Тимур ва адан команда ва я гилан девирдин волонтёр

Мегьриди вичин к1вале мани ягъиз (Шахселем), кул язава.И арада рак гатана,адан къунши дишегьли Жегьрихан
къвезва. Адаз вирида Жегьри лугьудай.

Жегьри. Саламадейкум, я Мегьри.
Мегьри. Алейкумасалам, Жегьри. Ша, ацукьа.( Стул вугуда). Вун вуч гьал я?.Фадлай акъатзавачир вун.

Жегьри. Валлагь, чан вах, кефиярни са акьван хъсанзавачир. Рик1 дар хьайила, акъатайди я. Белки вуна кьванни зи дердиникай хабар кьада лагьана.

Мегьри.Лагь кван, ахъая ви дерт-дуьгуьм, белки ваз регьят жеда,чан севдуьгуьм.Гилан гъуьлуькай ви рик1 секин я лугьузвайди тир вуна.Вуч хьана, я руш.Ви чин ч1уруз аквазва заз.

Жегьри. А ваз чидай гъуьл амачиз 3-4 йис я, я руш.
Мегьри.Гьик1, вучиз чара хьана?

Жегьри.Я руш, ада гьамиша"юкь т1ада лугьуз" арза ийидайди тир.Я духтурривайни адаз куьмек гуз хьанач.Жуван алачир сив я ман жуваз бала хьайиди.

Мегьри.Вуч лагьана вуна, нубатсуз гаф акъатнани?
Жегьри. Ваъ, я чан вах, шегьерда са хъсан дишегьли акъатнавай.Килигдай.Завай гъуьл гьадан патав ракъурун хьана. Мад заз я гъуьл ахкунач, я килигдайдини.

Мегьри. Ву..у.., я кьей тавур вах. ихьтин аламатарни жедани?! Вучат1ани а дишегьли ви гъуьлуьз дикъетдалди килигай хьтинди я...
Жегьри. Эхь , чан вах, заз зи вилералди акуна...

Мегьри. Ахпа гьик1 хьана.
Жегьри. Гьалтна зал са субай итим.Гзаф хъсанди тир.Тир. Лап гьа гилалди. Эхиримжи кьве арз я, нянин сятдин 9 хьайила, "Время" лагьана, ам дустарин патав физва.Югъ хьайила хквезва.Заз чидач вуч ийидат1а. Рик1 ч1улав хьайила, ви патав акъатайди я.Белки вуна са меслят къалурин.

Мегьри. яни адаз адахли ава ман.
Жегьри.Эхь,чан вах, йифиз гьана жезва,юкъуз зи к1вале.Ксуз хквезва.

Мегьри.Ак1 ят1а, ам дуьз рекьяй акъатнава ман.
Жегьри.Эхь, чан вах.Я айибунар чизмач,, я инсанвал кумач.Гьараюнарни заз ийизва  "лал хьухь" лугьуз.Зай гаф акъудзавач. "Заз дустарин патав фидай ихтияр авачни?" лугьуз,дели амалар ийизва.

Мегьри.Гила вуна заз яб це,са таниш дишегьлиди заз ихтилатна: чи шегьерда "Тимур ва адан команда" т1вар алай са к1ерет1 авалда, гьабуру дуьз рекьяй акъатнавай итимар чпин к1валериз, хизандин патав рахкурзавалда.
Жегьри. Заз къал-макъал, ягъун-кук1ун хьана к1анзавач эхир.Са ч1уру кар жеда. ахпа суд-дуван...

Мегьри.Суд-дуван вучтинди я, я Жегьри .Ваз аквада са гьафтедилай ви гъуьл хпекай галатай к1ел хьиз к1вализ хтана.Садра зун а танишдив рахан,ви к1валах ваз к1андайвал туьк1уьрда.Вун захъ агъугъ.

Жегьри.Яраб жедай кар я жал?
Мегьри.Тежедай кар за ваз хиве кьадачир.Садра за а Тимуранни адан командадин адрес жагъурин.Ат1а куьгьне девирдин Гайдара кхьей ктабдин игитар туш гьа. Гьабурулайни зурба крар ийизвай кьегьалар я.

Жегьри.Я аллагь, ви к1вал къуни хьурай, ваз яргъи уьмуьр ва бахтар хьурай.ваз са савкват и чандивай(хурудиз гъил яда).
Мегьри. Де хьана , я кас, са вад йикъаклай ахквада чун.
  (Алатна вад югъ)
Мегьри.Вич вичив рахазва: Яраб туьк1венач жал Жегьридин к1валах! Жеч эхир.

И арада к1вализ тади кваз атай Жегьриди Мегьри къужахламишда.
Жегьри.Ви чан сагърай, я аллагь, ширин Мегьри. Гъуьл кьве югъ я к1валяй экъеч1 тийиз.Вуна адаз запабар авуна жеди.Гьар гьик1 ят1ани ви чан сагъ хьуй, чан Мегьри. Ма( хъуьч1уькай чарчик кваз са вуч ят1ани акъудда)и парчадикай жуваз са костюмар цваз тур.

Мегьри.Секин хьухь, я Жегьриханум, савкьватар вучтинбур я, к1анзавайди ви хизан сад хъхьун я.

Жегьри.Акъваз садра вун, савкьватар мадни жеда. Я руш и кардин сир ачухайт1а жедачни?
Мегьри. Вучиз жедач кьван.Эверна за Тимураз,адан т1вар гьак1 я.Ви к1валин адрес гана ва кардин гъавурда туна.Ахпа ада вичин отряд галаз к1валахна. Бес ваз гъуьлуь са гафни лагьаначни?

Жегьри. Ваъ я руш,кьве гъилини кьил кьуна ацукьна хьана.Къе рахана:Вуна зал гьалдарнавай курц1улар вучтинбур я "дах...дах" лугьуз,вуна абуруз пул ганвани? За кьинер кьуна заз хабар авайди туш лугьуз,са жуьре секин хьана.

Мегьри. Лап хъсан кар хьана адаз.Вунни секин хьухь. Са гафни адаз лугьумир.
Жегьри. Я чан Мегьри, вуна ам т1илисимда тунани!
Мегьри. Я руш, за ваз лагьай Тимуран команда адан гуьгъуьна хьана.Ви гъуьл дишегьли галаз кафедиз, я ресторандиз фейивалди 3-4 аял адан патав фена к1евиз, виридаз ван къведайвал лугьуз хьана: "дах,я дах, ваз дидеди к1вализ хъша лугьузва.Вуна к1вализ гъида лагьай я як, я пасук1, я картуф чаз акунач.Вуна ресторанра чара дишегьлияр галаз кефер ч1угваз, чахъ т1уьн галайди тушни? Биц1екан шалвардин кек къазунна шумуд югъ я, ц1ийиди къачун герек я.Вун акатай дишегьлидиз "гуьзел" лугьуз гьахьнава".
 Гьелбетда и гафарин ван хьайи дишегьлияр катиз хьана.Ви гъуьлни аялриз, "квахь зи виликай, курц1улар" лугьуз экъеч1на хъфиз хьана.
 Гьа ик1, ча Жегьри вах, аялри ам жаздандал гъана, гьиниз ам фейит1ани, адан вилик Тимуран команда акъатиз хьана.

Жегьри. Я аллагьди хвейи Мегьри, ваз и дуьньядал алай кьван сувабар хьурай,ви чан сагърай.
  Мегьри. Килиг гьа, мад гъуьл квахьдайвал ийимир.
Жегьри.За вуч ийида ,я чан Мегьри?
 Мегьри. я руш, ви шумуд йис я? Ц!ипуд йис яни?Гъуьлуьхъ са т1имил хьайит1ани гелкъвена к1анда.
Жегьри.ВУ..у.., я кьей тавур вах,зун гелкъвезвачни!.Недайди ийизва, алайбур чуьхуьзва ва...

Мегьри. Жегьрихан, гъуьл мугьман туш..е ви к1вале авай.Адаз тавазивилер ая,хуш жедай келимаяр лагь, сивяй адаз "к1аниди" гаф акъуда - ам мум хьиз хъуьтуьл жеда, ц1рада...
Жегьри. Ву..у, Я кьей тавур вахар, чун жегьилар яни мегер?

Мегьри. Вун жегьил хъхьухь, тахиайт1а ви гъуьл мад "время" лагьана квахьда.
 И сеферда ам ви патав ерли хкведач.
Жегьри. Гъавурда гьатна, чан Мегьри. Вун гьахъ я.
Мегьри. Ак1 ят1а, вуна са кьуьл ая,за мани яда.

 Муьгьуьббат я ч1ехи девлет,
 Ам хуьн буржи я чи гьелбет,
 Садани гьич тавуй къелет,
 Бахт паталди ч1угван зегьмет.

 Ярдин кьиле ават1а гар,
 Мадни мийир адан кьил т1ар.
 Меслятдалди ая са кар,
 Гьуьрметдивди кьаз ярдин т1вар.

 Гьар са хизан бахтлу хьурай,
 Халкьдин юкьва адлу хьурай,
 Уьмуьрдин т1ям дадлу хьурай,
 Бахтар хьана шадлу хьурай.

Кьведани : Аминь!Аминь!