Джангызлыкъ

Джангызлыкъ бла арам бираз тик болгъанды,
Мудах ауангысын юйюме салгъанды,
Тёрт джанымдан манга, сымарлаб, къарайды,
Къачан бюгюлюр, деб, кюнюмю сакълайды.
Алай бу сюйюмсюз бираз аджашханды,
Мени джашауума бошха къатышханды:
Джаратханны билген джангыз болмаучанды,
Джашау хузуру да чыртда таймаучанды.

Ийнанчсыз бла ангсыз джангызлыкъдан къоркъар -
Къайары шогъайгъа эшиклерин ачар,
Тюшюннген, ийнаннган джангызлыкъдан къоркъмаз,
Бушуугъа хорлатыб, къутун атыб турмаз.
Мени джашауумда джангур, къар да болду,
Ырхысы да келди, бораны да урду,
Алай ала мени иленнген этдиле,
Сора джыгъалмайын кериге кетдиле.

Эндими джангызлыкъ мени бюгерикди,
Олму аягъымы джерден юзерикди,
Олмуд сёзлериме мудахлыкъ джетдирлик,
Ёхдем джюрегими адаргы этдирлик?
Огъай, быллай джауну тёрюме салалмам,
Аны бла ушакъдан бир татыу алалмам,
Эшикни ачханма - чыгъыб кет менден, деб,
Шох,тенг, джуукъ чыкъмаз, сюйюмсюз-сенден, деб.

Мен, ёлюм келсе да, ёретин тюберик,
Кетер кюн келсе да сынчыусуз кетерик,
Джараханнга кёлю чыртда джабылмагъан,
Адамлыкъ ёзеги тот бла къабылмагъан,
Джангызлыкъ дегеннге тирелир кючдеме,
Аллай ауурлукъну хорлар ёлчедеме,
Джашауну сынадым, сокъмагъын билгенме,
Ёзюмден аджашмаз болумгъа келгенме.

Ишинги асыуу кёлню кёлтюрюрсе,
Ашхы мурат, таймай, кенге керилирсе,
Халкъынгы асылы кёллендире эсе,
Къралынгы хузуру тёллендире эсе,
Джуукъ-тенг джылыуу джылытыр болурса,
Рабби-Хакъ джюрекни тёрюнде турурса,
Джангызлыкъгъа анда джер табылмазлыкъды,
Мугурлукъ ол джерде орналалмазлыкъды.

2007 Анкара