Къайгъы сёз

Къарнашы ёлгеннге, эски элге келдик,
адетде керекча къайгъы сёзню бердик,
миллет ачый эди аджымлы ёлгеннге,
Москвадан юйюне сал болуб келгеннге.

Алай сейир этер бир зат болду анда:
бизни бла ишлеген эгечи, орамда
ненча джип келгенин санаб бизге айтды,
"биз ма быллайлабыз", дерлей , ангылатды.

Эки кёзю къургъакъ, къарамы - орамда,
келген-кетген бары - аны санауунда,
ккарнашындан айтды, картларын кёргюзтдю,
алай бла да кёлню кесинден чиркитди.

Ёлген джокъ эсинде, эсиндеги келген,
багъалы машина, шохла, тенгле, берген...
да джаным ауруду аны этгенине,
джуукълукъ дегенни былай кетгенине.

Джангыз дуния мал баш сыйгъа саналыб,
адамлыкъ деген да гёзенге атылыб...
джюрегим буркъулду, кёлюм азар болду,
мыдах къаламым да муну джазар болду.

Бизге не болгъанды, былай бузулурча?
Малкёзлюк джашаугъа джан атыб турурча?
Къайдалла адетле, сезимли джюрекле ,
бир халкъ болур ючюн амалсыз керекле?!

2010дж.