Къач джел ура таудан тикге -
Джангыз чапракъ, къоз терекде
Суукъ джелге ёшюн салыб,
Бутагъына бек къадалыб,
Кеси-кесин къатдырады,
Джан - урушун бардырады.
Джарлы чапракъ туу болса да,
Деу бутакъдан ёз алса да,
Эндреик ай аны буар,
Тартыб, юзюб джерге къууар,
Ол палахдан ол ётелмез,
Джаз чагъына ол джетелмез.
Заман-залим, келе - келе,
Джайны кючюн бёле - бёле,
Къач бла бирге ойнашады,
Суукъ джел бла байлашады,
Бир - ура, бир - симсирейди -
Агъыу чакъны белгилейди.
Чагъыу заман... Агъыу заман...
Бири бирин къуа, хаман
Джерге джорукъ салыннганды,
Хакъдан изин алыннганды.
Заман блады - келиу, кетиу,
Азау джарыу, саусуз тюшюу.
Къоз терекде - джангыз чапракъ,
Бети - сары, юсю - къургъакъ,
Буз аяздан бюгюледи,
Къадарына тиреледи...
Алай аджал шартдан таймаз-
Ачы ишин этмей къоймаз.
2019. Сочи
Къоз чапракъ
© Copyright: Софи Трам-Семен 2, 2025
Свидетельство о публикации №225111001254
Свидетельство о публикации №225111001254
Рецензии