Декабрь 08. 2024

Резванова Айза
Дадас боху

Нана, х1ун ду билгал даккхар,
Диэнош йуккъехь ,,Ненан де"?
Дадас бечу хьиэхамашкахь,
Хьуна кхочу массо де.

Массо совг1ат хьуна лоруш,
Диэкъа бохуш хьоьца са.
Баркалла а хьуна олуш,
Лара бохуш дахар хьан.

1уьйре, суьйре, х1ора м1аьрго,
Йаккха боху хастам беш.
Дуьненан малх стиглахь къагарх,
Хьо бу боху цуо, тхан малх.

Ненан йовхо йоцу х1усам,
Йохйеш йагац боху ц1е.
Боцчахь ненан озан узам,
Боху хилац самукъане.

Нана лоруш, нана хьоьстуш,
Даккха боху х1ора де.
Ненан куогашкахь йу боху,
Эхартан йалсамане.

Нана, д1а ма г1уолахь  цкъа а,
Хьуш тхан дахаран серло.
Дадас боху, бабас йаьхьна,
Д1а шен дахаран марзо.
*****

Айза Резванова

Уьш вайна гинарш ду,
цалайнарш, лайнарш а...
Дегнаш чохь диснарш ду,
Ца тайнарш, тайнарш  а...
Ов детташ, дог лазош,
Лаьтта уьш х1етахь санна,
Заманца йиц йан ницкъ
ца кхочу и къизалла.
Товр долуш сан дог дац,
къинт1ера а даьлла.
Сатийсам хир бу сан,
Заман йохалла,
Цкъа мацца хир ю кхел,
Дог 1абош, доггаха.
Хьовзор ю Дала гел,
Мостаг1ийн логах а.

Дала мукълахь!
2019
*****
И суьйренаш йог1у суна,
Жималлин сибаташца,
Да - нана, сан мерза зама,
Сан ойланехь кхарстайеш.
Дахаран хьеъна денош,
Мерза уьйраш хедаза,
Ма зовкх дар - кха, хьо х1ай дуьне,
1ожаллин раг1 ца хилча.
*****
Буьйса йу... Буьйса, цхьа аьхна,
Седарчий диссина лаьтта,
Бацалахь уьш башха лепа,
Зезагаш ду царна къиежаш.

Бутт хичу боьссина тховса,
Ч1ерашна тайна шайн хьаша.
Тулг1ешца бутт мара къуьйлуш,
Хьешаца хиш ловза дуьйлу.

Со тийна... ,,тапп" аьлла, тийна,
Цу суьртах 1ара, д1аийна.
Сатоссуш малх самабели,
Буьйсанан туьйра чакхдели.
*****