Халима

  Балхара ц1а боаг1аш, берий бешара Халима хьаэца аьнна машен соцайир дас.
      Т1ехьашкара ни1 хьаел нанас, сиха цунна юхе 1охов Халима. Массаза нанас мерза хьама лора цунна. Ше хьачаховшехьа наьнага хьож Халима. Бакъда, нана из теркал а ца еш кора ара хьажар. Нанна юхе латтача т1ормеча хьож Халима кха ше нанас теркал ца йича. Г1ад йод йи1иг т1орме хьабийлача. Мерза мора бесса шоколад т1ахьакха къаьда печенеш йоахкар чакх са доалача пакетача. Из хьабаста аьнна Халимас кулг дахийтача, цунгахьа хьа а йирзий нанас оал – Уж аз сайна йицай чай мала аьнна.
    Наьнага кха хьама а ца оалаш юха т1ормеча хьож Халима.
    Печенеш хьал яхача гу цунна къаьда финикаш, къаьхата къопилгача а йохкаш. Шинна кулгаца хьа а лаьце т1ормечара хьал йокх цо копилг. Елало Халима. Цунна ч1оаг1а хоза хетар уж.
     - «Уж аз хьа даьна йицай марх дехка» - аьлле копилг хьа эц нанас.            Халима юха т1ормеча хьажача маькх мара хьама яцар. Шортта нанна юхе т1орме д1атотта Халимас. Цхьа ха йоакх йист  ца хулаш. Доккха са доакх б1аргаш дизза хий а этте.
      –Т1аккха со маькх  яа езаш е кх …- аьле кора ара хьож Халима.
Да е нана е цхьатарра белало из цо аьлача.
       - «Ай Дала йоахае хьо, са йи1иг, оаха хьона луддоацаш цхьаккха хьама дий укх дунент1а» - яхаш, б1аргара 1оаха доладенна хий д1а а доахаш марх еле хьост нанас Халима.