Заман келир – терек чагъар,
Заман келир – чапракъ агъар,
Къадар келир, эшик къагъар…
Тюшюнсенг а, джарлы адам!
Теплей, ура ёрге чыкъдынг,
«Гёзенинге» хазна тыкъдынг,
Кёб мискинни джанын сыкъдынг…
Тюшюнсенг а, джарлы адам!
Ёлюм сенден улху алмаз,
Азраильге тыйгъыч салмаз,
Сенден артха акъ ыз къалмаз…
Тюшюнсенг а, джарлы адам!
Къуллукъ алдынг, къулча джорта,
Джек – умметге чыракъ тута,
Ёз халкъынгы ёзден сата…
Тюшюнсенг а, джарлы адам!
Бир джан Джерге «тамыр атмаз»,
Ёлюмсюзлюк джолну табмаз,
Гъарш базманынг суаб тартмаз…
Тюшюнсенг а, джарлы адам!
Дуния – озуб кетер джолду,
Джан, сан къыйгъан, айланч къолду,
Джашау деген – джангыз олду…
Тюшюнсенг а, джарлы адам!
Сенден халкъда айтыу къалмаз,
Эскертменги миллет салмаз,
Тёлюнг сенден юлгю алмаз…
Тюшюнсенг а, джарлы адам!
2024
Джек къулуна
© Copyright: Софи Трам-Семен 2, 2024
Свидетельство о публикации №224020801114
Свидетельство о публикации №224020801114
Рецензии