Х1ябал барх1или арзес вирусигу

Авторла колонка хIядурбирухIели ил дацIти дугьбала бетаурли хIейгахъира.
Бурасли, ириъ хъалибаргличил, тухумтачил рарх акьути бурхIназир, Дагъиста адамтас ва бахъал туристунас бамсриахъес гIяхIбизурси мерличи, Сулахъ хIеркIла къярдличи «Глав-Рыба» бикIуси халкьли бамсриихъуси мерличи рякьунра.
Илабси бамсриахънила гьав, уркIиличибси разидеш, кункдеш, бархIехъ хъули чарулхъухIели Буйнакъсклизи аркьуси мегьла гьунила мякьлавад шулумухъес хIейрули, сягIятра имцIалира тIашкайзурхIели бекIлил агарсиван бетихъулри.


БегIлара хIейгеси, хIу ярга баайчи сабурличил тIашкайзурхIели, гьунила дубличибад хяса-пухIла гулумтачил сабур хIебаибти шулумбулхъни сабри, сецадхIи тIашкайзалра илди абурхули ахIенри, хIела гьалабси машина гьалабяхI хIебашули тIашкабилзули саби. Къяна хIебурис, гьачам дила муруйра илкьяйда бариб. Дашу-хIедашули тIашси замана, сабурхIебарили гьунчиб тIашли калунтас гьалавяхI арякьун. Илкьяйда барибтас сабурла бегIти биргули саби. ТIягIямагарти тяхIяр-кьяйда детарули сари.


Илдигъунти тяхIяр-кьяйда Хасавюртлизи аркьуси гьунчир, Сулахъ хIеркIла мякьлабси мегьла гьунчир, ириъ ахIи, гьалабил дусра лертири. Гьаннара, сагали туристунала манзил бехIбирхьули саби. КIел, хIябал, цагьакIли дашули дакIибти машинаби, цацали, багьлали шулумдулхъули сари. Гьунчибтас бахъхIи тIашкабилзес чевкъули саби.


Ил гьуни, дила пикри хIясибли, Дагъиста ахIи Федерацияла бургар. Республикала хIякимтани илаб се-биалра барсбарес хIебирули биэсра асубирар. Амма секьяйда биалра, ил масъала арзес гIягIнили кьалли. Гьарзаси гьуни барнила гIяхIдеш кавлули ахIен, кьакьаси мерличи сягIятра имцIалира тIашкайзес чевкъухIели. Бахъал адамти илабси даражали инжитбирниличи, разиагарбирниличи пикри бяхIчиаэс чебиркур.   


Машинаби шулумдулхъахъес диргалабулхъуси мегьла гьунчибад аркьули, гьачамалра, сегъуналра поезд чехIебаира. Башулил, хIебашулил багьес агарси поезд багьандан, машинабала гьуни кьакьабарнили дахъал далагардешуни алкIахъули сари. Телеграм-каналлизиб иличила бахъал адамти зигарбикIули саби. Илди зигаръала гьанна гIяхIцад дусмазир духъяндитIи сари. Урусуни бикIуливан: «Мах гьаннара сунела мерличиб лебал».

Дила пикрили, ил масъала хIябал бархIили арзес виэси саби, иличи чузиб ахъри лебти адамтани пикри бяхIчиаалли.