Афганистаннизивад чарх1евхъунси уршила кагъар

Саламти диаб аба,
ХIечи ва тухумтачи,
Иш кагъар бучIухIели,
Мякьлаб цугбикибтачи.


Дила саламла мурад,
ХIуша арали диъни,
ЧарухъунхIели хъули,
Разили гьунидаъни.


Дила аги бурасли,
Аралира, гIяхIлира,
Набчила кьакьарикIес,
ХIед гIягIнидеш агара.


Бурис паргъатриахъес,
Дила юлдашуни леб,
Цали бируси барес,
Дилара арадеш леб.


Ши дебали жагали,
Муэрличебаира,
Дунъя шинишбиублив?
Аба се хIянчи лера?


Декла машина бицIес,
Чили кумекбариба?
ДегIес анкIи хъуличи
Чили кадаахъиба?


Хъу бургар чебакIили,
ХIеб дургар садаили,
ХIентIа белшес сайусну
ЯхIбара марисудну.


Дирутази вархили,
Сурат касес бетхIеур,
ГIур кагъар касибхIели,
ХIушаб суратра биркур.


Узи, ахъли мабучIад,
Гьанна хIечил сари гъай…
Дила саламти дура,
Чизи сарил балулри.
Хьарбаа сен агарсил,
Дила кагъарлис жаваб.


Эгер хIуни баладли,
БелкIен хьармабиидну,
СаибхIели лерилра,
Нуни бекIдирисрану.


Гьанна гIяхIли калаба,
Харили чедааба,
Марисуд вари аба,
Урегал баз яхIбара.