Сулейман Гуьне патан хуьрера

Москвадай Ленинан ордендин сагьиб хьана хтай Сулейман леги халкьдин рик1 алай шаир яз виридаз акун ва адаз яб гун к1анзавай.Шаир Ахцегьизни фена хтайдалай кьулухъ, Гуьне патан жемятри Сулейман чпин патав атун райкомдивай т1алабна. А вахтара улакьар артух авачир,гьатта фургъунарни вири хуьрера авачир.Гуьне пата Испикрин са совет тешкилнавай. Меслят хьайивал, Шихидхуьруьн колхоздай Агъа Ст1алдал шаир Сулейман гъиз фургъун ракъурна. Испикринни Шихидхуьруьн арада Кезинан багъ авай.  Майдин варз тир. И патан хуьрерай далдам-зуьрнедал илигна инсанар дуьзендал алай Кезинан багъда к1ват1 жезвай.

  Ч1ехи агъсакъалривай ван хьайивал, а йисуз п1иниярни фад хьанвай. Сулейманал вил алаз акъвазнавай жемятри (иниз Гуьне патан вири хуьрерай инсанар атанвай)шадвилер ийизвай, кьуьлер ийизвай ва манияр лугьузвай.Гьар хуьряй къвезвай дестейрив яру пайдахар, ч1ехи вождарин портретар ва недай суьрсетни гвай.

  Эхирни агъадихъай фургъун пайда хьана. Сулейман акур жемятри "Яшамишрий чи Сулейман" лугьуз фургъун гьалкъада туна. Виридаз адан гъил кьаз к1анзавай.Сулейман аск1ан буйдин итим тир, иниз килигна ам мад фургъундиз акьах хъувуна.Гила ам виридаз аквазвай.Халкь къацу ч1урал ацукьна шаирдиз килигзавай. Сулейманавай халкьди Москвада вич кьабулай тегьердикай, ч1ехи вождь Сталинахъ ва писателрихъ галаз хьайи гуьруьшрикай суьгьбет авун т1алабна.

 Шаирди галай- галайвал суьгьбетар авуна ва шиирар к1елдай вахтни хьана. Шаир фургъунда к1вачел акъвазнавай ва хуралай вичин эсерар к1елзавай.Халкьди гьар са шиир к1елун гурлу капаралди къаршиламишиз хьана.Эхирни шаир фургъундилай авудна чпин юкьва туна кьуьлер авуна. Шадвилер лап геждалди кьиле фена, т1уьнар гайидалай кьулухъ шаир рекьени хтуна. Амма гьик1: итимри ва дишегьлийри халкьдин манияр лугьуз-лугьуз Сулейман авай фургъун са кьадар мензилда рекье хтуна.

 Сулейман Гуьне патаз атун ч1ехи сувариз элкъвена ва халкьдин рик1елай и вакъиа садрани алатнач.