Секьяйда х1ербирули вайнукьаби

ЧевяхIси Аллагьли дунъяличиб адамти сен акIахъубара или пикрирулхъули рирус цацахIели, хаслира мартла 22-личиб «Крокус Cити»-лизиргъунти анцIбукьуни вайнукьабани дурадеркIибхIели?


Илгъуна зулмула такьсир дураберкIескIун дебали духуси бекIра, гIяхIцад харжанира, дахъал пикрумира хIяжатли сари. Бархьили гIякьлу агарти адамти, селизибалра гIяйибагарти адамти кабуршахъис или пикриикIуси адам, севан паргъатли усес вируси, ил секьяйда кьацIли укули, ил секьяйда хIерирули, сунела дурхIначил ил секьяйда ихтилатикIули?


Марли илгъуна адамра ЧевяхIси Аллагьли акIахъубсив? ПикририкIулра ну.
ЦацахIели, наб нуни маслигIятра бирули рирус, паргъатриэс багьандан, дунъяличир лерти, нуни чедаибти, далути жагати секIал гьандиркахъули рирус.
Гьарли-марли биалли, дила бегIлара чебяхIси ва дурхъаси жагадеш Дагъистан саби. Илалайчирра жагати мер-муса гIур дунъяличир агниличира рирхулра. Таркила дубураличивад хIерикIухIели МяхIячкъала, Нарын-къала, Дербент, Кубачи, Хунзах, Гъуниб, Хъярбук ва цархIилтира, цаличирра ца жагати дубурла шими. Ил нушала багьа ахIебиуси дурхъадеш саби.


Ну акIубси КьярбачIимахьиличи бяхIчили «Ахъмузала ганцIи» бикIуси дубура леб. Ил дубурала бегIлара ахъси мерличибад катхIел хIеризурхIели, шими, махьурби, адамтала гIямрула лишанти чедиути ахIен, илаб бацIси, пашманси, хIяйранси, мицIирдеш агарси лехIдеш ва тIабигIятла жагадеш саби чебаэс вируси. Ил дубурла бекIличи нушала шила школала учительти июньна ахирличиб, бегIла гIергъити зянкъла бархIи, хинкI барес шадиб башули бирар.


Адамти агарси дунъя, сецад жагаси биалра, вегI агарси кIялгIяличи мешубирули рирус нуни. ТIабигIятла бацIдешра, хIяйрандешра, цундешра мицIирси жагадешличи шурдатес багьандан, ЧевяхIси Аллагьли дунъяличиб адамти акIахъубти саби или, муртрил пикрирухъунсири.


Марлира, дунъяла адамтани, чула някъбала устадешличил ва шалати, черяхIти пикрумала кумекличил дунъя гьатIира жагаси бетарахъули саби.
Дила рухIлизиб хъумхIертурли калунси, адамтала някъбани акIахъубси жагадеш саби, Ленинградличибад гьарахъли ахIенси, Петергофлизибси «Шахматунала дубура».


Адамла уркIи хIяйранбируси жагадеш чебаира нуни Абу-Дабила «ЦIуба» мижитлизибра. Илала жагадешличила гъайличил бурес хIейрар, чебаэс гIягIниси саби.


Чебаили, гIур хъумартес хIейрар В.Верещагинна «Апофеоз войны» бикIуси суратра. Рахли дунъяла вайнукьаби духубарес вируси виалри, ца ил сурат чебаили, гIур дявти дехIхIедихьесли духубарес гIягIнитири.
Илкьяйда дила уркIи хIяйранбариб ГIямар Хайямла назмуртани, Чингиз Айтматовла хабуртани, дунъяла чебяхIти писательтани акIахъубти литературала игитунала сипатунани.


Нуни гьандушибтира, гIурра дахъал цархIилтира жагадешуни, космослизи урцуси ракеталичи бетаайчи, адамтала пагьмули, духудешли, някъбала устадешли акIахъубти сари.


Аллагьли адамти, дунъя гьатIира жагабиахъес, гIяхIбухъахъес, ахIерабарахъес акIахъубти саби. ГIямрулизиб, адамти хатIахIебиркахъес багьандан, ЧевяхIси Аллагьли дурхъати табтуртира дархьили сари.


Сен гьатIи, дунъяла адамтани, лебилра чула тарихлизиб, цабехIли цабехI кабуршули? Сен адамтани сагали дургъби дехIдирхьули?
Ф.Достоевскийла «Такьсир ва танбихI»-лизив Леонид Раскольниковли сунени барибси такьсирла бунагь чекасес виубли ахIен.


Гьалабван Москвализиб дурабухъунси, кIарахъан Мурадис Салимхановла «Биологияла учитель» бикIуси жуз бучIули, ну сабурлизирад рухъунсири. Илавси игит кавшес, ну хIядурлири. Жузла ахирлизиб якьинбиуб, жузла игит аргъала дамкьурси адам виъни. Илини, сунезибад сунени бебкIа барили, дунъяличивад арякьири.


Секьяйда чекайсули вайнукьабани чули дарибти такьсирти? Сегъунти саби, илди адамти?


Марлира «Норд-Остли», «Бесланни» гIурра дахъал такьсиртани, вайнукьаби духубирули ахIен.


Дунъяличиб селра къел-хIерзи агарли бетихъуси ахIен.
Такьсирла бегIтас, сеналра танбихI гIеббиур. Адамти кабушнира, дунъяличибси жагадеш кабушни, агарбарни саби.


Адамтала гIяхIти пикрумачил, жагати суратуначил, духути жузачил, сагати хъулрачил, парканачил, шими-шагьуртачил, кIялгIначил, жагати далуйти-макьамтачил, жагати палтарличил, някъла устадешличил, заводуназиб фабрикабазиб хIялалси бузериличил, чеалкIуси наслуличи нешанала уркIбазирти дигиличил, жагьилтала хIялалти дигайличил, цалис цали гIяхIдеш булгниличил дунъя жагабиахъес багьандан, ЧевяхIси Аллагьли адамти акIахъубти саби.
Вайнукьабала баркьудлуми, чузир селичилра, чичилра диги агарти сари, илди хIегъти, нясти пикруми сари, илди дурадуркIутала вайбаркьла хIялани сари. Вайти ва кахти баркьудлумани, дунъя ахирличи гъамбиахъесра бирули саби.
Вайнукьабала такьсиртани дунъя агархIебарахъес багьандан, хIялалти адамтани верхIелра шайчиб, гIяхIдеш булгес, ва бирес хIяжатли саби. ЧевяхIси Аллагьли балга кьабулбируси саби. ГIяхIти пикрумира детерхес дирути сари. Гьайгьайра, такьсирла вегIлис танбихI, бекIлил хабарагарси мерличиб, гIеббиуси биънира хIекьдеш саби.


Ну Москвализир хIеррирухIели, «Крокус Сити» чебаэс рякьунсири. Бусурман, кавказлан адамли, Москвализиб илгъуна жагадеш акIахъниличи разириубсири. Москвара Кавказла ца бутIа сабливан кьабулбарибсири.


Халкьла ургаб бижгурдеш акIахъес багьандан, такьсир дурабуркIутани, ил мер чеббикIили бургар ибти пикрумира, бекIлизи дашули сари.


Лебилра дила белкI бучIути, илдигъунти такьсиртазирад гьарахъли кали дигулра.
Балагьла анцIбукьлизиб, бахъал адамти алхниличи уркIила пашмандеш балахъулра. Дяхъи-хъаслизи бикибти жявли арабиубли дигулра.


ГIур дунъяличиб илгъуна, балагьла, бунагьла баркьуди кахIебикахъес рулгулра.