Цадеш чедибдеш саби

Ноябрьла 4 – Россияла халкьла цадешла БархIи

Россияла тарихлизиб ноябрьла 4 лебил урусла халкь цабиънила байрамла БархIиван 1613 ибил дусличибад дурабуркIусири.


Илис гьалаб 15 дус Россияла улка къиянти аги-кьяйдализиб калунсири. Улкала пача Фёдор Иоаннович Рюрикович гIелав букьур кахIели вебкIибсири. Урусла пачала тах буцес бахъал чилра ахIенти адамти хьулбухъунтири. Илдани улка гаши-дягIязи гIелабикахъибсири. Илди дусмазиб, дяхIи-шахли дигубли, хъумани сабухъ лугуси ахIенри, дуцIрумлизиб мурталра урзули, мицIираглис янилис дугени хIядурдарес бетаруси ахIенри. Илди балагь-кьадарлизиб 100 азирличибра имцIали Москваланти алхунтири.


Улкализирти далагардешуначи, Москвала Кремль буцили кайибси Польшала пача Сигизмундличи къаршили, цабиубли дурабухъунти урусла халкьлис Нижний Новгородла староста Кузьма Минин ва князь Дмитрий Пожарский гьабкьянаби бетауртири. Лебилра Россияла шими-шагьуртазиб бучили халаси гIярмия Москва буцибти Польшала интервентуначи чебухъунтири, илди Москвализибадра, Россиялизибадра дугIаибтири.


Халкьли викIили, тиладибикIули урусла улкала пачала тахличи Михаил Федорович Романов катурсири. Ил дурхIни гIелаб кахIели вебкIибси пача Фёдор Иоаннович Рюриковичла узикьарла урши сайри. Илала гIергъи 300 дус Романовхъала наслули улкалис пачадеш дирули калун.


1917 ибил дусла ноябрьла 7-личиб Октябрьла Социалист Революция бетерхурсири ва улкалис бекIдешличи бакIибти большевикунани гьаларла байрумти урдяхъибтири, ноябрьла 7 – ЧебяхIси октябрьла Революция бетерхурси байрамла БархIиван багьахъурсири.


Нуша гьанна хIердирули лерти халкьла уркIбазиб гIебшнила байрамра ноябрьла 7 – ЧебяхIси Социалист Революцияличил бархбасунси саби.


2004-ибил дуслизиб Россияла динани ургабси советли гьалабихьили, Россияла гьалабла байрам сагабарес пикрибариб. 2004-ибил дусла декабрьличибадси улкала Президент В.В.Путинна ХIукмуличил ноябрьла 4 Россияла халкьла цадешла БархIили багьахъурсири.


Байрам лебил Россиялизиб дурабуркIули саби, ил бархIи акьуси бархIили багьахъурли саби ва лерилра культурала учреждениебазиб, библиотекабазиб, музейтазиб, искусствобала бархIи дурабуркIули саби, шагьуртала ва шимала майдунтачир, парканазир, концертунала заланазир байрамла далдуцуни детурхули сари.


БегIлара жагати байрамла далдуцуни биалли чедибдешла сиптакар Нижний Новгородлизир ва Москвала ХIунтIена майдайчир дурадуркIули сари.
ГIергъити дусмазиб, Украинала дазуличиб дявила хасси балбуц бехIбихьибхIейчибад Россияла халкьла цадешла БархIи гьатIира мягIничебсили бетаурли саби.


Социализм биаб, гьаннала капитализм биаб ВатIан мурталра ца саби лебси. Нуша хIердируси улка Россия ахIерабарес нушачи хъарли саби. Илгъуна мурад сархес багьандан халкьлис цабиэс, цауркIли пикрибикIес гIягIнили саби, цархIилван биалли сегъуналра ВатIан хIебирар, халкьла ургаб бархибдеш бирар, улкализир гаши-дягIи тIинтIдирар.


Гьанна бусягIят улкала гьала тIашдизурти мурадуни сархес багьандан, лебилра улкала халкьлис коммунистунала лозунг гьалабирхьулра – Арали бираб Россияла халкьла цадешла БархIи!!!