Писателдикай кьве гаф

Писатель ва шаир Нажмудин Кьадиевич Шихнабиев лезги литературадиз 70-йисара атана ва гьам критикри, гьам к1елзавайбуру хушдиз кьабулна.Къенин мярекатдал заз адан кьве эсердикай ихтилат ийиз к1анзава.Алай йис уьлкве хуьзвайбурун йис яз малумарнава ва къе чи ч1алан югъни я.Гьавиляй за писателдин эсеррикай ватанпересвилин кьве гькая "Орден" ва "Асланни Тарас" хкянава.

   "Орден" гьикая "Дважды заслуженный орден"  т1вар алаз урус ч1алалди 2022-йисуз Москвада акъатзавай "Литературная газетада"(№ 18) чапна. "Аслан ва Тарас" 2024 -йисуз Дагправда газетдиз урусдалди акъатна."Лезги газетдиз" абур 2020 ва 2022-йисара акъатна.И гьикаяяр чи школайрин литературадин ктабра туниз лайихлубур я.

Амма чун сифте "Орден" гьикаядикай рахан.Ина Ватандин Ч1ехи дяведа лезги аскер Къазиев Салманан кьисмет гьихьтинди хьанат1а къалурзава.Немсерин концлагерь акур адаз анай катдай къаст авай ва и кар адалай алакьни авуна.Лап яргъаз акъатайла, адан рик1ел вичи "Яру гъед" орден са баракдин кьулуник чуьнуьхайди хтана. Вуч ийида? Мад лагердиз хъфидани? Ягъайт1а вуч ийида? Бес фашистрин чекмейри кьуьл гуз ам лагерда тадани? Салмана ам вахчун кьет1на ва ам лагердиз хъфена.Ам хъфейла, неинки немсер, гьак1 пленда авай чи аскерарни тажуб хьанай.Вири пленда авайбурун мурад чеб азад хьун тир, амма Салман вич хтанва.Салманаз немсери гзаф гатунар, азабар  авуна, амма вучиз ят1ани ам янач,чан аламаз туна.

Са кьадар вахт алатайла Салманаз мад катдай  мумкинвал хьана. Анжах и сеферда ада вилик амаз орден вахчуна. И сеферда ам партизанрин гъиле гьатна.Партизанрин командирди Салманан суьгьбетдиз яб гана ва Яру гъетрен  орден адав вахкана.Инай чаз ватан хуьз женгера хьайи Салманан акьалт1ай вик1егьвал,ватан к1ан хьун ва игитвал аквазва.

Кьвед лагьай гьикая "Аслан ва Тарас" исятда кьиле физвай СВО-дин вакъиайрикай я.
К!елзавайбуруз зурба таъсир ийидай сегьне Украинадин са хуьре кьиле физва.Асланан батальонди нацистрикай азаднавай хуьре амай сад-кьве душмандикай михьзавай.Са к1вализ гьахьайла, ам мягьтел яз цлад алай са портретдиз килигзавай.К1валин иеси гзаф яшар хьанвай дишегьлиди "вун квезкилигзава акьван дикъетдалди" лагьайла, Аслана жаваб гузва: Гьа ихьтин портрет чи к1валени ава.Ам, портрет цлалай алудна. далу патаз килигна.  Ана кхьенвай:"Тарас и Аслан навеки друзья." Зун и Асланан хтул я , зи т!варни Аслан я. и арада к1вализ тфенг гваз Тарасан школада к1елзавай хтул къвезва. Амма вири хъсандиз алатзава. Аслана  гъвеч1и Тарасаз рик1елай тефидай тарс гузва.

Ихьтин ватанпересвилин. игитвилин эсерар к1елайла, неинки са ч1ехибурун, гьак1  гъвеч1ибурун рик1ерани къени гьиссер гьатда ва руьгь мадни мягькем жеда.Ихьтин эсерри къенин девирда школайра к1елзавайбур ватанпересвилин руьгьдаллаз тербияламишунин карда лап ч1ехи куьмек я. Къейд ийиз к1анзава, и гьикаяяр михьи лезги литературный ч1алалди кхьенва.

Гьайиф къведай кар ам я хьи, ихьтин ктабар эхиримжи ватара школайрин библиотекайриз хквезмач.

Къуй, Нажмудин Шихнабиеван ихьтин эсерар гележегда мадни гзаф хьурай!