Ушникаш

               

       Т11ирг йоцаш ялар ераж, ма дик худдар, – йоах Фаридас – Заремай-м я хьона уж… , ишта лерга  1от1айог1а мара езац. Телефона д1атасса а езац. Деррига хьа хоз, телефон киса йолле а.
       - «Эцf сона уж моргаш»-  аьнна цо наьнага аьлача,  - «Хье балха яхача эцаргья 1а»- аьнна, соцадаьр из къамаьл нанас.
        Халимайна ч1оаг1а езар ший йоаккхаг1а йола йиша Фарида. Ишколе цо йоаккха ха дукха хетар цунна, т1аккха  балха йоде в1алла б1арга а гургьяц.
       Шинна лерга чуйоахкаш 1аьржа бурильгаш а йолаш, й1аьха т11ирг а йолаш ер Фаридайна беяьхкараш.
      - «Фуй из?»- аьнна Халимаза хаьттача - «Наушникаш я»- аьннадар цунга Фаридас.
      - «Фарида …»- аьнна кхайк нана, коча аьшк тохош йоаллача йи1игага.
      - «Аьшка юхе ма г1олахь, - аьле, тока чура аьшкасаьрг хьа а баьккхе, ц1аг1ара арайоал Фарида, ший лергех йоахка наушникаш истола т1а 1о а яьхке.
        Наушникашта б1арахьежаш латташ цхьа ха йоакх Халимас. Т11иргаш Фаридайна новкъа йолга кхетадора цо.
         Г1анд истола юххе хьа а тетте, истола т1а латтача Фаридай ручкаш, къоаламаш чудоахкача пела чура к1од хьа а ийце, наушникашта йоалла 1аьржа ши бурилг к1одаца хьахоадаю цо.
         Фарида юхаеча, ший бейоалла з1амига 1аьржа ши бурилг йишийга кховдаю Халимас, ше  даьчоа ч1оаг1а раьза а йолаш.
         Б1арахьажача юс Фарида.
       -«Хьанз хьога я Заремайяраж мо «ушникаш»,  т11иргаш а йоацаш. В1алла балха яха а езац» - оал Халимас, лохера ший боккха ши б1арг Фаридайгахьа хьожабийя.
     - «Хьанз-м я хьона уж бокъонца «ушникаш»- аьле елалу Фаридайна т1ехьа ц1аг1а чуяьнна нана.