Дертчи Хайдаргъа

"Кёрюб болмайма", дейсе, ачыулу,
Ачытханланы эсге тюшюре,
Кёлюнгю аллай уу бла кюйдюре
Къачаннга дери турлукъса даулу?

Тыкъ-тыкълам болса ачыудан джюрек
Башха бир сезиу ары киралмаз,
Аллай адамгъа адам джанашмаз,
Джуукъ-тенг къачар, шох болур ирек.

Унут, кетсинле ол эскериуле
Джанны, санны да саулугъу ючюн,
Джойма алагъа джюрекни кючюн,
Акъылны бёлюб дерт джетдириуге.

Ичинги буугъан ачы тюйюмню
Быргъа тышына, кечмеклик бере,
Ашхыгъа ачыл, къашынгшы кере,
Кёлюнге кирсин джашау сюйюмю.

Ол заман Джер-Джюз сейирлик болур,
Джуукъ-тенг - бары сени эслерле,
Сени бла тенглик, шохлукъ излерле,
Сыннган кёлюнг да нюр бла толур.

Дерт тутхан адам ырнык кёллюдю,
Сен аллай болма, джолунгдан алджаб,
Хорлатма дертге, кесинги алдаб,
Терс бла тюзге - Аллах хакимди.

Аламны къургъан хар затны кёрюр,
Бир джан терслигин чекмей кетмейди,
Дерт джетдириу иш бизге джетмейди,
Хар кимни хакъын Джаратхан берир.