Арафатха кюу

Огъурсуз къач келди,  джарыкъ заман ётдю,
Ачы хапар келди, джан-джигиме джетди,
Санау-ёмюр  битди, ёлюм  ишин этди –
Арафат эгечим Хакъ – аламгъа  кетди.

Ауругъан санлары  джашагъандан талды,
Джаны учуб  Джерде джансыз тёнгек къалды,
Джюрекни, кёлню да къаты  бушуу  алды,
Ачымасыз къадар   ачы джара  салды.

Ариу джаякъларын тартхы байлау тартды,
Морсул кёзлерине ёлюм ауун атды,
Ол субай санлары, къымылдамаз къатды,
Буз джауум джаугъанлай, халкъ къайгъы сёз  айтды.

Къобузу  джабылды, согъулмазлыкъ болду,
Оту джукъланды да, джагъылмазлыкъ болду,
Юйю бошалды да,  джылынмазлыкъ болду,
Тартыуу, джыры да,  айтылмазлыкъ болду.

Джашау джанны къыллай санны онгсуз  этер,
Онгсузлукъну сезген Азраиль да джетер,
Джылаугъа, тилекге къулакъларын  битер,
Джанны тартыб алыб кёзкёрмезге кетер.

Сюйген эгечимден айырылдым энди,
Мени джашауумдан къуанч деген  кенгди,
Кёлюм джюрегим да къара джер бла тенгди,
Аны бла бирге насыб кёмюлгенди.

Огъурсуз къач келди,  джарыкъ заман ётдю,
Ачы хапар келди, джан-джигиме джетди,
Санау-ёмюр  битди, ёлюм  ишин этди –
Арафат эгечим Хакъ – аламгъа  кетди.

13.09.2024