Безаман ницкъ киншка

Резванова Айза

Яздар  а  дацар – кха,
Хьох  яздеш  ца  хилча.
Дийцар  а  дацар – кха,
Хьо  хьег1ош ца  хилча.
Дахар  а  дацар – кха,
Даймохк! Хьох  къаьстича.
Ялар  а  дацар – кха,
Хьан  кийра  ца йижча.

Резванова Айза

Маржа я1, маржа

Лаьар- кха дагахь дерг, ма дарра яздан,
Адамаш лаьар- кха, вовшашна марздан,
Дахар а лаьар- кха берашна хаздан,
Лаьар- кха массо де, нохчий чохь даздан.

Лаьар- кха даймохк хьо, даггара хьаста,
Геналлехь къийлина дог хьуна даста,
Лаьар- кха ойланаш д1ахеца кхарста,
Шовданийн аьзнашка ладег1а б1аьста.

Лаьар- кха, мох хилла хьан мара хьерча,
Я ц1енчу 1аламца хьуна чу яржа,
Ма ч1ога лаьар- кха, ахь со а харжа,
Ирсечу доьзалех,- маржа я1,маржа…

Резванова  Айза
Даймохк  нана

Даймохк!  Х1ун  ду  хьуна  ганза,
Я  баккхаза  ахьа  чам,
Я  бу техь  хьо, х1умаъ  ланза,
Я  ца  хууш  х1уман  хам?!

Хийла  геналлехь  сатуьйсуш,
Бу  хьан  доьзалаш  хьо  ган,
Хьан  аз  хезча  кхача  лууш,
Масне  хуьйди  лаьтто  д1а.

Буьйсанна  хьо  дага  лоьцуш,
Ас  набарна  хьаббо  б1аьрг,
Со  санна  шен  махках  хьоьгуш,
Хир  ву  генахь  хийла  стаг.

Хьан  марзонах  ойла  хьерчаш,
Кийра  кхехкош  доьлху  дог,
Сайн  генара  рицкъаш  лехьош,
Ас  собарца  боккху  ког.

Сийлахь  Даймохк!  Хьоме  нана!
Суна  хиъна  шуьшин  хам,
Йиш елар олхазар хилла,
Шуьшинн т1оьхул хеца т1ам.
               
  Резванова Айза

Даймохк  хьан  бакъо яц  къарбала

Даймохк,  хьан  бакъо  яц  къарбала,
Хьо  къийсар  эрна  деш  тхан,
Тхо  кхета, т1амо  хьо  дарбина,
Ерзаза  ю чевнаш  хьан.

Даймохк, хьан  бакъо яц къарбала,
Г1айг1ане  дуьтуш  хьайн  къам.
Хьан  озе ладог1а  сатуьйсуш,
Айбелла  бу, лекха  лам.

Даймохк, хьо  къарцалуш  бахалахь,
Халкъанна  йовхо  луш  хьайн,
Машаре, сирлачу аьзнашца
Са парг1ат доккхуш  тхан  дайн.

Хьаннашкахь  олхазарш  декийта,
Лаьмнашкахь  уг1ийта борз,
Дог хьастий кхерчашкахь хазийта,
Ирсе  дай, тхан  нанойн аз.

Даймохк, хьо  малх  санна  къагалахь,
Хьанал  ду  хьуна  тхан  ц1ий.
Т1ехьенна  беркате  хилалахь,
Ларделахь, турпалхойн  сий.

Дахаре

Х1ун  къуьйсу,  х1ай  дахар
Ахь  кху  сан  дагца,
Х1ун  бахьна  ду  далар,
Дуьхьал  хьан  т1амца?!
Ойла  сан  керчаяр,
Хин  тулг1е  санна,
Даймахках  хьегаяр,
Ненах  бер  санна.

Ца  даьлла,  х1ай  дахар,
Хьо  дог,  сан  зийна,
Я  эрна  ду  лехар,
Ирс  хьоьца  ийна,
Вуй  теша  ваьхнариг,
Хьоьца дог тийна,
Я  вуй  хьох  къаьстинарг,
Хьох  дог  1абийна?!

Резванова Айза

            Мохк  бегор

Сан  даймохк!  Х1ун  ду  те  хьан  дегор  латта,
Х1ун  бала  бу  теша,  са  лоьцург  хьан?!
Кийра  а  бат1ош  хьо  хьовзий  те  готта,
Сов  яьлла  те  хьуна,  къизалла  тхан?

Сан  даймохк!  Дехар  дан  дац  суна  атта,
Дац  хьуна  дала  жоп  адамех  сан,
Амма  цхьа  кегийра  маликаш  г1уьтту,
Ког  баккха  сатесна,  лаьтта  т1ехь  хьан.

Даймохк!  Со до1ийца  суждане  йоьду,
Къинхетам  боьху  ас,  т1ехьенна  тхайн,
Бусалбанаш  хилла,  иманехь  г1овтта,
Ницкъ  лолахь  ахь  царех  бай,  ирсан  дай.

Резванова  Айза
             
Къагалахь  дашо  малх,  хьо  серла  балий,
Хьасталахь  нохчий  чоь  йовхо  луш  хьайн.
З1аьнарийн  куьг  хьокхуш,  дасталахь  латта,
Денделахь  бецахелг,  ахь  рицкъа  лой.

Халонна, харцонна  цата1ош  корта,
Ницкъ  лолахь  лардан тхайн  даймехкан  сий,
Тхо  бахьнехь  юьхь1аьржа  ма  делахь  лахьта
Лай  хилла  ца  баьхна  тхан  оьзда  дай.

Самукъне   аьзнашца  шовданаш  декош,
Зезагех  кхелина  аренаш  лепош,
Бахалахь  тхан  даймохк,  хьанал  къа  дебош,
Ирсан  мукъ  даимна  хьайн  буйнахь  сецош.

     Резванова  Айза
               
Ма  ала

Ма  ала,  нохчийн  къам  ц1ена  дац,
Талхийна  г1иллакхаш  вайн. . .
Ден  дакъа  къонахчо  духкур  дац,
Г1иллакхаш  дицдийр  дац  дайн.

Ма  ала,  нохчийн  мотт  хаза  бац,
Бийца а хала бу и.
Сийначу бацалахь лахьийна,
Зезагийн ду иза тхи.

Ма  ала,  вайн  даймохк  ирсе  бац,
Самукъне  дац  дахар  вайн,
Седарчий  санна  шаьш  къегина,
Кхуьуш  бу  вайн  кегирхой.

Ма  ала,  къонахий  бисна  бац,
Уьш  бу  вайн  лардийраш  сий,
Нохчий  чохь  къонахий  цахилча,
Хир  дацара ц1ена вайн  ц1ий.

Резванова Айза

Кхин  х1ун  ирс  ду

Син  парг1ато  шайна  лоьхуш,
Кхечу  махка  ихнарш  д1а,
Хир  буй  теша, парг1ат  бехаш,
Са  цахьийзаш  даймохк  ган?!

Дерриг  дуьне  серла  доккхуш,
Б1аьсте  йоьлуш  йеъча  т1е,
Сан  са  т1ома  долий  доьду,
Сайн  махкахой  гулбан  ц1а?!

1ожалла  ю  когех  хьерчаш,
Новкъалло  еш  боларна,
Замано  а  тукур  туьссуш,
Дацдо  некъаш  дахаран?!

Сан  дог  доьлху,  Деле  доьхуш,
Рицкъаш  маьрша  дерзор  ц1а,
Доьзалех  б1аьрг  тоха  хьоьгуш,
Хийла  наной  кхелхи  д1а?!

Ойла  ейша,  х1ай  махкахой,
Къизалла  д1аиэккхаяй,
Барт  боцуриг,  кхин  х1ун  ирс  ду,
Доьзалашка  кховдо  вайн?!

Адмалла

Адам  дезар  г1алат  делахь-
Со  г1алат  ю,  и  бакъ  ду.
Адмех  тешар  г1алат  ларахь,
Ю ха  а  со, г1алат  ю  .
Адамийн  дог  хьаста  лаар,
И  г1алат  а  соьца  ду,
Реза  ю  со  г1алат  хила,
Адмийн  бала  айбеш  д1а.
Г1алат  делахь  адам  хилар
Шеца  долуш  адамалла.

**********
Вай ду  те  замано  сихдина,
Я  зама  сихйина  вай?
Вай   г1ерта  нека  деш  хих  довла,
Генахь  а  доцушехь  т1ай.

Тахане  цалоьруш,  кхане  схьа
Ма  еха,  им  йог1ур  яй,
Шен  болар  ца  дохош  замано,
Д1абевлла  вайн  хийла  дай.

Йиш  ваша  дитина  нахаца,
Гергалло  малеха  х1ай,
Хьайн  наха  сий  деш  хьо  ца  ларахь,
Хетар  ву  хьо  миска,  лай.

Х1ордах  д1акъаьстина  хин  тулг1е,
Латто  д1ахудий  д1айов,
Вон,  дика  шен  махкахь  цалайнарг,
Адмашна  вицлой  д1авов.
               
  Резванова Айза

Хеста  беш, бела  беш,
Бер  санна  хьоьстуш,
Ламазан  хенаца,
Карла  а  бохуш.

Нохчийн  мотт, марзоца
Мел  буьйцу  къонлуш,
Бехар  бу  вайн  даймохк,
Халкъана  ирс  луш.
             
  Резванова Айза
               
Нур дашо малх кхеташ ца хилча,
Ма 1аьржа хир дар-кха сирла де.
Бетта са седарчий ца кхетча,
Хир яр-кха буьйса сингаттаме.

Ма  цхьалха  хирдар-кха дахар а,
Вай вовшен деза ца кхоьллинехь,
Кхолламо вай ирсе дан лиъна,
Безачийн некъаш ца х1иттинехь.

Бохь лекха ламанаш ца хилча,
Куц дайна дар-кха вайн 1аламан.
Дайн  оьзда  г1иллакхаш ца хилча,
Дацар-кха хьесап  кху дахаран.

Сан ц1енчу къомах к1ант ца хиллехь,
Ма яйна яр-кха хьан хазалла.
Даймехкан сийдеш хьо ца хиллехь,
Дацар-кха, сан хьох дан дозалла.
       
    *******
Воккха  стаг,  хьан  стенах  самукъа  дели?
Маликаш  даьхки  те  кхаъ  бохьуш  лере?
Я шераш а дицделла айъелла ойла,
Я бала  г1елбелла хьо сонта ваьлла?!

Шайт1анийн  шабаршка  ахь  ламадег1а,
Къоналлийн  забарш  еш, ма  де дог 1еха.
Дуьненан  хазаллехь, эхарт ахь деха,
Некъаш  ду  шера  гуш,  ца  оьшуш  леха.

Мерза  са  ц1еххьана, 1ожалло  лацахь,
Эхартахь  кечъйина  хьан  х1усам   яцахь,
Ма шийла  1а  хирду, ца  вохлуш  цкъа  а,
Я  йовха  ц1е  хир  ю, г1о доцуш  цхьа  а. . .

          Беркате  йо1

Ахь  х1унда  гатдо  са ,
Паччахьан  нана,
Совг1ат  делла  хьуна,
Везачу  Дала.

Билгал  веш  мух1арца,
К1ант  хьуна  велла,
Ц1ена  некъ  маршонна,
Ша  цуьнга  белла.

Ларамза  вас  ярна,
Кхоьруш  ша  дашца.
Буьйцу  мотт  сов  к1еда,
Цо вайн адмашца.

Хьеста  луш  вац  иза,
Шен  халкъ  цо  хьоьсту.
Х1оранна  дагчуьра,
Ша  дашца  босту.

Беркате  йо1  хилла,
Паччахьан  нана.
Совг1ат  ду  махкана-
К1ант  цо  кхиийна.

Бохуш  до  дозалла,
Хьан  к1антах  наха.
Даггара  баркалла,
Хьо  нанна  олу.

Г1айг1ане ма хила,
Паччахьан нана,
Я хасто яздина ,
Ма мота хьуна.

Тхуна хьо хиетара,
Тхайн еза эла,
Амма хьо хиллера,
Къастийна Дала.

Резванова Айза

Ас  къамел  до  беллачаьрца.

Ас  хеттарш  до  беллачаьрга,
Кешнийн  кертахь  йолалуш.
Хьолах  дуьзна  дуьне  лаьтта,
Ткъа  шу  ма  дац  дист  хуьлуш.

Делан  кхоьлах ваьлла  моьттуш,
Дуьне  дууш  леллариг.
Я  хьарам  дерг  шеха  къаьстош,
Хьанал  рицкъа  лаьхнариг.

Цхьа  воккха  стаг  хьаставелла,
Телхина  лела  моьттуш  со.
Хаттар  деш  вист  хили  соьга:
-Хьаьнца  къамел  деш  ю  хьо?

Ас  меллаша  жоп  делира,
Хоуьйтуш  сайн  дагахь  дерг:
-Ас  къамел  до  беллачаьрца,
Кхето  лууш  сачохьверг.

Дуьненан  да  ша  ву  моьттуш,
Хиллачарах  дисна  ду.
Ткъа  дуьненах  1еха  ца  луш,
Лаьллачара  дитна ду.

               
                Резванова Айза

                Дахар  лай               

                Цкъа  хьостий  деладеш,
                1овжадой  делхош,
                Вайн  г1ийла  синош  ду,
                Дуьнено  ловзош.

                Вайн  майра  дегнаш  ду,
                Куралло  1ехош,
                Зоьртала дог1маш  ду,
                Цамгарша  иэгош.

                Зама  ю  дахаран
                Орамаш  хедош,
                Толаман  байракх  ю
                1ожалле  кхийдош.

                Вай цкъа а  ца хилла,
                Дуьненан  дай ,
                1ожалла  ю  эла,-
                Ткъа  дахар, лай.
 

1995шо.

                Резванова  Айза          

            Кехатийн  зама

Мацах  цкъа  дуьйцуш  хезнера  вайн  дайша,
Кехатийн  бакъонаш хир  ю  вай  неха.
И  зама  ю  вайгахь  тахана   хьаша,
Иза  а  д1аг1ур  ю,  дуьтуш  вай   даха.

Мила  ву  и  кехат?  Сий  деш  ахь  лара,
Ву  теша  веъна  и   вазвина  Дала.
Веш - йишех,  гергарчех, волуш  сов  хиера,
Хьо  цуьнца  ца  къаьсташ,  самукъне  лела.

Са  а  дац,  ц1ий  а  дац,  амма  и  лору,
Цхьанне  а  ц1е  тоьхна,  деъна  ца  лела.
Шайт1а  ду, адамаш  дохуш  дерг  хиера,
Стагна  шех  тарвеш  дерг,  дуьненан  эла.

Дуьне  а  лаьттар ду, дахар  ду  доца,
Да-нана, йиш – ваша, 1ожалло  лоцу.
Кехаттам  ахча  ду, амма  дац  деха,
Ахчанца  гергалло, дуьсуш  ду  боьха.

                Резванова Айза

Кху  дуьненах  ч1ог1а  1ехавелла,
Вог1у  хьо  ца  лардеш  олу  дош,
Зама  едда йоьдуш  ю сихъелла,
Хан  д1акхоьхьу  цо,  вайн  хам  ца  беш.

Хьарам  кхача, - цунах кийра  бузий,
Кура  хьоьжу  кху  дуьнене  хьо,
Амма  1ожалла  т1е те1аш  улле,
Цо  куралла  тухий  йожа  йо.

Собаре  верг,  г1ийла  миска  лоруш,
Къизаллийца  дог  ахь  1овжа  до,
Цхьа  де  дог1у т1аьххьара  г1улч  юстуш,
            Къонахийн мах эццехь хада бо. . .

                Резванова Айза.               

Сайн шичана  лерина (А. 1. Д.)
 

Тийначу  буьйсана,
Даьржина  бетта  са  санна,
Ц1еначу  безамца,
Хьо  дагчохь  вехар  ву  тхан.

Хьо  марша  лоьлийла,
Ца  лоцуш  цхьана  а  кхело,
Диканца  вехийла,
Дахарехь  ца  гуш  кхин  хало.

Буьйсана  лепачу,
Цу  х1ора  седанан  нуьрах.
Тарделла  къегийла,
Даймехкан  некъаш  хьан  ц1арах. . .

Резванова Айза

(Абдулазимов Халидан доьзална лерина)

Турпала йиш-ваша

Сан ненан вежарий,йижарий ненан,
Сина мерза кхача шу, дахаран орам.
Сан деган йовхо шух, даглаьцча х1ора.
Къастаран ойлано иэшадо г1ора.

Шун дегнийн пхенаш ду, вовшеха доьзна,
Цхьанне дог  1овжийча, вукхера лоза.
Шух дечу дозалло, кийрахь дог дуьзна,
Йоккхаъеш лардо ас, халонан доза.

Халидан доьзалехь ца хилла цхьа а,
Уосалчу ойлано сак1амдеш цкъа а.
Вон - дика дерзийна  барам  цабустуш,
Комаьрша г1иллакхаш шайнех цадуьхкуш.

Яхь йолчу къонахчух схьадойлла дегнаш,
Дукха бу, шу санна шаьш хила хьегнарш.
Ц1ена хиш, бух болу шовданаш лору,
Шу санна йиш-вешех,турпалхой олу.

                Резванова Айза
    ( Резванов Хьасанна )

Тахана 1аламца
Малх ловза баьлла,
Хьо вина де хаздан,
Б1аьсте а яьлла.
Кху дийнах кхаъ хилла,
Сам даьлла латта,
Самукъне шен кузаш,
Даржийна лаьтта.

Басаршца кечделла,
Зезагаш сетта,
Мехкарша къайлаха,
Хьоьга б1аьрг баьтта.
Елхийтта шеран некъ,
Замано буьсти,
Жималлийн амало,
Хьан б1аьргаш хьаьсти,

Де- буьйса хийцалуш,
Ирс алсам дуьйлуш,
Безаман мерза мутт,
Дахарехь муьйлуш.
Тешаме накъостийн,
Сий-ларам болуш,
Хьо г1оза вехийла,
Дог ловза дуьйлуш. 

     Резванова Айза.

( Ахмадова  Тамара  лоруш )

Х1ай  зама !  Ма  г1ерта  со  къар  ян,
Дог иэшо  ма  г1ерта  сан,
Со  кхиъна  х1оразза  хало  ган,
Амал  а  евзина  хьан.

Буьйсанна  хаза  г1ан  дайча  а,
1ехалой  лелара  со,
Безамо  б1аьгашца  хьаьстича,
Моьттура  ирс  сайна  го.

Гуш  долу  1аламан  хаза  сурт,
Сов  уллехь  и  хеталой,
Юьсура  беха  некъ  ас  барах,
Цу  хазне  кхача  цалой.

Даггара  безачу  даймахке,
Боьссинчу  балийна  дан,
Г1о  шен  ца  хиларна  т1улг  хилла,
Дисна  ду  кийрахь  дог  сан.

До1а  деш  б1аьрхишца  дехарх  а,
Кхолламах  яла  ца  ло.
Ният  ду,  ца  йоха  собарах,
Суна  хьан  къайленаш  го.

Х1ай  зама !  Ма  г1ерта  со  къар  ян,
Дог  иэшо  ма  г1ерта  сан,
Со  кхиъна  х1оразза  хало  ган,
Амал  а  евзина   хьан. . .

Резванова Айза.

Сан  кегий  вежарий

Х1ай  к1ентий!  Сан  кегий  вежарий,
Шух  хили  те  т1улгаш  ламанийн,
Я  баьрзнаш  хили  те  шух  хьаннийн,
Я  ду  те  шун  синош  акхаройн?!

Х1ай  к1ентий!  Сан  кегий  вежарий,
Хин  тулг1еш  хили  те  шух  кегий,
Я  маьлхан  з1аьнарех  шу  къегги,
Хьоьжу  те  тхан  б1аьргаш  чу  лорий?!

Х1ай  к1ентий! Сан  кегий  вежарий,
Бисна  те  шун  дагахь  цхьа  бала,
Ца яккхарна  къинт1ера   нана,
Ца  кхиъна  я  дагахь  дерг  ала?!

Х1ай  к1ентий!  Сан  кегий  вежарий,
Мила  ву  шу  некъах  тилийнарг,
Дахаран  чиркх  хьалхе  байинарг,
Ца  1ебаш  тхан  дегнаш  дууш  вверг?!

Я  Аллах1!  Я  Аллах1! Я  Аллах1!
Собарах  ца  доха  ницкъ  лолахь,
Иманехь  барт  цхьаъ  бай  нисделахь,
Т1аьхье  тхан  беркате  ахь  елахь.

                Резванова  Айза
               
Ненан  лаам            

                Малх  схьа кхеташ,  и  чу  бузуш,
Хенаш  хуьйцу  замано.
Ворх1  дуьненна  го  туьссийтуш,
Ойла  йойту  балано.

Собаре  дог  кийрахь  сецош,
Шашах  б1аьргех  уьду  хиш.
Аьро  аг1он  т1е  куьг  хьоькхуш,
Сингаттам  бу  ненан  гуш.

Цуьрриг  шеко  дагт1ехь  йоцуш,
Муьлхха  хенахь  йоьллуш  не1.
Нанас  к1антах  дог  ца  дуьллуш,
Массо  хенахь  лар  бо  кхаъ.

Х1унда  бу  сан  кхоллам  къиза?
Бохуш  тийжаш  нана  яц.
Къайлах  хастам  беш  цо  хеза,
Делер  доцуш  х1уммаъ  дац.

Нагахь  вацахь, кху  дуьненахь,
Аллах1!  Хьайн  къихетам  бай.
Ша  лехна  ирс,  цу  эхартахь,
Лолахь,  г1азот  къобал  дай.

Резванова  Айза
Иэший  хьо,  замано

Дакъаза  ма  дала,  кийрара  хьо  дог  сан,
Х1унда  хьо  г1елделла,  некъ  юккъе   баланза?
Ойланийн  архаш  ахь,  есале  хецна  д1а,
Самукъне  хилла  аз,  къарделла  хеза  схьа.

Г1о-накъосталлина,  ма  кийча  дара  хьо,
Г1ийланиг,  мисканиг,  гергара  вара  хьан,
Нийят  а  хьан  ц1ена,  х1ун  бахьна  ду  дохо,
Хьо  х1унда  къар  дели,  иэший  хьо,  замано?!

Делла  ма  дала  хьо,  буо  берах  тарделла,
Сел  миска  хьо  хилча,  мила  хир  сан  эла?
Хьох  накъост  сайн  вина,  балхийна  къа-бала,
Мила  ву  тешаме  сан  сина,  кхин  хьол а?

Балано  1овжорах, дахар д1а хедаш  дац,
Вон-дика ца херца заманан бакъо яц,
Дакъаза  ма  даларг, сан дехар ду хьоьга,
Г1елделла  дисарх а, доха  ма  дохалахь.

Резванова Айза

 ( Паскаев  Рамзанан  60  шо  кхачар  лерина )         

Беха  некъ  дахарехь  ас  бина,
Бустуьйтуш  ойланца  соьга.
Пондаран  озаца  мелл  гина,
Суьртех  ахь  даге  жоп  доьху.

Пондаран  озо  са  доссадо,
Самукъне  жималлийн  ирзе,
Б1аьрзениг  ойланца  воссаво,
Ша  ган  сатесначу  ирсе.

Пондаран  дут1къа  аз  тийсало,
Чов  хилла  бисна  муо  ийзош,
Кхолламца  дог  кхин  ца къийсало,
Азаллин  бакъонаш  лоьруш.

Уьдучу  замано  туьйсу  го,
Пондаран  озе  ладоьг1уш,
Хьосту  дог  мерзачу  безамо,
Д1аяхна  хан  карла  йохуш.

Генара  сурт  хьалха  х1иттадо,
Ойланца  яхна  хан  луьстуш.
Жима  а, воккха  а  ирсе  во,
Кийрара   дог  ловза  дохуш.

                Резванова  Айза

          (Иллиалархочунна  Дагаев  Валидана )

Жимчохь  дуьйна  ас  ла  доьг1уш,
Хьан  аз  суна  девзаш  ду.
Вайн  даймехкан  иллеш  олуш,
Хьан  зевне  аз  хаза  ду.

Денна  хийцалуш  схьахеза,
Къона  илланчийн  аьзнаш.
Царна   юккъехь  къона  хета,
Ахь  олуш  долу  иллеш.

Вайн  даймехкан  хазаллийца,
Хьан  зевне  аз  дог1уш  ду.
Ахь  иллешкахь  ма  хесторра,
Вайн  исбаьхьа  даймохк  бу.

Ломахь  озах  хьан  тарделла,
Дека  шийла  шовданаш.
Сайн  бан  беза  некъ  бицбелла,
Со  ю  царга  ладоьг1уш.

Б1е  шерашкахь  идарх  зама,
Хийца  яларх  бакъонаш.
Даймохк  даим  къона  хир  бу,
Хьан  аз  цуьнца   дехар  ду.
1987шо.

                Резванова Айза

(Керимова Майсина.)

Ладог1а  ахь  соьга  сан  хьоме  Майса,
Сан  дагца  схьаийна  хьо  жимчохь  дуьйна.
Самукъне  хьо  хилча  дог  доьлуш  хьоьца.
Г1айг1ане  хьо  яйча  лууш  дог эца.

Сайн  дагчохь  гулъелла  безаман  марзо,
Лаьаркха  тахана  хьоьга  д1акховдо.
Хьан  х1усмехь  йостийла  лаьаркха  Дала
Ирс  бухах  дуьйлу  хьост,  цалекъаш  цкъа  а.

Лаьтта  т1ехь  хиш  санна  даьржийла  шорта,
Лаьар-кха  беркате  рицкъа  хьан  керта .
Цагуш  хьайн  доьзалех  дог 1овжош  бала,
Дахарехь   юттийла  ахь  ирсе  г1ала.

  Резванова Айза

Лоьрашна

Цамгаро шена пхьар дина,
Церг туьйссуш къийзадо дилх.
Мерза са лаца сатесна,
Туьйсу кам1арашца зирх.

Лоьраш ду Делан Маликаш,
Цамгаршца т1ом цара бо.
Дарбане ду цера куйгаш,
Б1аргашчохь къинхетам, г1о.

Мотт сецош цамгар т1етаь1на,
Мерза са къахьдина цо.
Амма дог деттало тешна,
Боккха ницкъ лоьрашкахь го.

Лоьраш, шу Делан Маликаш!
Ойланаш шун ц1ена ю.
Дахарехь ирс, аьтто хьиекъаш,
Сирла некъ хуьлийла шун.

Резванова Айза

(Шаид Рашидовна ларамца)

Хьо хилла кхиийна халкъана,
Яхь йолчу оьздачу нанас.
Собаре, г1иллакхах вуьззина,
Даймехкан хилийта верас.

Хьо иэрна ца лаьлла дуьненчохь,
Дайн весет ахь кхочуш дина.
Т1аьхьенна бакъонан некъат1ехь,
Тешаме т1ай а тиллина.

Лаьмнашца, хьаннашца, некъашца,
Ц1ена дог-ойла ахь йекъна.
Илешца, байташца, безамца,
Адамийн бала д1аиэцна.

Поэзийн марзонах ийна,
Массане ирсе ахь вина.
Некъана накъост хьайх хилла,
Дахаре ойла денйина.

Дегнаш чохь даймехкан, халкъан,
Шерашкахь кхиийна безам.
Кхоллам хьан декъал беш тахна,
Д1акховдо хилла сан лаам.

Дахарехь некъ иэрна бина,
Ца кхечи тахане хьуна,
Делера кхаъ совг1ат хилла,
Хьо дукха вехийла тхуна.

Резванова Айза
       
(Мусхабов И.)

Цхьа миска ю иза,
Пекъар дуьненан.
Ахь бахар дуй теша,
Хетар хьо тоьлла.
Ахь соьга ла дог1а,
Ойла еш дикка,
Цул т1ехьа хаттарна,
Жоп суна дита.
Со пекъар ю хьуна,
Ю Дела миска,
Собарца 1емина,
Дика-вон дуста,
Яц хьуна со г1ийла,
Са меца дисина,
Дуьненан рицкъанах,
Ца 1ебаш йисина,
Со пекъар ю хьуна,
Ю Делан миска,
Со санна адмашна,
Декхар ца йисина.
Азаллийн кхолламна,
Дог реза хилла,
Ца йоха Делаца,
Тоба а дина.
Дуьненан хазаллех
1еха а елла,
Ца лелла дахарехь,
Со некъах тилла,
Юхалург делла са а,
Юьхь к1айн лелина,
Со-м Дела миска ю,
Хьо мичхьара- мила?!

Маршалла ас хотту хьоьга

1уьйренца дашо малх къега,
Зезагаш т1ехь лепа тхи,
Маршалла ас хоту хьоьга,
Сан нана йохуш хьан ц1е.

Совг1ат ду сайн кхоллам суна,
Реза ю дахарна со,
Собаре, дешийн лам санна,
Дог хьаста хиларна хьо.

Ирс а дац карош т1е иэца,
Цатоарх дахарехь и,
Самукъа сан марзо хьоьца,
Цул доккха ирс дуй те кхин?!

Хьан дагчохь ехийла б1аьсте,
Ца дог1уш кхоьлина де,
Ирс бухах дуьйлучу хьосте,
Юьгийла дахаро хьо.

Резванова Айза

Ца евза нана

Суна-м хьо ца гина, лаарх ган нана,
Амал а ца евза муха ю и,
Х1етте а б1аьргаша яздо хьан амат,
Цул хаза дуьненчохь х1ума дац кхин.

Хьан аз а ца хезна, сатийсарх хийла,
Саде1ар сацийна ладег1арх тийна,
Зов деъча сан лере, хьан озах ийна,
Цул мерза дацар-кха х1ума сан сина.

Ца карий хьан куьйгин ховхалла суна,
Хьо лоьхуш кхин наной къийларах мара,
Г1енаха хьо еъча сатийсам хилла,
Ма бовха кхаъ бар-кха сан дагчохь 1илла.

Сан нана, сан нана, теша со , теша,
Сан б1архиш лехьадеш хьо 1ийна соьца,
Дог хьоьстуш ахь сина парг1ато елла,
Самукъне сан елар и бахьна хилла.

 Резванова Айза

Гора дуьне

«Дуьне дош дац»,- цхьамма олу;
Ца кхеташ шен дахарах.
«Гора дуьне»,- вукхо хьоьсту;
Боцуш х1отто цунна мах.

Амма дуьне шек ца долу,
Хесторах, я чехорах.
Цо шен декхар ч1ог1а лору,
Ца кхоьруш ша дохорах.

Б1е шаре вай халла кхочу,
Бехкаш дохуш кхолламах.
Эзар шерийн бала токхуш,
Им ца духу, несаллех.

                Резванова Айза

( Х. А-Хь.)

Ахь дог1а ма детта хьайн дагна,
Ма кхера елларна не1,
Чиркх боцчу х1усамех дог хьегна,
Яций сом, г1аддайна йо1.

Я малхо шен серло кхоайой,
Ца къовлу, суьйренца ков,
Шеконех бух боцу г1ала яй,
Ма хьеде бехк боцу дов.

Барамал сов хеттехь сан лерам,
Бехк суна ма билла ахь,
Адмалла, г1иллакхе хьан хьехам,
Махкана бу беза мах.

Бодашка хьан дог ца къовлийта,
Тешавеш ца баарх дуй,
Реза ю сайн дахар дагадеш,
Хьан кхерчахь багийта суй.

Яц хьуна безамна со йогуш,
Я байна дуьненах чам,
Ца лало, адамийн дог лозуш,
Вайн дахар доллушехь г1ан.

      
                * * *          

Рицкъа  цахиларх а, вайн цхьана даха,
Ницкъ бац сан дагчуьра д1авайа хьо.
Реза ю дахарехь сатуьйсуш яха,
Сан безам, хилчхьана хьо суна ган.

1ожалло ц1еххьана мерза са лацахь,
Цунах а ларбийр бу, ас безам сайн,
Сан кошт1ехь б1аьстено ц1ен зезаг даьллахь,
Хаалахь, сан безам баланза буй.

Кхолламах д1аийна, сан дог цадаьгна,
Довза ирс хиларна йоккхае со.
Дуьненан сатийсам, ас дагчохь кхаьбна,
Эхартахь ас сайна воьхур ву хьо.

Хьо тешаш хилалахь сан дагна везнарг,
Ас хьанал дина хьан  безамна са.
Безамах ца тешаш, дуьненчохь лаьлларг,
Хилла-кха, са лелош, веллашшехь ша.
               

               

 

    Безамах  доьзна  ирс

Беха  некъ  бу,  дахарехь  ас  бинарг,
Йисте  кхочуш  лаьтта  х1инца  со.
Мерза  безам,  сан  дахарехь  хилларг,
Генна  т1яхьа  сецна  суна  го.

Дега  везар,  юха  хьаьжчи  гушшехь,
Со  жималло  чехайора  д1а.
- Д1а  ма  хьежа, бохуш,-и хьо  эшахь,
Кхочур ву хьо лоьхуш  т1аьххье  схьа.

Къегий  йоьлуш,  дог  сан  дохуш  кура,
Хьоьстуш,  дахар  хаздеш  суна  сайн.
Ткъа  куралло,  мотт сан  сецабора,
Суна  хьалха  дуьллуш  дашо  т1ай.

Дахаран  некъ, кхечи  х1инца  йисте,
Хих  со  ели,  лоьхуш  ирсе  т1ай.
Ткъа  ирс  хилла,  сан  безамах  доьзна.
Цунах  суна  диснарг,  дуткъа  тай.

                Резванова Айза               
             
(Жимачу Азина лерина)

Х1иллане мела мох, шок лекха баьлчи,
Ду моьттуш баьстенан самукъне аз.
Малх кхетта, 1аьнан цхьа де серла даьлчи,
Жимачу марг1ало, хийцира заз.

Г1уора т1елетарх а, шан м1араш къийзош,
И хазлуш къегира, цец доккхуш 1а.
Даш санна, дазделла, ло т1ет1а хьийзош,
Цо къиза, хьулйира, и хазна  д1а.

Замана гуш яра, ойла цо йина,
Г1о дан йиш йоцуш  ша, хетарна г1ийла.
Мохь тоьхна йилхира, и цуьнан къина.
Г1а-бецо оьцийла-кха бохуш:-хьан ч1ир.

Еъна схьакхечира, и къуона  б1аьсте,
Лайн чимаш делхадеш, 1иенийра хиш.
Жовх1арех лепачу шовданийн коьртехь,
Марг1ална хазийра безаман йиш.

                Резванова Айза

                * * *

Муьлхха  аг1ор  со  д1ахьежарх,
Хьан  сурт  х1утту  дуьхьал  схьа.
Кхечунна  со  ела  къежарх,
Ойла  хьерча  хьоьха  сан.

Хьан  г1алаташ  дага  лоьцуш,
Хьо  д1ахерван  г1ертарх  со.
Хьан  безамо  са д1алоьцуш,
Дагчохь  сецна  вели  хьо.

Хьан  безамо  лоцучул  а,
Лаьцнихьара  лазаро,
Моллийн, лоьрийн  дарба  лехна,
Йийр  яра  цхьа  парг1ато.

Кхин  молха  дац,   кху  сан  дагна,
И хьан  д1авше  безам  бен.
Цкъа  хьан  безаман  мут  мелла,
Дита  реза  ю  дуьне.

                * * *

                * * *

Ма хьежа соьга хьо,  хьайн б1аьргаш делош,
Ма г1ерта сан деган къайленаш ган.
Ламанех бухдуьйлу шовданаш мийлош,
Сайн дагчохь  кхиийна  безам бу сан.               

Ойланех сан хьерчаш дог ловза дохуш,
Сан б1аьргаш седарчех цо къагадо.
Безаман мут даго пхенаш чу уьйзуш,
Дахаран  марзонах со 1абайо.

Балано 1овжийна дог худаделча,
Шен ховха 1аьнарца дог досту цо,
Къизачу кхолламо г1елйина яйча,
Дог хьостий керла ницкъ цо суна ло.

Ма хьежа соьга хьо,хьайн б1аьргаш делош,
Ма г1ерта сан деган къайленаш ган.
Ламанех бух дуьйлу шовданаш мийлош,
Кхиинчу безамах къаьстар яц со.

                * * *

                Резванова Айза

Хьо х1унда ца кхета сох

Чуртана боьг1на т1улг санна,
Лаьтта со ойла еш хьан.
Ахь безам д1атиттар гена,
Х1ун ду техь, ца дуг1уш ла.

Безамо  жималле  йигна,
Лела со лууш хьо ган.
Кураллийн ч1аг1онаш эгна,
Дог эшош  когашк1ел  хьан.

Шайт1анна мох хилла хьийзаш,
Сан дагчохь безам бу хьан.
Дитт т1ера г1аш санна ийзош,
Идош  сан ойланаш  д1а.

Геннара  вог1уш  хьо  вайча,
Б1аьргийн  нур хьерча сан хьох.
Ткъа дагна хьо везаш хилча,
Хьо  х1унда  ца кхета  сох?

                Резванова Айза

Шовдана йистехь со лаьттара,
Йоккхаеш безамах сайн.
Ц1еххьана ахь соьга хаьттира,
Вуй теша хьан дагчохь кхин.

Йиш хилча деган не1 д1аялла,
Д1ахеца безаман нур.
Ойла еш со хьоьга д1ахьаьжча,
Дог лоцуш буьйжира гур.

Ягийча санна со ц1ийелла,
Йирзира малх балехьа.
Малхо шен нур сирла къагийна,
Набарха яьккхира со.

                Резванова Айза

Везачуьнга

               

Суна-м хаац, сел сов реза хилла,
Дог хьо волчу  х1унда г1ерта сан.
Ойланаш а керчаш  тулг1еш санна,
Хьан аматах хьерчаш керча д1а.

Къайлаха сайн кхолламе хьо воьхуш,
Дагчохь безам хьулбан г1ертарх со.
Хьо схьагича, б1аьргашчухул къегаш,
Безаман нур хьуна делало.

Когийн п1елгаш чуьра дуьйна зийзош,
Хьан безамо сан са ийзадо.
Доьху хьоьга: б1аьргашца цкъа хьастий,
Сайн дахарехь, ирсе ехьа со.

      
            

                Резванова Айза

Кхолламан а ю къайле

Б1аьргаш а стенна къегина,
Йоьхуш со хьан дагчу д1а,
Деган не1 ю хьан къевлина,
Дог1а а дац яста схьа.

Дог кхийсало, х1унда карзахе,
Серла даларх 1аьнан де,
Малх къагарх а йовхо цо цало,
Ткъа дагна безамо бен.

Когаш 1уьйра дуьхьал идарх а,
Кхачацало б1аьстене,
Шен зама ю массо х1уманна,
Кхолламан а ю къайле.

            Резванова Айза

Кхолламан кхел

Хьоьх  бина  сайн  синан  хьегам,
Хилла  хьан  безаман  лай.
Леллера  со  жимчохь  дуьйна,
Хьо  гар  а  ирс  хеташ  сайн.

Сан  дог  а  шех  кхача  хилла,
Лаьттина  безамна  хьан.
Дити  ахь  сатуьйсуш  1илла,
Дуьненах  байина  чам.

Шерашкахь  къийлина  ойла,
Сатийсам  и  мерза  хан.
Ца  туьгуш 1одика гойла,
Д1аели  шех  хилла  г1ан.

И  ю-кха  безаман  амал,
Йовр  йоцчу  марзонан  кхел.
Ца  бустуш  сан  синан  барам,
Дог  къуьйлу  цо  хьийзош  гел.

               Резванова Айза 

Сох кхета дерг

Хаза  зезаг, эрна  арахь  кхиъна, 
Наггахь  мархаш  дуттуш  дог1ан  хи.
Малх  бохбелчи, лаьтте  охьа  таь1на,
Мохо  сеттош  лесташ  лаьтта  и.

Иштта  безам  бу  сан  дагчохь  кхиъна,
И  зезаг  ду  цунах  кхета  дерг.
Ц1ена  безам,  шовда  сана  хьеъна.
Вац  сох  кхеташ  дагна  везаш  верг.

Йоьду  со  и  хаза  зезаг  хьаста,
Цуьнга  дуьйцу  ас  сайн  дагахь  дерг.
Рицкъа  доцуш  йиш  яц  кхоллам  хила,
Цхьаъ  хир  ву-кха, сох  а  кхета  верг.

                (Резванова 1айшатина)
               

                Дерриг  дуьне серла  доккхуш,
                Малхо  шен  нур  даржа  до.
                Сан  дог  кийрахь  ловза  дохуш,
                Гучу  йолу  1айшат хьо.
               
                Маьлха з1аьнарш санна къиега,
                Мохо ловзош месаш хьан.
                Стигал санна сирла б1аьргаш,
                Доьлу ойла 1ехош сан.

                Бешахь кхиъна хаза зезаг,
                Хьоьстуш гонах хьийза мох.
                Цуьна кхолламах дог хьоьгуш,
                Сан б1аьргийн нур хьерча хьох.

                Дуьне талла йоьду ойла,
                Марзо лоьхуш дахаран.
                Дуьне хетац  цхьа а хьесап,
                Хьоьха ваккхахь кхоллам

                Резванова Айза

 Д1абайна безам

Хьан  дешнаш  б1аьргаш чохь дац сан  ц1е  летош,
Я  безам   бац  кийрахь  дагадеш  дог.
Эрна  ду  ахь  дуьйцург,  хьалхалер  хеташ,
Хьежарца  дехар  а,  безамах  жоп.

И хилла  жималла,  самукъне  зама,
Хазачу  дешнех  а  1ехало  хан.
Дахарехь   лела  а, хала  дац  1ама,
Хала  ду,  вовшеха  цатешаш  1ен.

Кхолламан  къайленех  кхуьур  вац  атта,
Дерриг  а  цанисло,  хуьлуш  шех  там.
Къаьхьалла  ма  йита,  ахь  дагчохь   латта,
Мерзачу  безаман  талхабеш  чам.

Хазачу  1аламца  ойланаш  йоькъуш,
Собарца  туьттура   баланаш  д1а,
Даггарчу  безамца,  г1иллакхаш  лоьруш,
Дог  дуьзна  яра  со,  безамо  хьан.

Ахь  боху,  безамо  дог  дагош  лела,
И  даго ц1е йиснехь, хета  хьан  ирс,
Т1еххьара суй байна,  ойла   шелъелла,
Коьрта, т1е  йиллина  замано  йис!

                Резванова Айза.

            * * *

Алахьа  х1ай  сан  дог,
Хьо  х1унда  деттало.
Хьалхачул  сихделла,
Самукъне  кхийсало.

Б1аьстенан  1аламо,
Хьо  карзах  доху  те.
Я  бовха  кхаъ  кхийдош,
Синхаъмо  хьоьсту  те.

Безамо  тешадеш,
Нур  серла  дог1у  те,
Я  мерза  мутт  милош,
Дахийна  лела  те.

Алахьа  х1ай  сан  дог,
Хьо  х1унда  деттало.
Хьалхачул  сихделла,
Самукъне  кхийсало.

         * * *

                Резванова Айза               

                * * *

Б1аьстено бецанхелг санна,
Денъеш сан дахаре ойла.
Безаман мут мийлош денна,
Хьо дог сан 1ехийна ваьлла.

Цу малхо мархех чекхйоху,
            Нурдашо и з1аьнарш санна.
Б1аьргийн нур дагах чекхдохуш,
Иэший ахь сан кура ойла.

Со лаьтта хин б1аьра хьоьжуш,
Б1аьргашца хьан амат лоьцуш.
Хин тулг1еш со шайх а хьегош,
Д1аоьху вовшеха хьаьрчаш.

                * * *

                Резванова Айза

Бехк боцу ч1ир

Сан безам! Ма къийса ахь соьца,
К1еззиг бен ца йисна хан.
Лаарх а марзо хьоьха иэца,
Ца хили барт хьоьца сан.

Сан кийрахь дог х1инца деттало,
Халла д1аийзош хьан кир.
Яханчу хенах  ахь кхийдайо,
Юха а бехк боцу ч1ир.

Безаман ц1е яьгна д1аяйна,
Сийсаш бу цхьа жима суй.
Йовхо а лур йоцуш дахарна,
Схьалаьцча багабеш буй.

Дайначу ирсан лар карийна,
Йоху со ког боккхуш ба-й.
Цу некъакъ некъ хуттуш д1аяха,
Йитахьа со х1инца сайн.

                Резванова Айза

Т1улг т1улгах, кхета а мега

Коьртера сан кхетам д1аиэцна,
Кхин ойла ца еш хьо веха.
Хьаьрчина, сан дог ахь д1алаьцна,
Хилла хьайх, безаман 1еха.

Ойланаш, тулг1ешца идарх д1а,
Хьиекхалуш хьан деган бердех.
Къинхетам мичхьара хир бу хьан,
Т1улга ю, хьан деган г1айре.

Ас дог хьан безамах ца дилла,
Д1алур ду сайн мерза са а.
Д1ах1отта, безаман  т1улг хилла,
Т1уллг, т1улгах  кхета а мега.

               Резванова Айза

                * * *

Сийначу байт1ехь зезаг сетта,
Мохо хьоьстуш качделла.
Шовдан йистехь хазйо1 лаьтта,
К1ентан дашах там хилла.

Йоь1ан дагах тулг1еш етташ,
Керча мерза ойланаш.
К1ентан кийрахь дог кхийсалуш,
Бохь бухуш ду, безамна.

Маржа я1, сан  йиш елар - кха,
Хелхар дан шун ловзаргахь.
Амма ойла ю т1ам хьийзош,
Олхазарийн майданахь.

                * * *

           * * *

Ма г1ийла къега-кха
Дашо малх нохчий чохь,
Г1айг1ане ма хьоьжу,
Хьаннашка лаьмнийн бохь.
Чурташ а гуора шаьш
Х1иттина кешнашкахь,
Совдуьйлуш уьду хиш,
Цасовцуш  хоршашкахь.

Я Аллах1! Къизалло
Собарах дохийна,
Харцоно дегнаш чу.
Оьг1азло йоссийна,
Шен некъах тиллачу,
Бусалба Умматах,
Къинхетам белахь ахь,
Элчанан дуьхьа.

Х1ун г1уда ду теша,
Ца довлург текхна тхо.
Саьрмиках тарделла
Хьаьрчинарг даймахках.
Балане бода бу
Адамийн б1аьргаш чохь,
Питанийн ога ду,
Вежарий къаьстош тхох.

Дегнаш чу ерзаяй
Сан мерза, ойла
Сан б1аьргийн нур декъий,
Вовшашка хьежа,
Барт хилла, иманехь
Цхьана хорша дерза,
Ницкъ лохьа, Я Аллах1!
Хьо везар дуьхьа.

        * * *

                Резванова Айза

1ехавелла хилла со

Хьан ойла еш, хи йистехь лаьтта со,
Хьан аматах дог хьегош безамо,
Хи т1ехь схьаоьг1учу тулг1ешца,
Хьо йог1уш сурт х1иттало.

Доьлуш б1аьргаш хьан,
Дог хьоьстуш сан,
Безамах теша,
Суна ницкъ ло.

Лепа тулг1еш, хьан б1аьргийн седарчех,
Соьга хьоьжуш, шабарш деш хетало,
Со сайга къамел деш хи йистехь,
1ехавелла хилла со.

                Резванова Айза          

Самукъдаьлла сакъералуш,
Вовшах кхетар къобал до,
Тахана кху дезчу денца,
Шумассо ас декъала во.
Беркате де деънарг хилар,
Гойту кхуьнан дозалло,
Вовшашка маршалла хоьттуш,
Сан дагна там эша бо.

Дахаре чам шун ма бойла,
Бертахь дахар шуна лойла,
Безам марзо вовшен кхийдош,
Де мел дели ирсе гойла.

Серла баьлла боьлуш малхо,
1алам совг1ат вайна ло,
Машаре х1уо даржадина,
Дезчу денца декъал до.
Тахана вайн вовшах кхетар,
Вовшен болу безам бу,
Оьзда г1иллакх, вовшен ларам,
Дайша делла г1иллакх ду.

               
                Резванова Айза
Х1ай сан жима лулахо

Х1ай сан жима лулахо!
Йижайой хьо буьйсано.
Я сирлачу седарчех,
Дагаюьйлуш еха хьо.
Цу хьан б1аьргех тера лепа,
Стиглара цхьа сийна седа,
Сан дагчу нур 1енадеш,
Кийрара дог 1ехадеш.

Х1ай сан жима лулахо!
Г1аттайой хьо 1уьйрено?
Я мерзачу  г1енаша,
Са д1акхоьхьу лома хьан
И шовданийн зевне декар,
Цу хьан озах тера хета.
Сан дагчу зов 1енадеш,
Кийрара дог 1ехадеш.

Х1ай сан жима лулахо,
Сарахь хит1а йог1ий хьо?
Хьайха даха дог ахь дитахь,
Хьоь сатийса воллу со.
Цу хьан когийн лора тата.
Мохо лере кхоьхьу суна,
Сан даге кхаъ кхийдабеш,
Кийрара дог 1ехадеш.

                Резванова Айза.

                Марша дог1ийла керла шо

Х1е-х1ей !  Цхьа  барт  хили   вовшах  кхета  х1ей ,
Оьзда  г1иллакх  карла  доккхуш  дайн.
Хьаша вог1у вайга  к1айчу лайн,
Иза  т1е  ца  эца  йиш  яц   вайн .

Х1е - х1ей !  Марша  дог1ийла  хьо  керла  шо,
Жима,  вокха  вериг  ирсе веш,
Керла шо сан даго къобал до 
Сайн иллийца  ас  шу  декъала  до.

Х1еей !

                Резванова Айза

                1аьнан  1уьйре
 
                Дашо  з1аьнарш  лай  т1е  1енош,
Малхо  шен  кеп  х1иттайо.
Шан  куьзганах  тулг1еш  къегош,
Хиш  карзахе  ловзуш  го.

Дато  мархех  к1ажарш  юцуш,
Ц1аста  санна  ц1ийелла.
1аламе  шен  къайле  юьйцуш,
1аьнан  1уьйре  хазъелла.

Баххьаш  т1ехь  лайн  к1ужалш  хьийзош,
Ламанаш  го  самукъне.
Генаш  ийзош,  г1уора  ц1ийзош,
Хьаннаш  хьоьжу  цу  суьрте.

Сан  даймохк!  Хьох  хьоьгуш  г1ийла,
Ас  геналлехь  яьккхи  хан.
Сатийсина-м  ахь  а  хилла.
Совг1ат   дели,  1уьйре  хьайн.

Резванова Айза

Безаман ницкъ

Ас маьрша дуьтур ду, хьо лела некъаш,
Я дагчохь хьо сецош со йоьлхур яц.
Дуьне а лаьттар ду, шен 1алам хуьйцуш,
Безамо 1овжонза дахар хир дац.

Вай вовшех къастарах, соцур яц зама,
Некъаш а лаьттар ду, уьдур ду хиш.
Юха а 1уьйренца б1аьстенан хьоза,
Декар ду, лоькхуш шен самукъне йиш.

Къастанза ца яьлла, со хьоьха къаьсти,
Дуьллуш сайн мерзачу дахарах дог.
Кхолламца къийсарах тоьлур вац цхьа а,
Азаллехь яздина ду цунна куьг.

Маржа я1,хьо безам, ницкъ бу хьан ч1ог1а,
Делхо я дело а, адамийн дог.
Хьоьл тола луучо, хьо хьеста беза.
Собарца лоруш ша, мел боккху ког. 

   

                Резванова  Айза
Дог хьегадеш

Акхтарга  г1а,  санна  дегош,   
Сан  дега  пхенаш  ийзадо.
Безам  бахна,  ас  ен  ойла,
Ахь  ирчу  дашца  хеда  йо.
Кант  вала  самукъне,
Дош  ала  сан  ойла  1еха  еш.
Со-м  лела  дагахь  яц,
Кийрара  дог  хьоьха  хьегадеш.

Кху  дуьненан,  хазалла  хьан,
Б1аьргаш  чу  хьаьжчи  суна  го.
Сан  синкъерам, марзо  безам,
Ирсе  хилар  хьоьх  доьзна  ду.
К1ант  суна  ма  вела,
Сан  дагчу  б1аьргийн  нур 1енадеш.
Со – м  лела  дагахь  яц,
Кийрара  дог  хьоьха  хьегадеш.

Сирла  шовда  бух  дуьйлучу,
1аламо  дашо  сурт  диллинчу.
Безаман  юрт  вай  юьллур  ю,
Вайшинне  ирсан  нур  къегачу.
К1ант  хьалха  валахьа,
Ирсе  некъ  боло  вай  декъал  деш.
Со - м  лела  дагахь  яц,
Кийрара  дог  хьоьха  хьегадеш.

                Резванова Айза               
               Жена торнадо

Нагахь  елахь  зуда  хьан  торнадо      .
Хьуна  рации  телефон  ненадо.
Утром  меттар  г1аттале  хьо,
Хьевзина  кхуьур  ю  и  лахьо,
Хьуна  эладиташ  сколько  надо.

Если  у  тебя  жена  торнадо.
Хаамаш  бан  она  будет  рада.
Нахана  юкъе  даржо  луург,
По  секрету  ала  хетарг,
И торнадо разнесёт по свету.

Боккъал  елахь  зуда  хьан  торнадо,
Спутниковый  связь  тебе  ненандо.
Ты узнаешь  кхо  де  хьалха,
Мичхьар  доьда, и откудо,
Шек  ма  вала  связехь  ю  торнадо.

Дуьйцуш, олуш  меттиг  если  будет,
Уочарт  первый  лаца  незабудет.
Ц1ера  пошт,  или  ракета,
Х1умма  дац  быстрее  ветра,
Ах, торнадо  жёнушка  что  надо.
Ц1ера пошт или ракета,
Нечего быстрее ветра,
Жёнушка торнадо то-что надо.

 
                Резванова  Айза

Йиш  йоьхна  йог1у  со

Х1ай  зама!
Дитахьа  дай – наний  къиза  ка  ца  етташ  хьайн.
Марзонна
Орамаш  хедийча  х1ун  до  кху  дуьненах  тхайн ?
Хала  некъ
Ас  бина  цу  шинне  т1екхаьчна  совг1ат  дан  сайн,
Тахана
Йиш  йоьхна  йог1у  со,  дехарца  хилла  хьан  лай.

Х1ай  зама!
Ден-ненан  б1аьргаш  чу  хьаьжча  сайн  бералла  гой,
Йоьду  со ,
Дуьххьара  ког  боккху  бер  санна  болар  деш  дай.
Цу  шинне
Могшалла  ахь  къийзош  даге  ца  ладелла  сайн,
Тахана
Йиш  йоьхна  йог1у  со  дехарца  хилла  хьан  лай.

Х1ай  зама!
Ма  мотта  со  лелла  амалех  ца  кхеташ  хьайн.
Дуьненан
Хазаллехь  ма  мотта  къаьхьа  чам  суна  ца  тай.
Ден - ненан
Декхарх  со  ца  яьлла  ма  хетта  д1атекхна  сайн,
Тахана
Йиш  йоьхна  йог1у  со  дехарца  хилла  хьан  лай.

Х1ай  зама!
Хьо  уьду  т1аьхь-т1аьхьа  хьалхачул   болар  сих  дой,
Ден - ненан
Доггаха  дог  хьаста  хан  лохьа  цкъа  собар  дай.
Дахарехь
Ас  ойла  ца  йина  цу  шиннах  къастаран  сайн,
Тахана
Йиш  йоьхна  йог1у  со  дехарца  хилла  хьан  лай!

Сан  г1ала

Кхолламо гена со йигарх а,
Дог ойла хьоьца ю сан.
Дахарехь г1елъелла йисича,
Г1ала ахь суна ниц1къ ло.
 
Т1аьхьара олу:

Сан  г1ала,
Денна хьо  хазлуш  ю.
Дахарехь,
Марзо  сан  хьоьца  ю.
Даиман.
Хьо  хестош  дека  сан  зевне  аз.
Сан  г1ала,
Йоккхаеш  лела  со,
Де -дийне.
Ахь ирс луш еха со,
Самукъне.
Сан  деган  марзо  ю  хьо.

Хьан  шийла  шовданех  къурд  банза,
Хан  яьлла  хьогах  ю  со.
Сирлачу  урамех  доггаха,
Б1аьрг  тоха  хьегна  ю  со.

Т1аьхьара олу:

Сан  г1ала!
Соьлжа - хи  тулг1енех,
Хьаьрчина,
Б1аьстенан  1аламца,
Яьржина,
Ойланца  хьан х1усме  йоьрзу со.
Сан  г1ала!
Б1аьргашца  даима  хьистина,
Даггарчу  безамца ,
Къастийна,
Сан  дега  марзо  ю хьо.

Сайн  сина  пхенех ас буьллур бу,
Дег1аста  чу  боху  некъ.
Дагт1ера  салам  д1акховдор  ду,
Мохь  туххуш  Нана-Даймохк!

Т1аьхьара  олу:

Сан  г1ала!
Хьоьгара  маршалла  хаьттина,
Кийра ,
Хьан  марзонах,
1абийна,
Ирсах  ас  дузур  ду  сайн  дахар.
Сан  г1ала
Дайшкара
Г1иллакхаш сий дина,
Оьздачу наноша
марзйина,
Сан дега марзо ю хьо!
2007

        Безаман  лар   

Къайлаха  хьоьжуш  хьан  б1аьргаша,
Ойланех  дуьзира  дог.
Эхь  хетта  ц1ий  елла  беснеша,
1анийра  безаман  х1орд.
Лап  аьлла  тийналла  х1оьттира,
Хаалла  безаман  лар.
Махо  шен  шабарш  а  совцийра,
Х1отталуш  бемийн  уьйр.

Б1аьргийн  нур вовшеха  хьаьрчира,
Вай  довза  бахьана  х1оьттина.
Вайн  дегнийн  уьйраш  а  юьйцира,
Безамо  дашочу  з1аьнаршца.

Хьан  б1аьргаш  седарчех  къегира,
Йийсаре  лоцуш  сан  дог.
Когаш  к1ел  беттаса  даьржира,
Къобал  беш вашинна  некъ.
Ц1еххьана  буьйсанах  де  тардеш,
Дахарехь  къегира  нур .
И хилла   мерзачу  безамо,
Ирсана  диллина  кор.

Б1аьргийн  нур  вовшеха  хьаьрчира,
Вай  довза  бахьана  х1оьттина.
Вайн  дегнийн  уьйраш  а  юьйцира,
Безамо  дашочу  з1аьнаршца.
2008

Дуэт

Хьайн  б1аьргийн  нур,
Даржош  жимчу  дагчохь  сан.
Серла  даьккхи,
Ахь  сан  дахар  тардеш  г1ан.
Хьан  безамах,
Хьаьрча  х1инца  ойла  сан.
Б1аьргаша  хьо,
Цхьаъ ю лоьхург даиман.      
Хьомениг  сан.

Т1аьхьара олу
 
Х1унда хьега йо,
Ахь  хьайн  безамах  со,
Х1унда  ца  хаьржи,
Со  хьан  кхолламо.
Безамна  хьан,
Ц1е тилийна,
Ехар  ю  со,
Хьо  везарна.

Ас  доьхур  ду,
Сайн  кхолламе  ирс  хьуна.
Вай  къасторах,
Оьг1азло  ца  еш  цунна.
Сайн  дахарехь,
Безам  бовза  ирс  делла,
Хьан  ц1е  яха,
Бакъо  сайна  яларна.
Хьомениг  сан.
1981

Хьалхара – Марта.

Машаре малх кхетта,
Къегийла хьо Марта.
Беркате дебийла,
Комаьрша хьан латта.
Ирс 1енош даьржийла.
Хьан х1усмехь нур беттан.
Сий долуш йехийла,
Хьалхара - Марта!

Б1аьстено хьоьстийла,
Хьо мелчу мохаца.
Баланех ц1анйойла,
Дарбане дог1анца.
Яхь йолчу къонахийн,
Дог дузош лаьттийла.
Сий долуш йехийла,
Хьалхара - Марта!

Х1ай Марта – хи, сирла,
Хьо марша дог1ийла.
Тулг1ешца хьерчаш тхан,
Бералла хьистина.
Хьайх къурд бан хьегначийн,
Хьогалла яйина.
.сий долуш йехийла,
Хьалхара - Марта!

Хьан мерза марзонах,
Кийрар дог 1ебар дац.
Хьо санна самукъане,
Кхин меттиг карор яц.
Хьо хьоьстуш даиман,
Сан даго мохь бетта.
Сий долуш йехийла,
Хьалхара тхан Марта!

                Тешнабехк

Хьайх  тешаш  хьо  везаш,  лелачу  йо1на,
Хьайн  дагахь  хилла  ахь  лелош  дерг  х1илла.
Йо1  езаш, тешаме  дог  долчу  к1анта,
Вити  хьо  и  х1илла,  хьайн  дагчохь  1илла.

Тешнабехк,  тешнабехк,  соьца  цахилларг,
Тешнабехк,  ахь  суна  бан  лоьруш  хилларг.
Тахана  тешнабехк  бу  хьуна  хилларг.
Къаьсти  хьох,  хьо  везаш  тешаме  хилларг.

Де  хуьйцуш,  буьйса  а  йог1ур  ю  тийна.
Йочана  йиекхалур,  малх  кхетта  сирла.
Шовданаш  сан  ц1енчу  ойланех  ийна,
Мийлар  ахь  эрна ду,  хьайн  хьогаллийна.

Безамах  ца  къаста  реза  ша  хилла
Хьаьжнарг  а  хир  ю-кха,  шен  ирсе  г1ийла.
Хьан   деган  къайленаш  собарца  зийна,
Со-м  дохко  ца  яьлла,  хьо  волччахь  витина.

           Нохчийн  мотт

Кхолламо  йигарх  д1а махкана  гена,
Дог  ду  сан  бусалба, ду  нохчийн  ц1ий.
Дайн  г1иллакх,  ненан  мотт ду  сан  дозалла,
И  дицлахь д1а  довр  ду къонахчун  сий.

Дай - наний  лоруш  верг  Дала  а  лору,
Бохуш цу  Къор1ано беш  хьехам  бу.
Ша  винчу  ненан  мотт хиера  ца  болу,
И  марзо  шен  ц1ийца  д1аийна  ю.

Сан  баьргаш  дуьххьара, бераллехь  дуьйлуш,
Безамца  схьалаьцнарг  ненан  сурт ду.
Мерзачу  озаца  сан амал 1ехош,
Нанас со хьистинарг нохчийн  мотт  бу.
 
Ламанех  схьадуьйлу, шовданийн  санна,
Ц1ена  шен  бух  болуш  нохчийн  мотт  бу. 
Дашочу  1аламца куц  хуьйцуш  денна,
Къегина лаьтташ берг, сан Даймохк бу!
2006

                Вог1ур ву со.

Б1аьстенан  заз  санна  хьо сайна яйча,
Безамо  б1аьргийн  нур  сан  къага до.
Саде1ар  ца  тоьуш,  кийрахь  дог  соьцу,
Воккхавеш  дахарехь  йовзарна  хьо.

Самукъне  боларо, дег1а  куц  хаздеш,
Урамехь хьо йог1уш сакъерало.
Хьоьгарчу безамо дог ловза дохуш,
Со  санна  ирс долуш  кхин стаг ца го.

Безамо безачийн ойланаш хуьйцу,
Цхьаъ хьосту, кхечуьна  дог 1овжадо.
Азаллехь синошна дехнарг ло боху,
Ас х1етахь дуьйна а къастийна хьо.

Кхолламо яздинчу ирсах ца тешаш,
Уллешхул  т1ех  юьйлуш  д1аоьху  хьо.
Вайн дахар ирсе дан  сайн  бакъо  лоьруш.
Хьо сайна  д1айига, вог1ур  ву  со.
2007

Нохчийн  синкъерам

Схьагулло  х1ай  кегирхой  шу  суьренца,
Сингаттаме  ойланаш  д1акъахкаяй.
Дуьсур  ду  вай  кхана  дагалецамца,
Синкъерамехь  вовшех  марзо  эца  вай.

Т1аьхьара  олу.

Кегирхой  бу  баьргаш  къегош,
Ловза  дохуш  кийрахь  ц1ий.
Хаза  йо1  к1ант  хелха  долуш,
Х1орс - вай  бохуш  айдо  сий.
Буьйса  лаьтта  юккъе  йоьдуш,
Серла  дуьйлуш  седарчий.
Бетта  са  ду  вайна  доьлуш,
Къар  ма  лолаш  х1ай  нохчий!

Дахарехь  ю  самукъне  хан  къоналла,
Вота, пондар   ду  къоналлийн  да - нана.
Синкъерамехь  тхьамда  хелха  вокхуш  вайн,
И  бал  лоруш  тоха  т1араш  бертахь  х1ай.

Т1аьхьара  олу.

Синкъерам  бу  х1ай-те  боьдуш,
Самукъне  бал  кхечна  соь.
Мехкарий  бу къайлах  боьлуш,
Ирсе  ю  вайн  нохчийчоь.
Буьйса  лаьтта  юккъе  йоьдуш.
Серла  дуьйлуш  седарчий.
Бетта  са  ду  вайна  доьлуш,
Къар  малолаш  х1ай  нохчий!

Лекха  лаьмнаш  хьоьжу  вайга  айделла,
Мохо  кхоьхьу  х1ай – вай,-  боху  аьзнаш  д1а.
Зама  ахь  ма  къийсса  тхойца  къоналла,
Хир  ду  тхойгахь  даиман  яхь,  доьналла.

Т1аьхьара  олу

Хьаша  вог1у  вайга  маьрша,
Къобал  деш  вайн  нохчийн  къам.
Оьзда  г1иллакх  ду  вайнеха.
Мерза  кхача  синкъерам.
Буьйса  лаьтта  юккъе  йоьдуш,
Серладуьйлуш  седарчий.
Бетта  са  ду  вайна  доьлуш,
Къар ма  лолаш  х1ай  нохчий!
2007
               
Хьо дагчуьра вужур ву

Со-м д1айоьду, со д1айоьду,
Сайн дахаран ойла еш,
Кийрахь шийла, шовда уьду,
Тача огуш сан дагчохь.

Таьхьара олу

Ахь д1ататтахь, дуткъаделла,
Рицкъанан тай хедар ду,
Безаман лам хаьрцара бу,
Хьо дагчуьра вужур ву.
Ас кхиийна мерза безам,
Кхечунна товш хетар бу,
Дахарехь ирс кхуллур ду,
Мах замано хадор бу.

Со-м д1айоьду, со д1айоьду,
Хьан дашо дог хебадеш,
Ас кхолламе орца доьху,
Цакъасталуш безамах.
2007

Малх  бу  боьлуш
 
Б1аьсте  еъна, 1алам  дендеш,
Шен  зезагийн  совг1ат  даржош.
Зевне  эшарш, лоькхуш  уьдуш, 
Жовх1арш  санна  хиш  ду  къегаш.
Хьовсал  бераш, малх  бу  боьлуш,
Сакъералуш  серла  буьйлуш.
Бошмаш  ю  дато  заз  хоьцуш,
Хьозарчий  ду  шакарш  лоькхуш.

Вовшен  куьйгаш,  лаца  бераш,
Машаре  самукъне  х1оз  беш.
Бертахь  дахар,  вайна  марздеш,
Малх  бу  вайга  з1аьнарш  кхийдош.
Хьовсал  бераш, малх  бу  боьлуш,
Сакъералуш, серла  буьйлуш.
Вайн  даймохк  бу  денна  хазлуш,
Ирсе  некъаш  ду  схьадоьллуш.

Бераш, бераш,  тоха  т1араш,
Гойтуш  шайн  самукъне  хелхарш. 
Шун  синкъерам, ловзар, делар,
Ду  даймехкан  ирсе  хилар.
Хьовсал  бераш,  малх  бу  боьлуш,
Сакъералуш, серла  буьйлуш.
Вайн  даймехкан  байракх  лепаш,
Бутт,  седий ду стиглахь  къегаш.

Дешар

Бераш,  бераш,  киншкаш  ешар,
Дахаран  цхьа  маь1на  ду.
Ткъа  дешарах  кхеташ  хилар,
Иза  коьрта  толам  бу.

1илма  довзар, 1алам  дезар,
Дахаре  хьан  безам  бу.
Барт, безам, ирс  ларда  оьшург,
1илман  корта - собар  ду.

Иман, Ислам  довза  деза,
И  лоруш  верг  сийлахь  ву.
Оьзда  г1иллакх, хаза  г1уллакх,
И  дешарца  дозуш  ду.

Еша, яздан  1амош  вериг,
Вайн  дахарах  кхеташ  ву.
Ткъа  ца  доьшуш  лелаш  вериг,
Шен  дахарах  леташ  ву.

        Гуьйренан  раг1

Шен  амале  1алам  дерзош,
Гуьйрено  раг1  ийци  схьа,
Мохо  ийзош  диттех  къаьстош,
Г1аш  аренга  кхоьхьу  д1а.

Цкъа  малх  къега,  кхийдош  з1аьнарш,
Гуьйрене  шен  саламца,
Т1аккха  йоьлху, мокха  мархаш,
Латта  лийчош  дог1анца.

Генна  стиглахь, нисдеш  мог1наш,
Г1ийла  аьзнаш  хазош  схьа,
Г1арг1улеш  ю, дог  цадог1уш,
Кхечу  махка  йоьлхуш  д1а.

1аламо  т1еоьцу  лоруш,
Х1ора  хан  а  замана,
Цуьнан  йиш  яц, 1а  баьстенца,
Хийца  вайна  томана.

Схьагулло  х1ай, кегий  бераш

Схьагулло  х1ай  кегий  бераш,
Зевне  аьзнаш  декадеш.
Лоькхур  ю  вай  нохчийн  эшарш,
Вайн  даймехкан  сий  айдеш.

Схьагулло  х1ай  кегий  бераш,
Б1аьргаш  суйнех  къегадеш.
Гойтур  ду  вай  нохчийн  хелхарш,
Нанойн  дегнаш  деладеш.

Схьагулло  х1ай  кегий  бераш,
Оьздачу дайн  ларам  беш.
Вовшен  деза,  ирсах  теша,
Вай  1аморна  хастам  беш.

Схьагулло  х1ай  кегий  бераш,
Ирсе  некъ  аш  лаца  схьа.
Кхане  еъча  диц  ма  лолаш,
И  т1ехьенга  кховдо  д1а.
               
         Сахьтан цхьамза    

Хьалха  баларх  къуьйсуш  уьду,
Сахьтан  цхьамза  заманца.
Зама  гена  яьлла  йоьду,
Меллаша  шен  боларца.

Цхьамза  уьдуш  де  д1адели,
Кхечи  1аьржа  буьйса  т1е.
Замано  болар  ца  хуьйцуш,
Юха деа  сирла  де.

Эх1-х1ар  а,  г1елбелла  кхоччуш,
Цхьамза  сеци  гойтуш  шийтта.
Замано  к1айн  духар  духуш,
1аламан  а  хийци  сурт.

               
Исламан  з1аьнарш

Оьзда  г1иллакх, хаза  г1уллакх,
Уьш  исламан  з1аьнарш  ю.
Безам  марзо  ц1ена  ойла,
Уьш  исламан  з1аьнарш  ю.

Г1ийлачунах  къинхетам  бар ,
Уьш  исламан  з1аьнарш  ю.
Комаьрша  куьг  кховдон  лаар,
Уьш  исламан  з1аьнарш  ю.

Дений – нанний  муьт1ахь  хилар,
Уьш  исламан  з1аьнарш  ю.
Йиш – вешийца  ларам  лелор,
Уьш  исламан  з1аьнарш  ю.

Адмалла  шех  доллуш  хилар,
Уьш  исламан  з1аьнарш  ю.
Вовшашца   барт  безам  хилар,
Уьш  исламан  з1аьнарш  ю.

Ийман, собар  долуш  хилар,
Уьш  исламан  з1аьнарш  ю.
Бусалбалла  дезаш  хилар,
Уьш  исламан  з1аьнарш  ю.

Аллах1  Дела  цхьаъ  веш  хилар,
Уьш  исламан  з1аьнарш  ю.
Мухьаммад  вайн  бакъ  веш  хилар,
Уьш  исламан  з1аьнарш  ю.

Дерриг  дуьне  серла  доккхуш,
Маьлхан  дашо  з1аьнарш  ю.
Амма  дахар  ирсе  къагош,
Ерш,  исламан  з1аьнарш  ю.   

Дашо  месаш

Вижа  жима  Сурхо  д1а,
1аьржа  баьргаш  къовла  т1е.
1уьйре  еъча  борг1ало,
Кхойкхуш  сама  воккхур  ву.

Малх  г1аттале  г1отту  и,
Кхайкхадо  цо  сирла  де.
Нагахь  даг1ахь  йочане,
Аз  хуьйцу  цо  шен  зевне.

Массо  х1уман  хаам  бо,
Дашо  месаш, йолчу  цо.
Хьаша  вог1уш  и  хир  ю,
Кхаьънаш  дог1уш  йоьрзий  чу.

Шен  х1усам  а  ца  йицйо,
Котамашна  дола  до,
Ву  и  кертахь  дика  1у,
Цунах  теша  мегар  ду.
       
 Керла  шо

Рог1е  деъна  шийла 1а,
Хиш  д1алоьцуш  бина  ша.
Мохо боху, «Сихха же,
Кечло хьаша эца т1е».

Лайн  куз  тесна  арахь  д1а,
Хьаша  веъна  кхечи  схьа.
К1айн  к1урз  буьллуш  корашка,
Хуьтту  хьаша  массо  ган.

Кхеънаш  дохуш  вовшешка,
Дуьхьал  уьду  бераша.
Лайн  куз  сиха  къарз  бина,
Мара  хьерчаш  хьешана.

Марша  да  хьо  керла  шо!
Хьо  ду  деза  хьаша  тхан.
Оха  хьуна  кечдина,
Совг1аташ  ду  эшаран.

Цец  даьлла  пису

1аьнан  к1ур  хьийза  беш,
К1айн  ло  ду  дуьллуш.
Бераш  ду  даккхийдеш,
Самукъне  уьдуш.

Пису  ду  цец  даьлла,
Корехул  хьоьжуш.
Тарделла  полларчех,
Цунна  лайн  чимаш.

«Кегий  уьш  делахь а,
Ду  уьш  сов  шорта.
Царам  со  дуур  ду,
Долушехь  уьйт1а.

Цхьаннах  а  цакхоьруш,
Сел  майра  долу.
Ж1ала  а  лечкъина,
Шен  бунчохь 1уьллу».

Бохуш,- йо  ойланаш,
Писуно  жима.
Б1аьстенан   юккъерчу,
Баттахь  и  дина.

Писуна  гина  дац,
1аьнан  к1айн  туьйра.
Цундела  цец  даьлла,
И  кхераделла.

Элах

Сом  хьан  дуьхьа  велало,
Лууш  хьо  самукъне  ган.

Ахь  со  хьостий  1ехавой,
Туьллу  йовлакх  суна  хьайн.

Нана,  йовлакх  хьоьгахь  тов,
Лаац  лело  хьоьца  дов.

Тиллахь  суна  дадин  куй,
Хаийтахь  со  къонах  вуй.

Резванова Айза

Минкаил

Со-м  мацвелла ,
Чуьйраш  къекъаш.
Гучу  яла,
Церг  яц  туьгуш.

К1арс – к1ирс  бохуш  ю  цхьа  цуьрг,
Ахьа  г1ерташ, аьчка  1айг.
Нана  лохьа  худар  кад,
Лаац  каг  ян, жима  церг.
               
Зийнарш:
Дика  лулахо – бахам,
Вон  лулахо - бохам.

Г1уллакх  деш  вверг,
Дахарах  кхеташ  ву.