Бурунгу сёзле

(анамы джерслеринден)

Тохум  кёммеген - мюрзеу алмайды,
Къазыкъ урмагъан - фатар салмайды,
Бичен чалмагъан - май ашамайды,
Халкъгъа терс болгъан - тюз джашамайды.

Ишни сюймеген къытлыкъгъа батар,
Аман къурумлу - аманны табар,
Асылсыз шогъай къошунга чабар,
Асыл нёгеринг терсинги джабар.

Амал билмеген - абына джюрюр,
Сый бере билген - сыйлылыкъ кёрюр,
Билимсиз адам учхара къалыр,
Анга бир башха  "боюнсха салыр".

Чыныкъмагъанны - бели ауруучу,
Терсакъыл болур джангыз къалыучу,
Адебсиз адам тёрге чыкъмайды,
Акъыллы адам намыс джыкъмайды.

Къоркъакъны джаны титреюк болур,
Сескекли къарай илгизлик турур,
Джигитни кёлю - Дуния чакълы,
Ол джетген джерде - онгусуз джакълы.

Халал кёллюге игилик келир,
Харам кёллюге Хакъ джарсыу берир,
Тигим этгенни шхууру - татлы,
Хатерсиз адам - тюртсюн сыфатлы.

"Кесим", дегенни - гёзени толу,
"Хаплкъым", дегенни - онгаргъан онгу,
Къоркъакъ минг кере чалдышдан къарар,
Батыр минг кере хорлам джагъалар.

Нарт айтыулада - акъыл бла сезиу,
Аланы билген сынамаз эзиу,
Бурунгуладан оюм алайыкъ,
Джашауубузгъа бичим салайыкъ.