Хайдакьла районнис 95 - дус

Дунъяличиб гьалжана


ГIинцби-хъярбала мягIдан,
ЦIудар тIутIила ВатIан,
Дунъяличиб гьалжана,
Дила хабарла Хайдакь.


Дила дагьрилизир калунтиван гьандуршулра Хайдакьличила далайла дугьби. Гьарли-марли баракатла, гьалжанала анхъличи мешуси гIямзи саби Хайдакьла ванза. Илгъуна хIебиалри, даршдусмала тарихлизиб, азирти балагь-кьадар дяхIярули илаб адамти хIербиэс бирути ахIенри. Дагъистайзиб гьачамалра хIукумат лебси ахIенри бикIутачил ну кьабулриркули хIерирус – лертири чула хIукмуртира, гIядатунира, дазурбира сарира диштIати улкни. Илдазибад мурхьти дусмала тарихлизиб гьанбуршули, сунечила мухIлили дурибти ахIи, белкIла тарих лебси улка саби Уцуми Хайдакь.


Уцуми Хайдакь 1500 дус биъниличила бурулри районна байрам жагабирули чебяхIкахъибси шаршавлизиб. Дила пикри хIясибли Хайдакьла тарих иличирра мурхьти сари, илаб жявхIейчибад халкь хIербирули лебтири, илдани мурталра, чула жан ахIерахIедирули ВатIан ахIерабирусири.


Хайдакьла районна бекI ГI.Темирбулатовла «Кайтагское уцмийство» бикIуси жуз нуни дигиличил белчIунсири ва иличила дила пикруми дурибси белкI «Замана» газетализиб «ВецIну шура пилра, шуцIали валрира» бикIуси уличил дурабухъунсири. ХIера ил жузлизир чедаахъили сари сунела ванзаличи уркIи-уркIиларадти диги районна бекI ГI.М.Темирбулатовли.


Ишди бурхIназиб, сунела сагаси тарихлизиб, Хайдакьла район акIубхIейчирад 95 дус дикнила байрам Мажалислизиб бетерхур.


Хайдакьланти байрамличил мубаракбарес бакIилри хIурматла гIяхIли – Дагъиста халкьла Собраниела председатель Заур Аскендеров, МяхIячкъала шагьарла бекI Юсуп Умавов, делхъла «Лезгинка» ансамбльлис гьуни чебиахъуси Жамбулат МяхIяммадов ва цархIилтира хIурматла гIяхли.


Игитунала аллеялизир, районна паркла мер-мусаличир, цIуба чятиртала удир мерладиублири Дахадаевла, Гумбетла, Табасаранна, Къарабудагъкентла районтазибад, чула районтала сархибдешунала савгъатуначил байрамличи бакIибти гIяхIлала выставкаби.


Чула сархибдешунала выставкаби гьаладихьилри Хайдакьла районна лерилра-сера шимала зяхIматчибанира.


Чучи бакIибти гIяхIли хIурматличил хьурабарес «ХIунтIен анкIили дицIибти усурбира, хьурали бакIибти гIяхIли мурдали гьунирбатес хIунтIена анцIилтира» Хайдакьла Уцумила мурталра дирутири.


УркIи разили гьуниваиб чучи бакIибти гIяхIлас районна бекI ГI.Темирбулатовра. ЦIуба чятиртала уди мерладарибти халкьла някъла устадешла, ванза бузахъантала, мицIираг адилкьантала, цархIилти сархибдешунала выставкабачиб, бакIибти гIяхIлира сайра, гьарилличи чебетаиб, илдани хIядурдарибти берклумала тIем багьур, някъла устадеш кьиматладариб, дам-дядла, далайла макьамтауб халкьличил делхъли кабухъун.


Республикала бекIла грант сархибси «Хайдакьанти» бикIуси миллатла центрли далкьаахъурти хIянчурби хIясибдариб.


«Хайдакьла район 95 дус биънила байрамличир даршдусмала мурхьдешлизирти тарихличилацун ахIенра нуша гъайдикIути, гIергъити 95 дусла тарихличилара бурулра, сунезирра дахъал вайтира гIяхIтира анацIбукьуни кадикибти», - викIулри Хайдакьла районна бекI ГI.М.Темирбулатов.


«ГIергъити дусмазир Хайдакьла районнизир сагати школаби, дурхIнала унхъри тIашдалтули сари, сагати гьундури дирули сари, шинна турбаби кадирхьули сари, жамигIятуни пайдалабикIути мерани къулайси агиличи дуршули сари, биштIаси ва ургабси бизнес гьалабяхI башули саби…


Камти ахIен дарибти, амма гьаннала гIергъи дарес гIягIнити гьатIира дахъал сари. Нушала бузери дигути халкьличил, гьатира жигарчерли бузерилизи ихъехIе…
ЧебяхIси ВатIа дергъла, 1999 ибил дусла анцIбукьуназир хайдакьлантани жан ахIерахIедирули бутIакьяндеш дарибтири, ва игитдеш чедаахъибтири. Гьанна бусягIятра СВО-ла дазурбачиб хайдакьланти лебилра улкала халкьличил ца къяйлизиб тIашкабизурли саби. БусягIятла заманализир, дузес, гьаладяхI дашес нушаб имканти акIубли сари, илбагьандан сарра нуша СВО-ла дазурбазир улкала сархибдешуни далтахъули дургъути. Илаб сархибси чедибдеш, лебил Рассиялисван нушабра чараагарли гIягIнили саби…


Районна байрамличил хIуша мубаракдирулра!» - викIулри халкьла гьалав гъайулхъули ГIялим ТIемирбулатов.


Дагъиста Халкьла Собраниела Председател Заур Аскендеровли, халкьла гьалаб Республикала БекIла саламтала кагъар белчIун.


«ХIурматла Хайдакьла районна жамигIят! Кьабулбарая хIушала районна байрамличил, уркIи-уркIилабадси дила мубарак! Хайдакьла районна халати тарихла баянтира, букьурли баибси дурхъаси культурала давлара, адам тамашавируси тIабигIятла жагадешра лер. Илди пикридарибхIели нушани иргъулра, себагьандан хайдакьлантани цIакьси гьимиличил, ибкьси жалличил  бургъули, секьяйда ахIерабарилил чула ванза…


БегIлара дурхъаси районна давла илаб хIербирути халкь саби…
МягIничебси саби, гьаннала гIергъира, чула ванзала кьисматлизиб, гьарилла пай лебси биъниличила бални, вегIла ВатIан гIяхIбухъахъес виубсигъуна пай кабирхьули узни. Вирхулра, цадалги дузули лерилра къияндешуни нушани дяхIяэс дирниличи…


ХIушала гьарилла юртаназиб даршудеш, ванадеш, балгундеш диубли дигулра!» - белкIири Республикала БекIла байрамла саламтазиб.


Заур Аскендеровли, Республикала БекIла саламтала кагъар, Халкьла Собраниела шайзибад, Дахъал дусмазибси ахъти сархибдешуначилси бузери багьандан ва жамигIятла гIямрулизи кабирхьуси халаси пай багьандан Баркалала кагъар ва сунела уличилси , Республикала БекIли бархьибси дурхъаси сягIят ГI.Темирбулатовла някълизи дедиб.


Районна байрамличил цалабикибти халкь мубаракбариб МяхIячкъала шагьарла бекI Юсуп Умавовлира.


«…95 дус - камти ахIен адамтала гIямрулизир. Лебил улкала халкьличил барх Хайдакьла районна халкьлира, колхозуни алкIахънила, ЧебяхIси ВатIа дергъла, «перестройкала», гьаннала заманала экономикаличи шурбулхънила ва цархIилтира къияндешуни дяхIяур. Лебилра тарихлизиб, адамтани ВатIайчи чула диги дарсдхIедариб…


Бурес дигулра, гIергъити дусмазиб хIушала район гьалабяхI башниличила, регионна ва федерацияла программабази каберхурли бузниличила. Районна бекIла жигарчевдешличил, пагьмуличил, чекайзурдешличил детаахъурти сари сархибдешуни. Илбагьандан илис баркалла викIулра!» - буриб сунела гъайлизиб Ю.Умавовли   


Юсуп Умавовли, ГIялим ТIемирбулатовлис, шагьарла администрацияличил цабалгунси бузери багьандан, шагьарла гIямрулизир мурталра бутIакьяндеш дирни багьандан МяхIячкъалала ХIурматла грамота бедиб, МяхIячкъалала жагали барибси суратра савгъатбариб.


Балбуц даимбариб дунъяличир хабардерхурси «Лезгинка» ансамбльли. Илдани вецIал хореографияла композиция чедаахъиб ва хайдакьланти делхъла устадешличи разира, тамашара биахъуб. ХIербикIути, хабарла делхъла устнас, хI****сурли хъатбикIулри. Байрамлизир гIурра гIяхIцад гIяртистунани бутIакьяндеш дариб.
Байрамла ахирличив «лезгинка» ансамльлис гьуни чебиахъуси Жамбулат МяхIяммадов гъайухъун. Дигиличил ансамбльла устадеш кьабулдарнилис хайдаклантас баркалла багьахъур.


«ТалихI саби нуша Дагъистайзир хIердирни, талихI саби ЧебяхIси Россиялизир хIердирни…


МягIничебси саби ишдигъунти гьунибаънибани нуша цадулгахъни, илкьяйдали, челябкьлализиб, район 100 дус биънила байрам, даршуси заклиуб, дураберкIес бетаъни. Илбагьандан нушаб гIягIнили саби СВО-лизиб чедибдеш сархни. Ишар нушала цадалгни дазуличибти бургъантани чебиули, балули саби. НушакIун илдачила гьарил манзиллизир пикридикIулра. Гьай-гьайра нушала концертра СВО-ла бургъантас хасбарибси саби.


Халаси баркалла лерилра байрамла бутIакьянчибас, байрам дураберкIес пикрибарибти гьуни чебиахъутас, лерилра хайдакьантас. ХIушала гIяхIялдеш ва барибси хIурмат дахъал дусмазиб, нушани хъумхIертехIе!» - викIулри байрамла ахирличив Жамбулат МяхIяммадов.