Умутха

Умут, къайдаса,
Къалайда тасса?..
Акъыл кериучю,
Джол тюзетиучю
Сен тюлмю эдинг,
Нек кетди эбинг,
Неден джумулдунг,
Кенгде бугъундунг,
Себеб этмезлей,
Адам джетмезлей?!

Джерде – джакъсызлыкъ,
Зулму, артыкълыкъ
Тамыр атханды,
Чагъыб-чакъгъанды,
Кёз ачдырмазлай,
Баш къалдырмазлай,
Сен а къачханса,
Халкъны атханса,
Болгъанны биле –
Кёрмезден келе.

Умут, къайт бизге,
Талпыу  бер ёзге,
Санланы тире,
Болмазлай хыре,
Акъылны къатдыр,
Къоркъууну атдыр!..
Зулму онгмасын,
Джек-джин къонмасын
Ёмюрлюк джуртха!..
Къайт бери, артха!

Мычыма, умут,
Мугурду Джер –  джурт,
Сен кёлге кирмей,
Силкиниу бермей,
Иш джюрюмейди,
Джол кёрюнмейди,
Урланнган хакъны,
Аджашхан  халкъны,
Ызына  къайтар –
Бол чыракъ тутар!


Къара кюч – къанлы,
Ибилис джанлы.
Къан джугъу  Джерде
Тюрленнген тёрде
Турады душман!..
Тёгерек – тубан,
Дуния – къара,
Джюрекле – джара,
Сен кёлге джетмей,
Бир мадар этмей,
Барабыз – таргъа –
Къуюлур джаргъа.


Рецензии