Бахатдиннге

"Ауурлукъ басханды, арыгъанма", дейсе,
Мудахлыкъны чачар мадарла излейсе,
Да, къарнашым, бошха былай сызланнганса,
Менден себеб излеб, кёзге къарагъанса.

Мен къолайсыз халгъа дерсгеча къарайма,
Аны бла чыныгъыб джолума атлайма,
Аурлукъ аудурур аны ауур кёрсенг,
Андан къоркъуб, бугъуб джарсыугъа бёленсенг.

Зор халынг бар эсе - джашауунг да барды,
Къыйналыусуз болгъан - джангыз къабыр тарды,
Хар ачыу кюнюбюз - илеучю санатды,
Бизни кючлендириб алгъа тюртген затды.

Мырды сууча, тюб - тюз тургъан джашау неди?
Эриниуден башха бизге не береди?
Зор джашау а, къыйнай джан чыныкъдырады,
Алай бла да джашар къарыу табдырады.

Келген табсызлыкъгъа ёхдем тюбериксе,
Джазыу салгъан борчну къыймай тёлериксе,
Джолунг кесилгенлей, джолсуз джюрюрюксе,
Боюн бюкмей, алай джашау этериксе.

Ол заманда санга насыб табыллыкъды,
Хорлам, сени таба, кеси атыллыкъды,
Бютеу адам санга сейир этерикди,
Деменгили, онглу, болумлу дерикди.

Джазыу джыгъылгъанны теблеб кетиученди,
Талпыннганны алгъа, джолгъа тюртюученди,
"Ауурлукъ басханды, арыгъанма" - деме,
Ачымсыз къадаргъа баш ийиб тюбеме.

Бу къысха ёмюрню ахсыныугъа джойма,
Сен алыр орунну, башхалагъа къойма,
Талпыуну, муратны кёлюнгден къурутма,
Джашау - къазауатды, къарнашым, унутма.

Кётюрюлмез джюкню Хакъ джюклемеученди,
Сынчыучу муратха хазна джетмеученди.
Санга джюкленнгенни сен ташыр кючдесе,
Ёз джазыуунга да бош ажым этесе.

Эрьяман/Турция.