Преставление преподобного Сергия Радонежского

Тропарь прп. Сергия Радонежского, глас 4
Иже добродетелей подвижник, / яко истинный воин Христа Бога, / на страсти вельми подвизался еси в жизни временней, / в пениих, бдениих же и пощениих образ быв твоим учеником, / темже и вселися в тя Пресвятый Дух, / Егоже действием светло украшен еси / но, яко имея дерзновение ко Святей Троице, / поминай стадо, еже собрал еси, мудре, / и не забуди, якоже обещался еси, / посещая чад твоих, // Сергие, преподобне отче наш.

Кондак прп. Сергия Радонежского, глас 8
Христовою любовию уязвився, преподобне, / и Тому невозвратным желанием последовав, / всякое наслаждение плотское возненавидел еси / и, яко солнце, Отечеству твоему возсиял еси / тем и Христос даром чудес обогати тя. / Поминай нас, чтущих пресветлую память твою, да зовем ти: // радуйся, Сергие богомудре.

Другой кондак прп. Сергия Радонежского, глас 8
Яко безплотным равножитель, / всех преподобных превозшел еси / постническими труды и бдении молитвенными, мудре Сергие, / тем восприял еси от Бога исцелити недуги и прогонити бесы, / и того ради вопием ти: // радуйся, отче преподобне Сергие.

Величание прп. Сергия Радонежского
Ублажаем тя, / преподобне отче наш Сергие, / и чтим святую память твою, / наставниче монахов // и собеседниче ангелов.