Нуша, жагьилтачи, гIяхIси асар бирули саби

Ишди бурхIназиб Дагъистанна пачалихъла университетла филологияла факультетлизиб, даргала кьукья цалабикили, драматург ва прозаик ХIябиб Наврузов акIубхIейчирад 90 дус дикнилис багъишлабарибси балбуц дураберкIиб. Ил гьунибаъниличи вакIиб ХIябиб Наврузовла урши Навруз. Гьунибаъни абхьиб ва бузахъи ДГУ-ла кафедрала заведующий, филологияла гIилмуртала доктор Муса БяхIяммадовли. Илини драматургла гIямрула ва творчествола гьунчила буриб.
Наврузли сунела дудешличила ва илала хIянчурбачила дахъал хабурти дуриб. ХIябиб Наврузов акIубси сай Дахадаевла районна Дибгашила шилизив. БелчIуди таманбарили гIергъи, ГIямарла Батирайла уличилси Даргала театрла гIяртистли, театрла директорли вахъхIи узули калун.
Сунела дудешла суратуни, илини дуракаибти жузи («Багьадуртала наслу», «ГIяртист ва хъярчи», «УмцIули левалра», «Кьара-Кьурейш», «Пьесаби») чедаахъиб.
Дила пикрили, ишдигъунти гьунибаънибани нуша, жагьилтачи, гIяхIси асар бирули саби, илдас дебали багаладирули сари, студентунала даргала литератураличи, культураличи диги гьатIира мурхьдирахъули сари.