Даршудешли давла-баракат имц1адараб

Лябкьуси сагаси дуслизир, селрайчирра гьалар, дунъяличирти лерилра дургъби тIашдизурли дигулра.


Украинара Россияра кIел декIарти улка ахIи ца цахIнабси ВатIан биъниличила сен Европала хIякимтани, хаслира Америкали хъумартурли? Урусунира Украиналантира душманти хIебиъни, илди чула ургаб узити халкьани биъни даршдусмазиб балуси якьиндеш саби кьалли. Тамашала гIяжаибдеш ахIену, урусуназибад украиналанти Европали ва Америкали балтахъули биъни?


Дургъбани давлачебти гьатIира давлачеббирули саби, илдала заводуни, фабрикаби дургъби лерхIели жигарчерли дузули сари. Ил багьандан сари дургъби кахIедурхути, бикIули саби цацабехIти адамти.


Сецад даралра сагати гьундурира, сецад тIашдаталра сагати юртанира халкьлис хIяжатли сари. Сагати гьундури дирули, юртани тIашдалтули даршуси бузерилизир жигарчерли дузахъес хIяжатлири лерилра фабрикабира заводунира, дургъбазиб бургъути уршбира.


ГIядатла адамтани, саби-бегIти юртани, яра квартираби диахъес хьулбикIули, дайхъала гIямру дуркIули сари. Аргъеси ахIен, адамти дургъбази ихъни, халаси къиянничил дарибти юртани гъятIиъни, гьундури, гумурби дулъни. Марли дунъяла адамти илцадра гIякьлу агартив? Ил суайчила пикрибухъес хIяжатли кьалли дунъяла лебилра адамтас.


Гъазала ванзаличиб кабуршути, чучиб сегъуналра гIяйибагарти дурхIнала рухIли миллатчибас, жалладунас чеббирцIниличи рирхулра. Или бетхIеалли, дунъя ахирличи гъамбиубли биъни якьинси саби. Лебилра дунъяла халкьла хIулбала гьалар детарути, илди бунагьуни дунъяла чеди кадарцес дирути ахIен. Ишди бурхIназибра, Гъазала халкь бомбабала бирни тIашаахъес ООН-ни кьабулбарибси хIукму бетерхахъес США-ли батурли ахIен.


Дунъя бузахъес кабатурти западла хIякимтани, Аллагь левниличила хъумартурли саби. Илгъуна хIякьикьатлизиб, бунагьуназибад урухкIути дунъяла лебилра халкь дургъбачи къаршили, чула уркIила пикрумачил, цауркIли тIашкабизес гIягIнили саби. Илкьяйда баралли, илдала хIялалти пикрумира детурхниличи рирхулра. Урухбиаб, дунъяла халкьла хIялалти пикрумазибад, дунъяла бунагькарти. Аллагьла нягIна бакIаб, саби авараагарли, давлачебли хIербиэс багьандан, гIяйибагарти дурхIни кабуршутала бекIличи.


Лерилра бунагьуни аркьуси дуслизир дархьдатурли сагати, гIяхIти пикрумачил дунъяла ва Дагъиста халкь хIербиубли дигахъира.


Нушала ВатIайзир, дунъяла бегIлара жагаси чеббикIибси гIямзилар, нушала Дубуртар Улкализир, нушала шалати юртаназир даршудеш, бизи-ванадеш, гIяхIялдеш, уркIбала сахаватдеш, давла-баракат имцIадиаб. Нушачибси даршудеш калахъес халкьла сабурра, гIякьлура, цIакьра имцIадиаб. Сагаси дусли адамтала юртанази байрумти хьурадараб. Даршудешли гьарил хъалибарглизир давла-баракат имцIадараб.


2023-ибил дуслизиб нуни сагаси бурала багьурра: «ТалихI чуднани тIембикуси бирар». Дигулра даргантала юртани 2024-ибил дуслизир чуду-хинкIали тIемдикIули, талихI-баракатли дицIили.


Дурхъаси Кьуръайзив марварибси, христиантала динна дурхъаси ГIиса Идбаг акIубси БархIила байрам нушабра байрамли бетааб. Сагаси дуслизир лебталалра
гIяхIти пикруми ва кьасани гьардизаб.