Наслубачибад баибси пагьмуличил

Ишди бурхIназиб Пачалихъла далайла ва делхъла «Дагъистан» ансамбльла жагали балкьаахъурси заллизиб Дагъиста Халкьла гIяртистка Пирдауз Камалова юбилейла концерт бетерхур.


Даргантасцунра ахIи, лебилра республикала халкьлис гьарли-марси далайла пагьму гьаргбируси цаибси ганз Пирдауз Камаловани гьарахъси 1977 ибил дуслизиб кацIибсири. Дагъиста радиола бекI редактор ГIяли ГIялиев ва редактор Луара ХIяжиева Камаловхъала хъалибаргла пагьмуличила передача хIядурбарес Дахадаевла районнизи, Хъярбукла шилизи бакIибтири. ИлхIели бегI гьалаб магнитофонничи белкIунсири «Набра дигулра дигай» бикIуси Пирдауз Камаловала далай. Ил далай адамтазирти умути дигайла хIялани черяхIдирули, халкьли тикрарбирулли, бучIули гьаннара лебал. Далай дарган далайла пагьмула кIялгIяла лацлизи кабихьибси мар-мар къаркъала бутIаличил цугбуцес вирар.


Гьарил дарган мез далусини далайра бала ва хъумхIерту.


Нуша хIердируси, адам тамашавиахъес гьамадли ахIенси замана саби. Гьанна гьарилла някълизир лер телефонти, илдазибад бусягIят жагали дяхъибти макьамтачил, хIед дигусигъуна далай зайбулхъули саби, дунъяла вайтира г1яхIтира чедаэс имканти алкIули сари. Велкъайчи укунхIели кьацIван, дахъдаибти сагадешунани адамти секIал гIяхIхIебилзути, секIайчи тамашахIебирути бетаахъурли саби.


Биалра, Пирдауз Камаловала далуйтала концертличи цалабикибти халкьли зал гарчли бицIахъилри, гьарли-марси пагьму кьиматлабирути гьаннара лебалнилис  илини бикьридеш дирулри.


Пирдаузлира илар сунела пагьмула къапу кьяли-кьяйчил гьаргдарили абхьиб.
Илала тIамали, зайдикIути макьамтани, даргала машгьурти поэтунани делкIунти далуйтала дугьбани концертличи бакIибти хIяйранбирахъулри. Илгъуна пагьму даршал дусли гьачамра дакIубиэс бируси ахIен, Пирдаузла далайла пагьму караматдешличил цугбуцес вирар. Илини лебилра пагьму, селра ахIерахIебарили, халкьлис гьалабирхьулри. Пагьму кьиматлабирутани Пирдауз Камалова
далайрикIуси сцена вавнала халубани бицIахъиб.


Пирдауз Камаловала юбилейличи бакIиб даргала халкьли хIурматбирути, чеббикIибти даргала вакилти Перзият Кьурбановна БяхIяндова, Зумруд Запировна Сулайбанова, МуртазагIяли Хуллаттаевич Рабаданов, Муса Расулович БяхIяммадов, Аминат ГIябдулманаповна ГIябдулманапова ва цархIилтира дарганти. Илдани Пирдаузлис уркIила ванати дугьби дуриб, ил савгъатуначил, вавнала халубачил мубаракрариб.


Дагъистан Республикала культурала Министрла заместитель Мурад ХIябибович ХIяжиевли юбилейличил мубаракрирули Пирдауз Камаловас хIурматла Грамота бедиб.


Концертла программа ахъси даражаличиб бузахъулри Пачалихъла далайла ва делхъла «Дагъистан» ансамбльла концертуни дузахъан Заира ГIямаровани. Илини гьарил далайла макьамтала ва дугьбала автортала уми дурулри, Пирдаузла биографиялизирадти баянтани концертла программа чебирцIахъулри.
Гьарил далайла мягIнара, макьамра, бучIнила даражара далдикахъилри, илаб сунечи бурсивиэс хIейруси, хала бегIтачибад Пирдаузличи баибси далай бучIнила пагьму гьаргбирулри.


Пирдаузла хала дудеш Кьала МяхIяммад ГIямарла Батирайличил гьачамцун ахIи къаршиикибсири, къушумлизир илдани далуйтира делчIунтири, цали итилла пагьмура кьабулбарибсири. Неш ПатIиматлира жагаси тIамаличил даргала халкьла далуйти дучIутири. Пирдаузла дудеш Камал МяхIяммадов Дагъистан Республикала урибси учитель сайри, илинира чилилра хIедалути, хIедакъибти сай-вегIти далуйти чугурла агилиур дучIутири. Пирдаузла цайли цаси узи МяхIяммад Камалов жагьти гIямруличив машиналичиб бехIемцI бетаурли итил дунъяличи арякьунсири. Илини Дагъиста телевидениелизир делчIунти чумал далай, халкьли гьаннара хъумхIертурли лерал, илди даргала далайла пагьмула дурхъаси хазнализи кадерхурти сари.


Рузила юбилейличиб, ГIямарла Батирайла далайлис белгьунси унцлизи бухъеси далай белчIун, Хазинат Камалованира.


Пирдауз биалли някълизи буцили микрофонра «мицIирти» далуйтани ручIес румсули ахIенри. Гьарил белчIунси далайли лехIирхъутала уркIбазир тамашала хIялани алкIахъулри.


Гьарил искусстволизибси пагьму, селрайчибра гьалаб, бамсриагарси бузери бируси саби. Пирдауз 1977 ибил дуслизиб бетерхурси фолклорла фестивальла лауреат ретаурсири. 1991 ибил дуслизир Дагъиста Гостелерадиокомпаниелизир рузахъес илала руководитель МяхIяммад ХIямидовли жирарибсири. ИлхIейчирад сунела пагьму ахъбикIахъули, Пирдауз сагати далуйти алкIахъули рузусири.
Ил 2004-ибил дуслизир Пачалихъла далайла ва делхъла «Дагъистан» ансамбльлизир рузахъес жирарибсири, итхIейчирад гьаннара илар рузули лерал.


Пачалихъла далайла ва делхъла «Дагъистан» ансамбльли Пирдауз гIерруцили, чула делхъла чердикIибти, жагати номерти хIербикIутас гьаладихьиб, иличибли концерт гьатIира жагасили бетаур.


Даргала театрла гIяртист Минатулла ХIусеновлира Пирдаузличил барх Дагъиста халкьла далай фонограмма агарли белчIун. Далай, пагьмула халаси челябкьлализи, бирхаудиличил кацIибси, ганзлизи халбирехIе.


Пирдауз гIерруцили Сарат ГIялиевала гъайличил, халкьла макьамличил жагаси далай белчIун даргала театрла гIяртистка Басират ГIябдуллаеванира.


Рустам Кьурбанадамовла ва Расул Рабазановла саби-бегIси «Гьалмагъдешличила» далай, наб дигуливан уркIиличи буцес хIериубра, амма ил гIурра даргантала ургаб зайбулхъниличи рирхулра, далай даим тикрарбирес лайикьсири.   


Пирдауз Камаловала хъалибарг, Хъярбукла шанти, лебилра концертличи бакIибти дарганти Пачалихъла далайла ва делхъла «Дагъистан» ансамбльла генеральный директор Дабай МяхIяммадович Дабаевлис концерт хIядурбарарахъес кумекбарнилис, Пирдауз гIерруцнилис баркалла бикIулри.


Гьайгьайрагу, илдигъунти коллективтас Дабай Дабаевгъунти пагьмучебти, халахIебурхути адамтани бекIдеш диралли, пагьму черяхIти ахъанайтачи абицIур. Илбагьандан саби Пачалихъла «Дагъистан» ансамбльра илцадра ахъти сархибдешуначил гьалабяхI башуси.


1978 ибил дуслизив ДГПИ-ла гьалабси 26 Бакула коммиссартала кьакьа бучIахъули, бяхъили жикьира далайикIуси Дабай Дабаев гьаннара дила хIулбала гьалав левал. Илкьяйда вехIихьили пагьмурти гIердурцули, гьалавяхI вашуси Дабай Дабаевлис гIурра дахъал гьарбизуни ва сархибдешуни дулгулра.

Халкьла уркIби разидирули далайрикIахъес Пирдауз Камаловна Камаловас чIумаси арадеш, хъалибаргла ва дурхIнала талихI, дахъал разидешуни, дунъяличир лерти дахъал гIяхIдешуни диубли дигулра.