Святитель Нектарий Эгинский

Тропарь
Преподобнически пожив, яко мудрый иерарх,/ прославил еси Господа/ добродетельным житием, Нектарие преподобне./ Темже, Утешителя прославлен силою,/ Божественными мощми твоими,/ демоны отгониши и болящия исцеляеши,// верою приходящия ти.


Иной тропарь
Силиврии отрасль и Эгины хранителя, в последняя лета явльшагося, добродетели друга искренняго, Нектария почтим вернии, яко божественнаго служителя Христова: точит бо цельбы многоразличныя благочестно вопиющим: слава прославльшему тя Христу, слава давшему ти чудес благодать, слава действующему тобою всем исцеления.


Кондак
Божественный гром, труба духовная, веры насадителю и отсекателю ересей, Троицы угодниче, великий святителю Нектарие, со Ангелы предстоя присно, моли непрестанно о всех нас.


*** *** ***
*** *** ***
*** *** ***


Агни Парфене, Чистая Дева — греческий православный гимн Пресвятой Богородице, распространённый святителем Нектарием Эгинским (1846—1920), который, по преданию, услышал слова и мелодию гимна от ангелов. Богослужебным песнопением не является. Перевод иеродиакона Германа (Рябцева)

Марие, Дево Чистая, Пресвятая Богородице,

Радуйся, Невесто Неневестная.
Царице, Мати Дево, Руно, всех покрывающее,
Радуйся, Невесто Неневестная.

Превысшая Небесных Сил, нетварное сияние,

Радуйся, Невесто Неневестная.
Ликов девичьих Радосте и Ангелов Превысшая,
Радуйся, Невесто Неневестная.

Небес Честная Сило и Свете, паче всех светов,

Радуйся, Невесто Неневестная.
Честнейшая Владычице всех Небесных Воинств,
Радуйся, Невесто Неневестная.

Всех Праотцев Надеждо, пророков Исполнение,

Радуйся, Невесто Неневестная.
В подвизех Ты помоще, Кивоте Бога Слова,
Радуйся, Невесто Неневестная.

И девам Ликование, и матерем Отрадо,

Радуйся, Невесто Неневестная.
Целомудрия Наставнице, душ наших Очищение,
Радуйся, Невесто Неневестная.

Покрове, ширший облака, и страждущих Пристанище,

Радуйся, Невесто Неневестная.
Немощных Покров и Заступнице, Надеждо ненадежных,
Радуйся, Невесто Неневестная.

Марие, Мати Христа, Истиннаго Бога,

Радуйся, Невесто Неневестная.
Ааронов Жезле прозябший, Сосуде тихой радости,
Радуйся, Невесто Неневестная.

Всех сирых и вдов Утешение, в бедах и скорбех помоще,

Радуйся, Невесто Неневестная.
Священная и Непорочная Владычице Всепетая,
Радуйся, Невесто Неневестная.

Приклони ко мне милосердие Божественнаго Сына,

Радуйся, Невесто Неневестная.
Ходатаице спасения, припадая, взываю Ти:
Радуйся, Невесто Неневестная.