Гу лоцуш,хьаьвзина
Кешнийн керт лаьтта,
Цу кертахь цхьабосса
Чартийн б1о лаьтта.
Сих сиха уьш гуче
Буьйлу шен хьаьтта
Царна т1е нур хьоьрсу
Беттасан б1аьрг а.
Амал дац шуьгара
Хьал хаа, хатта,
Ойланехь тесна т1ай
Хьашаза лаьтта.
Д1алаьтта вайн йурт а,
Кхин хийцам боцуш,
Шу доцуш,х1умма а
Ца хилча санна.
Доттаг1чо саламца
Кхин г1иттор дац шу,
Доьзало хеттаршка
Дохур а дац кхин.
Шун вастийн хьежаро
Кхулу тхан б1аьргаш,
Гурашка дерзаро
Къуьйлу тхан дегнаш.
Кхин хир вац цхьа а шух
Дуьненан хьаша,
Кхин хир йац таро а
Оьшучу кхача.
Шо-шаре ле1алуш,
Д1аэхарх зама,
Шу цкъа а дицлур дац
Шу дезначарна.
Кхолламийн дойшкара
Раг1 кхаьчнарш биссош,
1ожалла, човс хилла,
Вайн гуоне хьийза.
Тахна шу, кхана тхо,
Ца вуьтуш цхьа а,
Массарна кхочур йу
1ожаллин раг1 а...
Автор Алимхажи Италагов
Шу цкъа а дицлур дац
© Copyright: Алимхажи Италагов, 2025
Свидетельство о публикации №225082900699
Свидетельство о публикации №225082900699
Рецензии