Сема ойланаш

 СЕМА ОЙЛАНАШ
(цхьа кийсак)
____________

Некъан хьал – некъ бинчун девза,
Хало-ма – иза Iаьвшинчун йевза…
Дог-семачун – орцан мохь хеза,
Чам а хуьлу къаьхьа, мерза йа теза…
_______________________

Дас динчу хьехарах дуьйцур ду кIанта,
Да воцуш висина, ша хене ваьлча…
Шен дашах жоп лур ду, боцуш и гайтам,
Стаг волчо, и аьлларг шен багах даьлча.
_______________________

Вешеха довха дош, доггаха, эра ду
Ваша воцчу, гIийлачу, Йишас…
Сийлаллин лакхенах лаьцна дерг дуьйцур ду
ВорхI вешин, жимагIчу, Йишас.
_______________________

Хиллачийн маьIнаш а достуш
Дуьйцур ду воккхачу Дадас.
Са сема хиларах лаьцна
Дуьйцур ду доьзалан Нанас.
_______________________

Ваша воцуш висинчу Вашас
Хьулйина латтор йу гIайгIа…
Йахьечу жимачу кIанта
ТIаьхьене дуьйцур ду Дайха.
_______________________

Хаддаза хиллачу сатийсамах
Дуьйцур ду Даймахках даьккхинчу Къомо.
Доьналлех цадохарх лаьцна
Дуьйцур ду къиза тIом лайначу Къомо.