Заманан гуонехь

Хьовзахьа йуха цкъа, лег1инчу рег1а,
Серан дин чехабеш, со идда зама.
Хенара мас йожош, к1ант воссавехьа,
Цкъа мацах, цкъа мацах баьхначу, нана...

Г1енашка йирзинчу заманан гуонехь:
Къоьжачу ойланийн совдуьйлу кхехкар.
К1айн, 1аьржа аг1онаш хийцалуш рог1ехь
Дайначийн, лайначийн листало тептар.

Дуьненан баланийн раг1 лайна волчу,
Генарчу сан ден васт-ойланехь х1уьтту.
Дахаран марзонийн чам хиъна йоцу,
Г1ийла сан нана а, цуьнца схьах1уьтту.

Садайна, чуверза,-баьхна аз хийла-
Шераша д1адаьхьна, суьйренца хазац...
Т1ех аьрха тхан сур а, бераллехь идда,
Замано даржийна, рег1аца лацац.

Уьйр-марзо кегайеш, кегари бича,
Нисбича, тай тухуш, сайн уьйрийн х1оттам:
Къаналлин сан уьйрел-уллера хили,
Бераллехь левзина, сан жима Доттаг1...

Ца кхоош, хин т1адам, хих хьаьгначунна,
Латтийна 1индаг1 а, шех ваьшначунна,
Рог1ера, ц1етоьхна, гуо кхиош йог1у,
Хийлан гуо кхиийна, заманан йорг1а.

Сатасар даржале-садар а кхечи,
Гандоьг1нарг гайтина, дахар а дели.
Делахь а тоьур ду, уьйрашна везнехь,
Хьо везаш хиллачех-марзо ахь эцнехь.

Автор Алимхажи Италагов