Нохчийн маттаха дош

     НОХЧИЙН МАТТАХА ДОШ


   Нохчийн мотт! ...
   Нохчийн къоман ширачу баххашкара
   Схьа богIучу ормашкара волчу
   Нохчочун цIараха, ...
   Хьоьгара - Нохчийн мотт - бакъо а хаьттина!
   ЦIенначу бух тIера,
   Вайн замане кхаччалца, лелла а,
   Буьйцуш а болу - Нохчийн мотт!
   Шен тIе заманийн хьеренна кIурз биллаза болу - Нохчийн мотт,
   «Куьцанна» олий, амма ларамза доцуш,
   Шен йукъаIиттина дехьара-сехьара хIумалгаш доцуш болу -
   ЦIенна Нохчийн мотт!
   Вайн тIаьхьене дIакхачаре сатуьйсуш болу,
   ТIаьхьено буьйцуш а, ларош а
   Вайна хуьлийла а,
   Хаддаза бехийла а... лууш болу - Нохчийн мотт!
   ХIарра мотт бийцин-кха сан Дас, Дедас,
   Церан Дайш а
   Ала хьакъ болу - Нохчийн мотт!
   Нанас бераллехь,
   «Вижалахь жиманиг» бохуш,
   Шен беркате кIеда куьг,
   Хьаж тIе а хьоькхуш..., хийлаза лере хазийна болу...
   Хьох лозу, денна а,
   Дала нохчочунна делла долу дог!
   Хьо ма-буьсийла хьайх дозалла доцуш,
   ТIалам а боцуш,
   Кхоамза
   Хьо кегон болчу нехан карахь,
   Церан саьхьарчу олаллехь...
   ХIай Сийлахьа, тхан Нохчийн мотт!