Даргала анкъила гьайкар

ГIяхIцад дарганти сунези каберхурси «Даргала анкъи» бикIуси жамигIятла организацияли, декабрьла 3-личиб дурабуркIуси чулахъунала БархIиличил бархбасахъи, чула кьукьяла жигарла бутIакьянчи Индира ГIямаровала хIурматлис Избербашла «Фламинго» бикIуси кафелизиб жагаси гьунибаъни дураберкIиб.


«Даргала анкъи»-лизибти даргантани Индира ГIямарова саби гIяхIтили бетарахъуси сабабла гьайкарван кьабулрирули сари.


РиштIахIейчирад арадешлизир нукьсандешуни лерси Индира гьанна чумал дус «Даргала анкъи»-личил мурталра рарх сари. Илини илар дарган мез дагьур, ручIес, лукIес бурсириуб, гьанна жагати назмуртира цаладирхъули сари.
Илала хIурматлис, чула лерилра дирути датурли, гIяхIцад дарганти Избербашлизи цалабикиб, жагаси кьумур-алав кабииб, далуйти зайдухъахъун, чулахъла уркураличи (инвалидное кресло) каратурси Индира чучил делхълизи каратур, илис хасдарибти жагати дугьби дуриб, вавнала хала ва савгъатуни дедиб. Лебтанилра иличил дарх суратуни касахъиб.


Гьунибаъни, Индирала тилади хIясибли, МяхIяммад ГIямаровла сипталичил дураберкIибсири. Лебилра цалабикибтира уркIилизи гIяхIси кьас каберхахъурли гьунибаъниличи бакIилри. Лебтасалра, кьисматли дунъяла дахъал гIяхIдешуназирад мяхIрумрарибси рурсила уркIи разибарес дигулри. Гьунибаъни, гьаланачи халаси хIядурдеш агарси биалра, цалабикибтала уркIбала шаладешли, уржибсили ва шадсили бетаахъур. Цалабикибти, мурталраван, цаличи ца узи-рузи или дугьабилзулри, уркIила ванадеш барх буртIулри, устадеш хIясибли, мубаракла дугьби, далуйти зайдулхъахъулри, дарган делхъли булхъулри.


БелкIлизиб баркалла багьахъес дигулра Индирала узис ва илала гIямрула рархкьяс. Нуша Индирачил чумал сягIят сарри калунти, амма илала гIямрула шуртIри гIердурцути, мурталра иличил барх хIербирути тухумти баркаллаличи ва хIурматличи лайикьли саби. Илдира нушала мякьла кахI****урли, хатIа бетаур или гьанбиркули саби.


Халкьли бурули бирар: «Аллагьла вали левси шилизиб баракат бируси саби». Марли Индира «Даргала анкъи»-ла баракат рургар.
Илкьяйдали баракать бихусили ретааб ил сунела хъалибарглисра. Гьарил сек1ал


Аллагьли чебиуси биъни якьиндеш саби, Индирачи х1ушани дак1удирути уркIецIира ряхIмура Аллагьли хIушаб даршнали имцIадарили чардараб.


Аллагь багьандан барибси бетааб «Даргала анкъи»-ла балбуцра. Гьунибаъниличи дакIес пикрибарибтас, дакIес хIедиубли гьарахъларад бутIакьяндеш дарибтас, дигули хьалли бутIакьяндеш дарес бетхIеуртасра баркалла биаб.


Дунъяличир дахъал гIяхIдешуни кали ахIен, дунъя ахирличи гъамбикIули саби или бурули саби динна гIялимтани. ГIяхIдеш барес ибти пикрумачил адамти цалабиркули, узи-рузи или дугьабилзули, сахаватси кьумур балгахъес Аллагьли ахъри лугули биалли, дунъя ахирличи гъамбикIули ахIен, дила пикрили.


Чилалра гуж агарли, чула уркIила жиличил цалабикили, уркIби кадарцахъурли, адамти мякьла кабирули биъни, багьа бурес хIейэси дурхъадеш саби. Дурхъадеш саби илгъуна сахаватси кьумур баршили кадиэс ахъри бик1нира.


Нушала хала бегIтанира, чус-чули байрумти пикридирутири, гьаннаван кьумур гьарзали хIебиалра, уркIбала ванадешличил барх кабиэс бирутири. Нушара хала бегIтачи мешули диъни, вайси ахIен, гьалмагъуни. Лебталалра гIяхIти пикруми Аллагьли гIердуцили дигулра. Илкьяйда жагали кадирахъес лебталалра ахърира, арадешра калахъес рулгулра.