Лайпан улу Билялны ёлгенине

ЛАЙПАН УЛУ БИЛЯЛНЫ ЁЛГЕНИНЕ

«Джангыз Терегинг»джелден бюгюлдю…
Минги тауунгу бузу юзюлдю…
Сюйген джуртунга хапарынг келди…
Джюрекге, кёлге тюйюм тюйюлдю.

Хакъ джолгъа чыкъдынг джуртунгдан кенгде…
Барыр онг болмай джуукъда, тенгде
Абзыраб къалдыкъ аман кеминде,
Къатынгда болмай ахыр кюнюнгде.

"Миллет" дегенлей сен ёмюр сюрдюнг,
Ич душманладан питналыкъ кёрдюнг,
Фахму нюрюнгю кенглеге кердинг,
«Акъ Сёзюнг» бла халкъгъа сый бердинг.

Адамлыкъда энг –асыл къыйылгъан,
Къарнашлыкъда энг – джандан къайгъыргъан,
Тенглик, шохлукъда – кертичи болгъан,
Дараджанг, онгунг – акъылда къалгъан.

Фахму кючюнгю, халкъынга бердинг,
Кесим демейин бир аны сюйдюнг,
Анга джакъ бола джауладан кюйдюнг,
Тыш джерге кетиб джуртха термилдинг.

Къуу-шуу болгъанды Къарачай ёзен,
Тузлу кёзджашы сызыла кёзден,
Къайгъы сёз берди миллетинг, ёзден,
Хатхусу тола ауур сезиуден.

«Хакъ Сёзюнг» джангы тёлюню бурур,
Муратларынгы халкъынг толтурур,
Джауунг, зарынг да, ыз къоймай, къурур,
Сени эскертменг тёр джерде турур.

Учуб кетгенсе Гъаршны чагъына,
Биз артда къалдыкъ, мудах сагъына…
Базманынг дженгсин сууаб джанына,
Бет джарыкълы чыкъ Аллах аллына.