Джазыкъсыныу

Бир мудахды адамланы кёзлери,
Ахсыныу бла бёлюнелле сёзлери,
Даулет къысыб, джокълукъ басыб юслерин,
Башчыла уа махдайдыла кеслерин.

Эресейни адамына ачыйма,
Тюзелмеген кърал халына джарсыйма,
Миллет тамам, джашауундан тойгъанды,
Ашхы умут этиуюн да къойгъанды.

Башчылада сёз-семиз да, иш-арыкъ,
Эресейли кёралмайды бир джарыкъ,
"Тамбла джашау тюзелликди", дей, алдай,
Алай бла ёмюр барад, кюн сакълай.

Оноучула бир-бирини джан-джагъы,
Орун алгъан адам улну алчагъы,
Бай джуртубуз тинсизлеге аш болду,
Халкъгъа джетген-эки кёзде джаш болду.

Тилкъау къауум бийлик тёрню алгъанды,
Адеб тышы адетлерин салгъанды,
Джангы тёлю ата ёзден къобханды,
Бурунгулу тин байлыгъын атханды.

Мурдарлагъа сый биерилген - бир заман...
Борбайланыб бетсиз, антсыз эм аман,
Халкъны сёзю башчылыкъгъа джетелмей -
Хал былайды, кёлден бушуу кетелмей.

Ким биледи, не сакълайды даулетни,
Тёзе-тёзе тёнгек болгъан миллетни!..
Джан джашаудан аз да татыу алмады,
Ийнаныу да, ышаныу да къалмады.

1994дж. Москва.