Лексика. Дев ва илала мяг1на. 5 класс

         Дарсла мурадуни: «Дев ва илала мяг1на» бик1уси тема  буч1антази аргъахъни. 
          Дурх1нас бяркъ бедлугнила мурадуни: даргала литературный мезличи дурх1нала диги адилкьни.
Дарсла г1яг1ниахълуми:   суратуни, карточкаби, ручка, тетрадь, кьалам, линейка.   
                Дарсла каргьни:

 I. Дурх1ни дарсличи х1ядурбарни.

           Учитель. Ишбарх1ила дарсличир нушани ахтардибирех1е х1янчи 182, бях1 85 ва сагаси тема  буч1ех1е.    

II. Дурх1нала багьудлуми ахтардидарни. Илдас кьиматуни кадатни.    

III.   Дугьбала диктант.
 
 Вабаъ, валликьна, варскъа, ватахьар (вацачи мешуси бишт1аси жанивар), вех1изес, верша, гавгьар (дурхъаси къаркъа), гавур (капур), гантари бигубли бишунси урца бут1а), герга (кьац1ла сулкъа), гилавка (400 гр.).

IV. Диктантлизир къаршидиркути дугьбала мяг1на баянбирни.

V.  «Лексика» бик1уси тема  буч1антази аргъахъни. 
 
Учитель.    Мезлизирти лерилра дугьбала хазналис лексика или бик1ар. дугьбани сек1улти, баркьудлуми, сек1ултала лишанти, кьадурти иргъахъу.
Гъайлизиб нушани иргъуси мяг1налис лексический мяг1на бик1ар. Амма лебси саби девла грамматический мяг1нара. Масала: муракьяна ибси девла лексический мяг1на саби мура удуси адам, грамматический мяг1на биалли – сущ., цалихъ,  мурул жинс.
Лексикализи кадурхар:
1. Синонимти  (зяг1ипси – хъябшси).
2. Антонимти (зяг1ипси – араси).
3. Омонимти (июнь баз – г1ярг1нала баз).
4. Лугъатунала дугьби (кьалтин – т1амса).
5. Саниг1ятла дугьби (кярх1ла, дуруб).
6. Дуркьдиубти дугьби (г1яббаси, шагьи).
7. Сагати дугьби (интернет, компьютер).
8. Аслу-минала дугьби (кьац1, шин).
9. Г1ерасибти дугьби (кьулгьу, учитель)
10. Дахъал мяг1нубар дугьби (адамла хъяб, дубурла хъяб, гажинна хъяб).
11. Терминти (существительное, глагол).
 

VI.   Удир гибти лексикалашалти мяг1нуби х1ясибли дугьби дургни.   Х1янчи 186, бях1 88-89.   

VII. Лексикалашалти мяг1нуби х1ясибли дев белгибирули, кроссворд  бирц1ахъни. Х1янчи 191, бях1 89-90.   
               
VIII.  Дарсла  итогуни каъни.

Ишбарх1и нушани аргъира:
 
1. Мезлизирти лерилра дугьбала хазналис лексика или бик1ни.
2. Дугьбани сек1улти, баркьудлуми, сек1ултала лишанти, кьадурти иргъахъни.
3. Гъайлизиб нушани иргъуси мяг1налис лексический мяг1на бик1ни.
4. Девла грамматический мяг1нара  лебси биъни. 
5. Лексикализи ишдигъунти бут1ни кадурхни: синонимти, антонимти,  омонимти, лугъатунала дугьби, саниг1ятла дугьби, дуркьдиубти дугьби, сагати дугьби, аслу-минала дугьби, г1ерасибти дугьби, дахъал мяг1нубар дугьби. 

IХ.  Хъули х1янчи бедни.  Х1янчи 193, бях1 90-91.  Х1янчилизир  лексический мяг1нала ва грамматический мяг1нала дугьби даргес.