Джыгъылмагъан адам болмаз

 
(анамы дерслеринден)


Джашауунда джыгъылмагъан адам болмаз,
Бири джылар, бири сынар, бири турмаз,
Бир башха уа, тирелир да, ёрге къобар,
Юсге - башха джабышханны, къагъыб атар.


Джылаучула, болушлукъну сакълагъанла,
Болмайдыла хорлам джолну башлагъанла,
Ала тая, хынчый, джунчуй, абыннганлай,
Джашайдыла башхалагъа табыннганлай.


Джашау деген, тикге тартхан, ёрлешиудю,
Кюнлерибиз, тер акъдыргъан, кюрешиудю,
Ынгычхаучу тёрде орун алалмайды,
Энчи джолгъа кеси ызын салалмайды.


Бир заманда джазыкъсыныу излемегиз,
Керекли зат болмаса да, тилемегиз,
Джау бла джауча турушуугъа кёлленигиз,
Керти тенге кертилик бла тенгленигиз.


Джан аурутуу, адамны баш танымыды,
Къарыусузгъа ёкюл болуу, сынамыды.
Джашау джолда джыгъылыу бар, туруу барды,
Бел къатдырыб джангыдан джол тутуу барды.


Санынг тюшсе, джюрек кюч бла тиреликсе,
Джюрек сынса, Аллахдан кюч тилериксе,
Зоргъа тюшсенг, сый сындырмай чегериксе,
Эсеб этиб, къутулур джол излериксе.


Алайды да, гитчеликден иленигиз,
Джанны, санны къатдырыргъа юренигиз,
Ёмюр деген, ачымасыз сынаучуду,
Болумсузну юсю бла атлаучуду.


Аякъ таймай дунияда джашау болмаз,
Эм онглу да "тайгъакъ халгъа" тюшмей къалмаз.
Керти адам чекгенинден акъыл алыр,
Алай бла да муратына тюз джол салыр.

1995.