртахъ” - укIул вихве атта

  “Диля бухузиб вахт, типпихвева аттала” -ибле вихве Карим - “Иля вахт сили укIайва”. Аттая викIагалмууттиллязиб вахт липпихвайля пикречIу бидуххул абихве Каримля бикIице. КIе атта, кIе атта, хвалажуд нюхъбея, гIячиль викьалалдиль судурте чидагужуд ттуппея, ахъссиб ххамххая савъя.
  Чум дус духубну идижиля гьаре? Идмутиль Карим агъхв-хьудус ухуб ухилялде, атта хьуцIанухьва. Синна уццузиб вахтъя сабагъе кIена Каримля. КIена бульхIин вахтла мягIнея, ваццудихьля мягIнея.

  Гьар гьарилля вахт, “караматзив Аллахь” - синна абала юцце юкIудикьле. ГIябцIанувея дус дидагулсад гье, сса дикьле декьанну.

  НикIалла сигь багьлабухадаже киццул, нахъла алавжуд къухънея дихккул киццул, пикре укIуибсав Карим. “Чидиль, се вахтла бакьибзиб нахъ бухи биккулну ей? Ей нахъ либле сикIал щилля ули бакIулихьали, чачIу архиулугте бихва, яра саква гIильмулла уй бихва, чачIу садакьин, бахкви, букъи, хIясиб бакьи. СикIал Чуулибсаб, сикIал ас Чууле дгIяягъибсад”.
   ЦIутель нахъла букIиляя тесабильгунлиб, буххузиб гIавая бинисабахьул сабъя. Кисанабзиб бикIазиб нгIяхъля чагъя бинигьабалчун, винавхъунсав Карим. ДацIжуд шушне, гIярякьлябал шинна мусса-муссанад лид видгIехиб. Буки буччи уй сабахьул тгIахIарсаб, амма чула бгIичча аванажикьеле бакIуласаб.
   Чибаащиб чагъя бара укIе винавхъунсав ей. “Гьу, нахе талабзиб хъал бухи, бара тинид сащанид, салтея винавхъи кIве гIяб хъал тиджудде”. Иттуяне чагъ чибухьул суратадди унцIул Карим, муданад бикIазиб шинна тум тебидижин.
  “Вагь, талал лидадихвеква янид сечIжуд шин ибле” актавдухубсав. Ласицциб бикIазиб тгIякь. ТгIякьлиль багьлал динигьаттахьул шин. Сагъунне агузибиль ей? Ккуццин дакьун агузиб тгIякь бухилялсабла щаквичибсав Карим. Хвалазиб шинна тумицциль тикбичиб сал хьуне баччиб ттадичибсад йиштте.
  Гьяхлеква гье, шушанаджуд шин гьаттехвале, кьуллалщу вгIякьаквит, яниль деччи аагул. Шушалла пильтта чигьабалччун, багьлал, дааххахахъи, гьаттицIиб тIимля дахккубсав. Хъямле асад деччи, тIим хъямзиб асаб.

  “Итте ласижиджуд сурате сидхева, чидгIущиб абхале сабахьужуб улдиль” - укIул алава чивгьибсав. Гьу, нахтте, даккад. ГIяле актавдухуб дихкваххан тиксаттикулсад ласижид. Нахе гIяяркьабея, хусте кватталчун. Сащаниб угдеккнациляжубъя. Гьукла кьгIяцне, ссукне, арслан-къапланте.
   Дуъла уй букIулихьали, сасабате пагь квибжубъя тибле бужибсаб. КIекI угдекка чибащибзив вахква, битIаччиб деккая кицне пакле мишиль кабжибсаб. Тебимдузиб гьукла хъяцIа бахква, гьиляба чибгьузиб бикI бахкIва, якьинне кабжибзиб хъяб бахква. МицIезиб дикьле саб валлагь.
   Талал кьацIгъунзиб рангла духилялде ильтте сурате, на хвалле вахтъя бидагул, дгIяххиб лихьали. бухъу гIянчча жанаварталла митIильциль бахбикьул бужибсаб, дикIе дикIежуд кьайя, ранг сакъи дикьле.” Агь гIяябде тилипун бишашабалчи, азив абдал адай дуя, гуталже кабищиб хъуметузив” укIул синдиль сав мимивикьул сурате дихккул ужибсав Карим.
   Виниввахьул гIябал хъал дахккубсав, гIябаннид ласубажжид, дикIе-дикIежуд сурате. Гяяркьабе, жанаварте, бара-баражуд гIяб-агъв къилля накьище.Квасиб вахт бидажииль хIясиб бакьиблясав ильдиль, амма ккушухуб щаквичибсав. Виникавхъун, кIвише дегъубжуд духужуд кьайя вигьаттеттиб, кижи муссая бакьиб, ниссая ттулуттъя динигьатталчун, уки кижибсав.
  Хьунулла абадиль базарижиб якIузий ххюльхьунулицциль ассибзиб маццала ниссая, пакссиб бецIиб ттулуттъя. Ильттажжи се гIяхссиб липпихвану дубнажживзив инсанни. Сизибиль ахху чягъазиб квгIягIкад либабхадиль, битунне кипде. КвгIягI гьаиб квгIягIчIу аде их, сеиль ахху, асаб-саб гьаи бухузибде.
   Бара чивидассале щаквикеуладе, те гIяхле ахтьарде бакьале дакIвибикIул дикIледе. “Гьуква, квгIягI дикIель себухахъилян” ибле синна къегъбакьиб уже Карим.

  Укунжиля, гьибая ужи ухаквал “Гьаре се квгIягIиль бахквиля” укIул, ахъиццул, алава ссунтIукIе. Са-са муссаниб сабикьулде квгIягI, са-са муссаниб бидихъулде. Ахирре бакIай йили их сабахьу мусса. Те шинна тум сабахьу муссанаб гьис хваледе иль. “Абхале, хех тгIякьицциль сабахьул бухилялсаб ей” укIул, хинтавдухуб гIяхле ссунтIабакьайну, бужибсаб. ТгIякьлиль сабахьулде сизибиль ахху тамашаллазиб квгIягI. “Вагь, се бухи биккулну ей, силля квгIягI бухи биккулну”? Тиксабакьи ухубласав.

  Анжилиб институтлиб бикьужуб гиолугтадди гьабильгви биккулсаб ибле, синна титте кьай викаттищиб муссана вгIякьун никIалла хъайвидахъибсав. Укунжиля бильсалая бицциль бихва укIул. Бара бильсалая бакьиб, гьиба акIвищуя чикавхъун, тгIюме нгIухъбея чидисиб, багьлал хъиль чарвидуцхилля ибле.

  Киссунгьия пикре укIул ужибсав Карим “Ча уй бухи биккулну яниб талал хIирбихужуб, се вахтдева, чум инсан либдева”?.

  Гьантабдиче или уцIран параписсурридиль гьалугунзиб хабар. Талал, те бусурман дин кабихьу вахтла, либле бужибсаб укIе их, чула щили акле, нахъубаддиб хIирбихужуб дуъла уй.

  Щилля уй катьтихюль, хIяванте дильгIюн. СикIа бикьулихьали диинниже агъи бихехул чачIуллидиль. Чула накъкъубаддиб кабжиб, чачIу акбукьгIи биихеху муссанаб.